وه‌زاره‌تیگ ئه‌منى مافیگ ده‌ستوورى كورده‌، هاوسه‌نگى مسۆگه‌ر كه‌ید

شفق نيوز

هه‌واڵگرى(مخابرات) كرد، ئه‌گه‌ر وه‌زاره‌ت ئاسایش نیشتمانى وه‌پى نه‌دریا، ڕا و ئه‌راى چوین بڕیگ لایه‌ن سیاسى جیاواز بوى و ئویشن كورد هه‌ق نه‌یرى داواى وه‌زاره‌تیگ ئاسایشى بكه‌ید، چوینكه‌ تووڕیگ وه‌رگریكردن له‌ناو هه‌رێم كوردستان دیرن.

له‌ى باوه‌ته‌ ماڵپه‌ڕ شه‌فه‌ق له‌ په‌یوه‌ندییگ ته‌له‌فۆنى، له‌ مه‌حما خه‌لیل نوێنه‌ر فراكسیۆنه‌یل كوردستانى پرسى ك وه‌ى جووره‌ جوواو دا:" ده‌ستوور ده‌قیگ هاتى جه‌خت له‌بان ئه‌وه‌ كه‌ید ك هێزه‌یل چه‌كدار عیراق و ده‌زگایه‌یل ئاسایشى بایه‌ته‌ له‌ گشت پیكهاته‌گان ملله‌ت عیراق دامه‌رزیه‌ید ئه‌را پاراستن لایه‌ن هاوسه‌نگى له‌تى".

زیاتریش وت:"له‌ شوون ڕمیان ڕژیم وه‌رین هه‌رێم كوردستان و ملله‌ته‌گه‌ى وه‌شیوه‌یگ سه‌ره‌كى به‌شداریكردن له‌ بیناكردن تووڕ وه‌رگریكردن و مقه‌یه‌تیكردن ئاسایش و سه‌قامگیرى له‌ عیراق".

ئه‌وه‌یشه‌ ئاشكراكرد ك:"كورد كه‌سایه‌تیه‌یلیگ دیرى ك سیفه‌ته‌یل كارزانى و داوانپاكى و بیلایه‌نى ها وه‌ پیانه‌وه‌ له‌ وه‌رگرتن وه‌زاره‌ته‌یل و پۆسته‌یل ئاسایشى، و ئه‌زموون دویر ودریژیگ دیرن له‌ بوار پاراستن ئاسایش".

و ئه‌وه‌یشه‌ وت ك:"تووڕ وه‌رگریكردن عیراقى ئه‌وسا و ئیسایش پشت وه‌و زانیاریه‌یل فره‌ به‌سێد ك ده‌زگا ئاسایشیه‌گان هه‌رێم دابینیان كه‌ید له‌باوه‌ت ئاسایش وڵات".

ئاماژه‌یش وه‌وه‌دا ك:"هه‌ق كورده‌ داواى هه‌ركام له‌ وه‌زاره‌ته‌ ئاسایشیه‌گان بكه‌ید، و ئه‌و داوموده‌زگا و وه‌زاره‌ته‌یل حكوومیه‌ ك زویتر وه‌ده‌س كورده‌و بویه‌ وه‌شیوه‌یگ كارزانانه‌ و نه‌زاهه‌ت و جددیه‌ت ته‌واویگ بریانه‌سه‌ ڕیه‌وه‌، و گه‌وراترین ده‌لیلیش له‌بان ئى قسه‌ ئه‌وه‌سه‌ ك ئى وه‌زاره‌ت و ده‌زگایه‌یله‌ ك وه‌ده‌س كورده‌و بوینه‌ له‌ گشت پیهاته‌گان ملله‌ت عیراق له‌تیان بویه‌".

