ئاماده‌يد ژن ته‌ڵاقدرياگ بخوازيد؟

شفق نيوز

له‌ وڵاته‌يل خوه‌رئاوا فريه‌ وه‌ ئاسايی ئی حاڵه‌ته‌ گوزه‌ر ئه‌دێ و هويچ نه‌نگييگ نيه‌ ئه‌را پياوه‌گه‌ يا ژنه‌گه‌ ئه‌گه‌ر چه‌ن جاريگيش ئه‌و حاڵه‌ت جيابوينه‌وه‌و ته‌ڵاقه‌ له‌لايان دوباره‌وه‌ بوود، ك ئه‌تويه‌نن وه‌بی كيشه‌و گرفت ژيان هاوسه‌رگيری دوباره‌وه‌ بكه‌ن و حاڵه‌ت وه‌رينيان ناكريه‌يده‌ سته‌م له‌وه‌رده‌م ئه‌و هاوسه‌رگيريه‌.

وه‌لی له‌ كوومه‌ڵگای خوه‌رهه‌ڵاتی وه‌تايبه‌ت له‌لای ئيمه‌، ئه‌و مه‌سه‌له‌ ئاسايی نيه‌و داب ونه‌ريت كوومه‌ڵگا چه‌نه‌ها سه‌ختی ئه‌را ئه‌و حاڵه‌ته‌ داناگه‌و هه‌ر وه‌و خاتريشه‌ دوينيد ئافره‌ت چه‌نه‌ها ساڵ وه‌ بيوه‌ژنی مه‌ندگه‌و شوی نه‌كردگه‌.

راسه‌ ئمڕوو شيواز هويره‌وكردن و گوزران ئاڵشت بويه‌و چشته‌يل تازه‌يگ هاته‌سه‌ وجوود له‌ ژيان تاك كورد، وه‌لی هيمان ئه‌و ديارده‌ هه‌ر مه‌ندگه‌ ك ژن ته‌ڵاقدرياگ ك هه‌رچه‌نی جايه‌ڵ جوانيش بوود فريه‌ خوازرياگ نين و كه‌س وكار كوڕ يا بيوه‌ پياگه‌يل وه‌ربه‌س دانه‌ن و مامڵه‌ی خاسيگ وه‌ل ئه‌و حاڵه‌ته‌ ناكه‌ن ك ريژه‌ی جيابوينه‌وه‌و ته‌ڵاق رووژ له‌دويای رووژ وه‌ره‌و زيايبوين چوود و له‌ی ناونييشه‌ فيشتر ژنه‌يل زه‌ردمه‌نن، وه‌لی بيوه‌ پياگ ك زويتر ژنی ته‌ڵاق داگه‌و شايه‌ت هه‌ر خوه‌يشی هووكار ئه‌و ته‌ڵاقه‌ بويه‌، وه‌لی ئه‌تويه‌نيد ئه‌را جار دويه‌م پرووسه‌ی هاوسه‌رگيری ئه‌نجام بيه‌يدو زوورميانيش دويه‌ت ئازه‌و خوازن و كوومه‌ڵگايش سه‌ختی ئه‌را ئه‌و حاڵه‌ته‌يله‌ دروس نه‌كردگه‌و هه‌ر وه‌ ئاسانی جيوه‌جی ئه‌كريه‌يدو كه‌س وكاريشی ده‌سخوه‌شی له‌لی ئه‌كه‌ن!.

ئه‌وه‌ك كومه‌ڵناسه‌يل له‌بانی جفتن، ئه‌وه‌سه‌ ك فريه‌ ئاساييه‌ ئه‌گه‌ر كه‌سيگ يه‌كه‌مجار له‌و پرووسه‌ی سه‌ركه‌فتگ نه‌وی و جيابوينه‌وه‌ له‌ ژيانی رويدا، له‌ حاڵه‌ته‌يليگيش له‌ جيای ئه‌وه‌ك خوه‌يسزانن ژن يا كوشتنی له‌لايه‌ن هاوسه‌ره‌گه‌يه‌و په‌يا بوود خاستر ئه‌وه‌سه‌ ته‌ڵاق بايده‌ وجوود نه‌ك وه‌ كاره‌ساتيگ بڕه‌سيده‌ كووتايی.

هاوسه‌رگيری ئه‌را جار دويه‌م خاستر ئه‌وه‌سه‌ ك فريه‌ ئاسايی بوود ئه‌را هه‌ردوگ ره‌گه‌زه‌گه‌، چوينكه‌ مادام ژيان وه‌رده‌وامه‌و ئاده‌ميزاد وجوود ديريد له‌ژيان خاستر ئه‌وه‌سه‌ ئه‌و مه‌سه‌له‌ وه‌ كووتايی ژيان ته‌ماشا نه‌كريه‌يدو پرووسه‌گه‌يش دوباره‌وه‌ بوود، وه‌لی دوينيد مه‌يل پياگ له‌ی حاڵه‌ته‌ هه‌ر وه‌لای دويه‌ت شوی نه‌كردگ ئه‌چێد و هه‌ر خوازياره‌ دويه‌ت ئازه‌و بخوازيد ك عومريشی له‌ خوه‌ی بويچگتر و جوانيش بوود و مووچه‌يگيش داشتوود، هه‌ر له‌وه‌ر ئه‌وه‌يش هه‌ل و ده‌رفه‌ت بيوه‌ژن يا ئه‌و ژنه‌يله‌ ك هاوسه‌ره‌يليان مردگه‌ يا ئه‌و ژنه‌يله‌ ك ته‌ڵاق دريانه‌ ئه‌را دوباره‌ شويكردن خوازرياگ نيه‌و هه‌ل شويكردنيان كه‌متره‌ له‌ناو كوومه‌ڵگای كورده‌واری هاوچه‌رخمان، هووكاريگ تريش ئه‌وه‌سه‌ ك پياگ خوازياره‌ دويه‌ت شوی نه‌كردگ له‌وه‌ر ئه‌وه‌ بخوازيد تا دوياخر نه‌كه‌فيده‌ وه‌ر تير وتانه‌ی مه‌ردم كوومه‌ڵگا.

محه‌مه‌د ئه‌حمه‌د

ج . أ