مقه‌یه‌تى له‌ گرنگتر بكه‌!

شفق نيوز

هاته‌ ناو هۆڵ و ڕوى كرده‌ خوه‌ندكاره‌یلى وه‌ مه‌رام وتنه‌وه‌ى وتاریگ له‌باوه‌ت چوینیه‌تى رێكخستن ئه‌ركه‌یل و پێشخستن گرنگه‌یل، ئمجا له‌وه‌ختیگ ك ده‌س كرده‌ كاره‌یلى چشته‌یلیگ ئاماده‌كردو له‌وه‌رجه‌ ئه‌وه‌ك ده‌س بكاده‌ وتاره‌گه‌ى شیشه‌ى گه‌وراى به‌تاڵیگ هاوردو پڕى كرد له‌ تووپ بویچگ و دویاخر وته‌ خوه‌ندكاره‌یلى ئایا ئى شیشه‌ پڕ بویه‌ یا پڕ نه‌ویه‌؟ ئه‌وانیش گشتیان وتن به‌ڵێ پڕ بویه‌. دویاخر بڕێگ تر كوچگه‌ هویرده‌ كرده‌تى و له‌قانه‌وه‌ى تا گشت كوچگه‌گه‌ كه‌فتنه‌ ناو بۆشایى ناونى تووپه‌یل ناو شیشه‌گه‌و ئمجا دوباره‌ له‌لیان پرسى ئایا شیشه‌گه‌ پڕ بویه‌؟ خوه‌ندكاره‌یلیش وتن به‌ڵێ شیشه‌گه‌ پڕ بویه‌. ئمجا مامۆستا له‌شوون ئه‌وه‌ كه‌میگ "لم" هاوردو ئه‌ویش كرده‌تى و هه‌رچى كه‌لین بویچگه‌ وه‌پى به‌ساو جارێگ تر وته‌ خوه‌ندكاره‌یلى ئایا ئیسه‌ شیشه‌گه‌ پڕ بویه‌؟ ئه‌وانیش وه‌ یه‌گده‌نگ وتن: به‌ڵێ ئیسه‌ وه‌ته‌واوى پڕه‌. دویاجار مامۆستا كوپیگ قاوه‌ى شل هاورد و ئه‌وه‌یش رشانه‌ بان تووپ و كوچگ و لمه‌گه‌و هامیته‌ى كرد وه‌لیانا. ئمجا له‌یره‌ گشت خوه‌ندكاره‌یل ده‌سكردنه‌ خه‌نستن له‌ى كار مامۆستاو ئه‌ویش وته‌پیان: ئیسه‌ خوازم بزانین ك ئى كاره‌ ئه‌نجامى دام چ مانایگ داشت؟!!!

ئه‌و شیشه‌ ژیان هه‌ر یه‌كیگ له‌ ئیوه‌س، پێكهاته‌یل ناویشى كاره‌یل جووراوجوور ژیاندانه‌، تووپه‌گان چشته‌یل بنه‌ڕه‌تى و چاره‌نویسساز ژیاندان دیارى ئه‌كه‌ن جوور: دین، سه‌نگ ، ره‌فتار، خێزان، مناڵ، ته‌ندروسى و ره‌فیقه‌یلد، وه‌ جووریگ ئه‌گه‌ر بایدو چشته‌یل فره‌یگ له‌ده‌س بیه‌یدو ته‌نیا ئه‌یانه‌ ئه‌ڕاد بمینیده‌و ئه‌وه‌ ژیاند وه‌ خاسى و سه‌قامگیرى گوزه‌ر ئه‌كا، هویرده‌ كوچگه‌یل ناو شیشه‌گه‌یش ماناى چشته‌یل تر گرنگ ره‌سنێد جوور: ماڵ و ساختمان، كارو پیشه‌، ئۆتۆمۆبیله‌گه‌د. لمه‌گه‌یش ماناى چشته‌یل ئاسایى و كاره‌یل تر گرێده‌و ك هه‌وه‌جه‌یل بنه‌ڕه‌تى په‌كیان له‌بانى ناكه‌فێد. دى ئه‌گه‌ر له‌ سه‌ره‌تا لمه‌گه‌ بخه‌یده‌ ناو شیشه‌گه‌ ئه‌وه‌ بیگومان شوون تووپه‌گان و هویرده‌ كوچگه‌یل نیه‌وده‌و.