مه‌حما خه‌لیل سه‌رسوڕمان خوه‌ى نیشاندا له‌و قسه‌یله‌ ك وه‌ى دویاخره‌ په‌خشه‌وكریا و باس له‌وه‌ كریه‌ید ك هاوپه‌یمانى كوردستانى هه‌ق نه‌یرید داواى وه‌زاره‌ت و داموده‌زگا ئه‌منیه‌گان بكه‌ید، چوینكه‌ تووڕیگ وه‌رگرى له‌ ناو كوردستان دیرن، و ئه‌وه‌یشه‌ پرسى ك چوین تویه‌نریه‌ید ده‌وڵه‌تیگ هاوڵاتێرى یا مواته‌نه‌ى ڕاسكانى دامه‌رزیه‌ید له‌ سه‌ر حساب په‌راوێزخستن (تهمیش) ئه‌و پێكهاته‌گانتر؟!.

له‌لاى خوه‌یه‌و  خالد الاسدى نوێنه‌ر ئئتلاف ده‌وڵه‌ت قانوون له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:" وه‌زاره‌ته‌یل ئاسایشى یا ئه‌منى ئه‌گه‌ر له‌سه‌ر بنه‌ماى به‌شبه‌شه‌وكردن(محاصصه‌) به‌شه‌وبكریه‌ن، له‌ى حاڵه‌ته‌ بایه‌ته‌ هاوپه‌یمانى كوردستانى وه‌زاره‌تیگ یا پۆستیگ ئاسایشى وه‌ربگرید". ئه‌وه‌یشه‌ وت ك :" ئئتلاف فراكسیۆنه‌یل كوردستانى هیمان داواكارى ڕه‌سمى پیشكه‌ش نه‌كردیه‌ ئه‌را وه‌رگرتن وه‌زاره‌تیگ یا پۆستیگ ئاسایشى".

زیاتریش وت :"زویتر له‌بان ئه‌وه‌ ڕیككه‌فتیمنه‌ ك وه‌زاره‌ته‌یل ئاسایشى وه‌ختى پیشكه‌ش وه‌ سه‌رۆك وه‌زیره‌یل كریه‌ن بایه‌ته‌ كه‌سه‌یل بیلایه‌ن ئه‌رایان كاندید بكریه‌ن و سه‌رۆك وه‌زیره‌یل خوه‌ى هه‌ڵچنیده‌یان و ته‌وافقیگ بوود له‌ناوبه‌ین فراكسیۆنه‌یل سیاسى له‌ بان ئه‌و ناوه‌یله‌ ك خریه‌نه‌ ڕوى".

ئه‌وه‌یشه‌ ئاشكراكرد ك :" وه‌زاره‌ته‌یل ئاسایشى گرنگ و هه‌ستیارن (حه‌ساس) و له‌ئان گفتوگوو فراكسیۆنه‌یل له‌ باوه‌ت دامه‌زرانن حكوومه‌ت، له‌بان ئه‌وه‌ ڕیككه‌فتن ك ئى وه‌زاره‌ته‌یله‌ هه‌قدارى یا ئستحقاق نیشتمانیین، و بایه‌ته‌ گشت پیكهاته‌گان ملله‌ت عیراق بنریه‌نه‌ وه‌رچه‌و، وه‌ مه‌رجیگ ك بدریه‌نه‌ ده‌س كه‌سه‌یلیگ بیلایه‌ن".

شایان باسه‌ ك حكوومه‌ت عیراق 42 وه‌زیر گریده‌ خوه‌یه‌وه‌ و له‌ لایه‌ن ئه‌نجوومه‌ن نوێنه‌ره‌یل متمانه‌ دریاپیان و ده‌نگ له‌بانیان دریا، ته‌نیا وه‌زاره‌ته‌ ئاسایشیه‌گان نه‌ود ك سه‌رۆك وه‌زیره‌یل ناڕه‌زا بوى له‌بان ئه‌و كاندیدكریایه‌یله‌ ك پیشكه‌ش كریان ئه‌را وه‌رگرتنیان و مه‌رج ئه‌وه‌ دانا ك بیلایه‌ن بوون.

 

ئا: یاسر عماد