چاره‌نویس كورد ها ده‌س كورد!

شفق نيوز

 

كه‌سه‌یلیگ هه‌ن باس له‌وه‌ ئه‌كه‌ن ك گوایا سه‌روه‌خوه‌یى نه‌ته‌وه‌ى كورد و چاره‌نویسى وه‌ ده‌س خوه‌ى نیه‌و په‌یوه‌سه‌ وه‌ چه‌ن لایه‌ن و ریكخریاگیگ ناوده‌وڵه‌وتى و له‌وانه‌یش: كومه‌ڵه‌ى گشتى نه‌ته‌وه‌یل یه‌كگرتگ ك پیكهاتگه‌ له‌ 194 وڵات ئه‌ندام و ئه‌نجوومه‌ن ئاسایش ناوده‌وڵه‌تى ك لایه‌ن جیوه‌جیكاره‌ له‌ UN و دادگاى ناوده‌وڵه‌تى لاهاى له‌ هۆڵه‌ندا ك خوه‌ى له‌لایه‌ن دادوه‌رى دوینیده‌و.

راسه‌ ئیمه‌ى كورد هه‌وه‌جه‌ وه‌ پشتگیرى دیریم و له‌وه‌رجه‌ گشتیانیش پشتگیرى وڵاتیگ گه‌ورا هیز جوور ئه‌مریكاو ریكخریاگیگ جوور نه‌ته‌وه‌یل یه‌كگرتگ و مه‌یلكیشان یه‌كێتى ئۆرپا وه‌ره‌و لاى كیشه‌ى كورد، وه‌لى یه‌یش وه‌ ماناى ئه‌وه‌ نیه‌ ئه‌وان هه‌وڵ ئى ئامانجه‌ ئه‌را كورد نایه‌ن، به‌ڵكوو خود ملله‌ت كوردو لایه‌نه‌یل كوردى وه‌رپرس یه‌كه‌من له‌ دیاریكردن چاره‌نویس و سه‌روه‌خوه‌یى.

ئیمه‌ زانیم له‌ى قوناغ سه‌خته‌ كیشه‌ى كورد هیمان وه‌ل حكوومه‌ت ناوه‌ندى به‌غدا یكلاوه‌ نه‌ویه‌و گشت رووژیگ كیشمه‌یكش بودجه‌و مه‌سه‌له‌ى كلكردن نه‌فت بویه‌سه‌ مانشێت سه‌ره‌كى هه‌واڵه‌یل و هیمان حكوومه‌ت فیدراڵى وه‌ خوه‌یا نیه‌دوینید دگان وه‌ هه‌رێم كوردستان جوور هه‌رێمیگ بنه‌یدو هه‌ر هه‌وڵ ئه‌وه‌ ئه‌یاد وه‌ هه‌ر خه‌رجیگ بوود باریده‌ى ژیر ده‌سڵات خوه‌ى و بڕیاره‌یل سه‌خت خوه‌ى له‌بانى بچه‌سپنید، ك یه‌یش وه‌ربه‌سیگه‌ له‌نواى په‌سه‌نكردن سه‌روه‌خوه‌یى كوردستان له‌لایه‌ن وڵاته‌یل یه‌كگرتگ ئه‌مریكاو نه‌ته‌وه‌یل یه‌كگرتگ چوینكه‌ كیشه‌ى ناوخوه‌یى جارجاریگ بووده‌ وه‌ربه‌س گه‌ورایگ له‌وه‌رده‌م ئامانجه‌یل.

