تاوانه‌یل رژیم رمیاگ دژ وه‌ كورده‌یل فه‌یلى

شفق نيوز

 

وه‌هویرخستن و ساڵیاد ئه‌و جه‌مكوشیه‌ ك له‌وه‌رانوه‌ر كورده‌یل فه‌یلى ئه‌نجام دریاگه‌، كار خاسیگه‌و بایه‌س بوى حكوومه‌ت عراق ساڵه‌یلیگ زویتر له‌وه‌رجه‌ ئیسه‌ هویر له‌ى دوسیه‌ بكردیاد نه‌ك له‌ى رووژه‌یل وه‌خت هه‌ڵوژاردن ئه‌نجوومه‌ن پاریزگایه‌یله‌ ئه‌و ساڵیاده‌ بكه‌فتیاده‌ هویرى.

 

له‌وه‌ گرنگتر ئه‌وه‌سه‌ ك مه‌سه‌له‌و ساڵیاد جه‌مكوشى كورده‌یل فه‌یلى ته‌نیا هه‌ر دروشم نه‌ود، به‌ڵكوو بایه‌سه‌ كار ئه‌را ئه‌وه‌ بكریه‌ید بار و گوزران ژیانیان خاستره‌و بوود.

 

رژیم به‌عس له‌ ساڵه‌یل هه‌یشتاى سه‌ده‌ى گوزه‌یشت، كورده‌یل فه‌یلى له‌بان ماڵ و حاڵ خوه‌یان ده‌ركرد و ئاواره‌ى وڵاته‌یلیان كرد، یه‌یش بیجگه‌ ئه‌وه‌ك وه‌ هه‌زاران له‌و كورده‌یله‌ له‌وه‌خت گرتنیان و له‌ زیندانه‌یل به‌عس له‌ سێداره‌ دریان و شه‌هید كریان، ك ئه‌ویش له‌وه‌ر ئه‌وه‌ك ته‌نیا كوردن.

 

فره‌یگ له‌و كورده‌یل فه‌یلیه‌ ك به‌عس تارانه‌یان و ده‌ریان كردن له‌ عراق، ئیسه‌ هاتنه‌سه‌و ئه‌را وڵات و زوورمیانیش له‌ژیر ده‌وار و له‌ناو كه‌لاوه‌یل له‌ نزیك شار خانه‌قین ژیانیگ كوڵه‌مه‌رگى به‌نه‌سه‌ر.

 

ئه‌و خیزانه‌یله‌ ك گله‌و خواردنه‌ ئه‌را عراق و له‌و جووره‌ شونه‌یله‌ ژیه‌ن، ته‌نانه‌ت ناتویه‌نن مناڵه‌یلیانیش كلبكه‌نه‌ وه‌ر خوه‌ندن، چوینكه‌ حكوومه‌ت وه‌رین و ئیسه‌ى عراق هیمان ره‌گه‌زنامه‌ى عراقى وه‌ به‌ش فره‌یگ له‌لیان نه‌یاگه‌.

 

ئنجا حكوومه‌ت عراق ئه‌گه‌ر مه‌رامى ئه‌وه‌سه‌ ریز له‌ قوربانیه‌یل جه‌مكوشى كورد فه‌یلى بگرید، با بار ژیان  گوزرانیان خاستره‌و بكاو ره‌گه‌زنامه‌یلیان بیه‌یده‌وه‌و  باریده‌یانه‌و ئه‌را بان ماڵ و حاڵ خوه‌یان، چوینكه‌ ئه‌وه‌ ریزگرتنه‌ نه‌ك به‌رزه‌وكردن دروشم له‌بان دام وده‌زگایه‌یلى.

 

ئبراهیم سه‌مین

ج . أ