كى وه‌زیره‌؟

شفق نيوز

دامه‌زراننى ك مانگه‌یل فره‌یگ دریژه‌ كیشا، دویاخر مه‌ردم خه‌یرومه‌ن ئامووژگارى عه‌بدوڵڵاى فه‌قیر حاڵ كردن سه‌ردان وه‌زیر بكا، عه‌بدوڵڵایش گشت هویرو فامیگى خسته‌كار ئه‌را چوینیه‌تى ره‌سین وه‌لاى وه‌زیر و هه‌رچوینیگ بوى ره‌سیه‌ لاى وه‌زیر و ئه‌وه‌ك تواس ئه‌ڕاى كریا، وه‌زیر ئمزا له‌بان داواكارى دامه‌زراننى كرد.

رووژ دویه‌م چه‌وه‌ڕى كرد وزاره‌ته‌گه‌ قاپیه‌یلى واز بكا تا بچووده‌ لاى وه‌ڕیه‌وبه‌ر تایبه‌ت ك ئه‌ركى ته‌نیا جیوه‌جى نه‌كردن فایل مه‌ردم بوى له‌بان مه‌یل وه‌زیر.

عه‌بدوڵڵا له‌یوا هویره‌و كرد ئیسه‌ وه‌ڕیه‌وبه‌ر له‌تاو وه‌زیره‌گه‌ له‌رزیدو له‌بان ته‌خته‌گه‌ى هه‌ڵسیدو سڵامیگ گرید ئه‌را ئمزاگه‌ى وه‌زیر و گشت ئاسنانكارییگ ئه‌كا ئه‌ڕاى! وه‌لى وه‌ڕیه‌وبه‌ر وته‌پى: ئمزاى وه‌زیر فه‌رمانیگ نیه‌و ئى وه‌زیره‌ خه‌وه‌ر له‌مه‌سه‌له‌ى دامه‌زرانن و هه‌وه‌جه‌ى پله‌ى وه‌زیفى نه‌یرێد، دى به‌نه‌ى فه‌قیر ناچار بوى چه‌وه‌ڕى بكا.

دى هویچ ڕیگه‌یگ له‌وه‌ده‌م عه‌بدوڵڵا نه‌مه‌ند ته‌نیا ئه‌وه‌ نه‌ود ك چوین نه‌ف له‌ ئمزاگه‌ى وه‌زیر بكا، ئنجا دویه‌تیگ وه‌زیفه‌كار وه‌ خه‌نستنه‌و وته‌پى: ئمزاى وه‌زیر كه‌م نیه‌ له‌بان هه‌ر كتاوید بوود.

به‌نه‌ى فه‌قیر حاڵ هه‌ر ئومید له‌خوه‌ى نه‌وڕى و دوباره‌ چیه‌و ئه‌را وزاره‌ت ئه‌را وه‌رگرتن فایل جوور ئه‌وه‌ك مه‌سه‌ڵه‌ته‌گه‌ ئویشێد"واز له‌ ئه‌نگویره‌گه‌ هاوردیم به‌س سه‌وه‌ته‌گه‌ توایم"، وه‌لى خاوه‌ن ئه‌نگویره‌یل به‌سیانه‌ سه‌وه‌ته‌گه‌و نه‌یشتن كتاو وه‌پى بدریه‌ێد ئه‌گه‌ر ره‌زامه‌نى وه‌ڕیه‌به‌ر گشتى له‌بانى نه‌ود، دى وه‌ى جووره‌ هه‌ر هه‌وڵدا.

عه‌بدوڵڵاى فه‌قیرحاڵ دى هویر له‌وه‌ نه‌كرد ها له‌وڵات ملیۆن وه‌زیر و دام و ده‌زگایه‌یلمان په‌یڕه‌و یاسایه‌یل ئدارى جه‌هانى و ناوچه‌یى ناكه‌ن و له‌بان مه‌یل خوه‌یان كار كه‌ن و چشت ئه‌ڵڵاجه‌ویگ نیه‌ ئه‌گه‌ر كارمه‌ند هساوكارى هه‌ر چه‌كیگ ره‌ته‌و بكاو دویریش نیه‌ هه‌ر كارمه‌نده‌یل فایل مه‌ردم بشارنه‌وه‌و ئه‌ڵڵاجه‌وییش نیه‌ له‌و وه‌خته‌ خوه‌د له‌ مرووژه‌یگ بویچگتر بزانید له‌وه‌رده‌م سكرتێر وه‌ڕیه‌وبه‌ر یا وه‌رپرس نویسینگه‌ى وه‌ڕیه‌وبه‌ر.

هه‌ر له‌وه‌ر ئه‌وه‌یش گشت سه‌یاره‌یگ خاكى بویه‌سه‌ ده‌وڵه‌تیگ سه‌روه‌خوه‌یى و سستم هاتوچوو چه‌واشه‌وه‌ كردنه‌و گشت ئه‌فسه‌ر و سه‌ركرده‌یگ سه‌ربازى تواناى جیاكردنه‌وه‌ى رووح له‌لاشه‌ دیرن و گشت كارمه‌ندیگ وه‌ناو دیموكراسى قسه‌ كه‌ن، هه‌ر له‌وه‌ر ئه‌وه‌یش عه‌بدوڵڵاى بیچاره‌ هویر له‌وه‌ كرد واز له‌ فكره‌ى خود دامه‌زرانن بارێدو بگه‌ردیده‌ شوون ریكخریاگیگ جه‌هانى ده‌سمیه‌تى به‌ێد ئه‌را وازكردن كومه‌ڵه‌یگ داواى لاوردن كولیژه‌یل ئداره‌و ئابوورى و یاسایه‌یل پله‌ى وه‌زیفى و گشت ریڕه‌وه‌یل ناوچه‌یى و جه‌هانى بكا.

زانست تازه‌ له‌ده‌وڵه‌ت تازه‌مان له‌شوون چه‌ن شیه‌وكردنیگ تازه‌ ره‌سیه‌سه‌ یاسایگ تازه‌ى كویه‌ن ك له‌ئداره‌ى ده‌وڵه‌ت په‌یڕه‌و كریه‌ێد، ك یه‌یش له‌ ئاسانترین یاسایه‌یله‌و هویچ فه‌یله‌سووف و شاره‌زایه‌یل ئابوورى ناتویه‌نن بوننه‌وه‌ى یا كه‌شفى بكه‌ن ك هه‌رچه‌نى پاشمه‌نده‌ یا میراته‌و مناڵه‌یلیش زاننه‌ى ك ئه‌ویش ئه‌و مه‌سڵه‌ته‌سه‌ ك ئویشێد"هه‌ركه‌سیگ ده‌س خوه‌ى ئه‌را خوه‌ى". یه‌یش له‌شوون ئه‌وه‌ك نه‌زانستیم كى وه‌زیره‌؟

بوشرا هلالى
ج