له‌ى حاڵه‌ته‌ بایه‌سه‌ له‌بان حزب و لایه‌نه‌یل و مه‌ردم هه‌رێم كوردستان وه‌ هه‌وڵ و یه‌كگرتن و یه‌ك هه‌ڵویستى بتویه‌نن وه‌رگرى له‌ مافه‌یل خوه‌یان بكه‌ن و حكوومه‌ت ناوه‌ندى نه‌تویه‌نید نه‌ف له‌ ناكووكى و كیشمه‌كیشیان وه‌ربگرید، ئه‌یه‌ له‌لایگ ، له‌لایگ تریشه‌و بایه‌سه‌ ئه‌وه‌ له‌ هویر نه‌وه‌یم ك ئیمه‌ى كورد چوارده‌ورمان وه‌ دوشمن ده‌ور دریاگه‌و یه‌یش كار ئاسانیگ نیه‌ وه‌ شه‌و و رووژیگ زاڵ بویمنه‌ بان پلان و مه‌رامه‌یلیان، چوینكه‌ ئه‌و ده‌وڵه‌ته‌یله‌ ك كورد له‌بانیان دابه‌ش كریاگه‌ هویچ وه‌ختیگ ئاماده‌ نیین دگان وه‌ چه‌سپانن سه‌روه‌خوه‌یى ئه‌را كورد بنه‌ن و هه‌میشه‌ خوازیار بوینه‌ چاره‌نویش ئى نه‌ته‌وه‌ رووشن و سه‌قامگیر نه‌ود!

ئیسه‌ له‌ى قوناغ چاره‌نویسسازه‌، بایه‌سه‌ به‌عزه‌ لایه‌نه‌یلیگ كوردى ته‌نیا هویر نه‌خه‌نه‌ لاى وه‌ده‌سهاودرن پۆست و پله‌و پایه‌ى ناوخوه‌یى، به‌ڵكوو بایه‌سه‌ له‌ دید لایه‌نه‌یل ده‌ركى و وڵاته‌یل یه‌كگرتگ و ئه‌نجوومه‌ن نه‌ته‌وه‌یل یه‌كگرتگه‌و فیشتر متمانه‌ى خوه‌یان زیاى بكه‌ن و ئه‌و پله‌و پایه‌ ك له‌یرا جه‌نگ و مرافه‌یانه‌ ئه‌راى له‌لاى ئه‌وان بارنه‌ى ده‌س تا ئه‌وانیش بتویه‌نن وه‌گووره‌ى ئه‌و ره‌فتار و هه‌ڵسووكه‌فته‌ پشتگیرى له‌ كیشه‌ى كورد بكه‌ن و هه‌وڵ سه‌رخستن مافه‌ ره‌واگه‌ى بیه‌ن.

خاڵیگ تر هه‌س ك یه‌یش فریه‌ گرینگ و سه‌ره‌كیه‌، ك ئه‌ویش ئه‌وه‌سه‌ كورد تازه‌ خه‌ریك بنیاتناین ژیرخان ئابووریه‌، ئى لایه‌نیشه‌ كڕكڕه‌ى پشت هه‌ر وڵاتیگه‌ له‌بان ئى گووشه‌ى زه‌ویه‌، ئمجا هه‌رێم كوردستانیش له‌ى رویه‌و هه‌وه‌جه‌ وه‌ وه‌خت فیشتر دیرید ئه‌را بته‌وكردن لایه‌نه‌ ئابووریه‌گه‌ى و نه‌بایه‌د له‌ى وه‌خت و ساتیشه‌ لایه‌نه‌یلیگ هه‌ن جه‌نگ درامه‌ت و داهات نه‌فت بكه‌ن و زووان حكوومه‌ت ناوه‌ندى له‌بان هه‌رێم زڕ بكه‌ن و مینه‌ى مه‌هانه‌ له‌ كورد بكا. هه‌ر وه‌و خاتریشه‌ ئویشیم چاره‌نویس كورد ها ده‌س خوه‌ى ئه‌گه‌ر بزانید وه‌ جوانى ره‌فتار وه‌ل ده‌سكه‌فت و خواسته‌یلى بكا، وه‌لى وه‌ مه‌رجیگ به‌رژه‌وه‌ندى باڵاى كورد له‌وه‌رچه‌و بگیریه‌ید و هه‌وڵ ئه‌وه‌یش بدریه‌ید چالاكى فیشتر له‌ بوار سه‌رمایه‌گوزارى و مه‌یلكیشان بیگانه‌ داشتوود ئه‌را سه‌رسامبوین وه‌ ئه‌قڵیه‌ت و شایسته‌یى ئیچنه‌ ملله‌تیگ و پشتگیریكردنیان وه‌ره‌و چاره‌نویس یه‌كجارى.

ره‌نجده‌ر ئاواره‌

ج . أ