له‌ژیان واقعیش وه‌ هه‌مان شێوه‌س، ئه‌گه‌ر گشت هێز و تواناو گشت وه‌خته‌یلد ته‌رخان بكه‌ید ئه‌را چشته‌یل بویچگ و بیكاره‌، ئه‌وه‌ دویاخر شوون گونجیاگ ئه‌را هه‌وه‌جه‌و كاره‌یل گرنگ و سه‌ره‌كیید نیه‌مینیده‌و.  هه‌ر له‌وه‌ر ئه‌وه‌یش بایه‌د فره‌ وه‌ جوانى و هووشیاریه‌و مقه‌یه‌ت چشته‌یل هه‌وه‌جه‌دار و بنه‌ڕه‌تى ژیاند بویدو په‌یوه‌ندى بته‌ویگ داشتوید وه‌ل ره‌فتار و باوه‌ڕ و هه‌ڵسووكه‌فتد، وه‌ل داڵگ و باوگ و خوه‌یشگ و برایه‌یلد وه‌ ئاسووده‌یى بژیه‌، دیارى بووه‌خشه‌ خێزان و مناڵه‌یلد و خوه‌شه‌ویسى خوه‌د ئه‌ڕایان ئسبات بكه‌و گرنگى بیه‌ ته‌ندروسى و هه‌قه‌یل جه‌سه‌د له‌هویر مه‌وه‌و سه‌ردان ره‌فیق و ئه‌زیزه‌یلد بكه‌و هه‌واڵیان بپرس.

وه‌ل ئه‌وه‌یشا بایه‌د یه‌یش له‌ هویره‌و نه‌وه‌ید ك ئه‌گه‌ر هویر و ئه‌قڵد پڕ بكه‌ید له‌ چشت ساده‌و كه‌م نرخ، ئه‌وه‌ بوار كاره‌یل بنه‌ڕه‌تى و هه‌وجه‌دارد نیه‌مینێد، ئاده‌میزاد بایه‌سه‌ مقه‌یه‌ت هاوسه‌نگى بوود وه‌ل ژیاناو نادێ ته‌نیا گرنگى بیه‌ێده‌ یه‌ك لایه‌ن له‌بان هساو لایه‌نیگ تر جوور ئه‌وه‌ك كه‌سێگ باوه‌ڕنامه‌ى به‌رزیگ داشتوود یا ئاست داهات مانگانه‌ى به‌رز بوود دى ئیچنه‌ هویره‌و بكا گشت چشتیگ ئه‌ڕاى ته‌واوه‌و هه‌وه‌جه‌یلى جیوه‌جى بوینه‌، هه‌ر له‌وه‌ر ئه‌وه‌یش دوینید هه‌وڵ نیه‌ید په‌ره‌ بیه‌یده‌ تواناو زانست و رووشنهویرى و ئنسانیه‌ت خوه‌ى و له‌هه‌مان وه‌خت په‌یوه‌ندیه‌یل كوومه‌ڵایه‌تى و خێزانى له‌لاى كزه‌و بوودو لایه‌ن ته‌ندروسییش نییه‌و فه‌رامووش بكا. ماناى ئه‌وه‌سه‌ ك هه‌رچه‌نى خشته‌ى وه‌خته‌یلد پڕه‌و بوید وه‌ ئه‌رك و هه‌وه‌جه‌یل، ئه‌وه‌ تویه‌نید وه‌ هه‌وڵ و شه‌كه‌تى زیاتره‌و چالاكى زیاتر ئه‌نجام بیه‌ید و چشته‌یل گرنگتر له‌وه‌رچه‌و بگریدو چشته‌یل ساده‌ دابنه‌ید ئه‌را دویاتر، چوینكه‌ هه‌رچه‌نى وه‌خته‌یل ژیاند دابه‌ش بكه‌یدو به‌رنامه‌ ئه‌ڕاى دابنه‌ید، ئه‌وه‌ ئه‌راِ بوار كار سووك و ساده‌و خوه‌شى و ئسراحه‌تد هه‌ر "كوپیگ قاوه‌" كه‌فێده‌ ده‌سد.

هیوا بڵباس
ج. ا