كورده‌یل فه‌یلى و مه‌ترسیه‌یل ئاینده‌

شفق نيوز

به‌ر و نه‌فه‌گه‌ى وه‌ربگرید، ئمجا له‌یره‌ راسى و نه‌خش یه‌كلاكه‌ر خاوه‌ن ڕا ده‌ركه‌فێد نه‌ك پله‌ى قه‌ومایه‌تى یا پۆست، دى له‌ى بواریشه‌ باس له‌وه‌ كه‌م له‌وه‌ختیگ یه‌كیگ له‌ میوانه‌یلمان بڕیگ پرسیار ئاراسته‌م كردو له‌وانه‌یش وت: ئامانج له‌ دامه‌زرانن شه‌فه‌ق چه‌س؟ ده‌سكه‌فته‌یلى چه‌س؟ ئایا خوه‌شاڵین له‌ وه‌رده‌وامى له‌ى كاره‌؟ ئایا به‌ڵگه‌ى ئه‌وه‌ دیرین ك هه‌وڵ و ته‌قلادان به‌رداره‌، ئایا وه‌راسى چشت دیارییگ له‌ى كاره‌ ك هه‌وڵ ئه‌راى ئه‌یه‌ین هاوردینه‌سه‌ ده‌س؟ منیش جوواوى دامه‌و و وتمه‌پى: له‌ شه‌فه‌ق هه‌یشت مووم كوشانیمه‌سه‌و و نووه‌مین شه‌م ده‌مدایمنه‌، ئه‌و ساڵه‌یلیشه‌ پڕ بویه‌ له‌ كار خاس و به‌رهه‌م ره‌ین و به‌ڵگه‌دار و هه‌میشه‌ هویر وڕاى فره‌یگ له‌باوه‌ت مه‌زه‌نه‌كردن كاره‌یلمان ره‌سیه‌سه‌ پیمان چ خاس چ خراو، رێڕه‌ومانیش تائیسه‌ پشتگیرى و په‌ره‌داینه‌ وه‌ چشته‌یل خاس و ته‌قالاكردنه‌ ئه‌را راسه‌وكردن چشته‌یل چه‌فت.

 

هه‌وه‌جه‌ وه‌ قسه‌ى زیاتر نه‌یریم له‌باوه‌ت ئه‌وه‌ك ئى ده‌زگا پێشكه‌شى كردگه‌، هه‌ڵكه‌فت و په‌یمانه‌ى كار و كرده‌وه‌یلمان به‌ڵگه‌ى ته‌واویگه‌ ئه‌را تاریف و شیه‌وكردن، یه‌یش بیجگه‌ ڕاى و پێشنیاره‌یل كه‌سه‌یل پسپۆر ك به‌سه‌ ئه‌را جوواوه‌وداین پرسیاره‌یل و نیشانداین راسیه‌یل.

 

ئه‌و مه‌سه‌له‌ ك هه‌وه‌جه‌ وه‌ ئومیدكردن دیرێد، ئه‌ویش قوناغ ئاینده‌س، ئمجا سیستمه‌یل سیاسى و كوومه‌ڵایه‌تى و ئابوورى و رووشنهویرى له‌عراق وه‌تایبه‌ت كه‌رت ره‌سانن جووریگ  ئاژاوه‌و تێكه‌ڵكردن وه‌ خوه‌یه‌و دیه‌، ئیمه‌یش چوینكه‌ له‌چوارچیوه‌ى ئى ژینگه‌و ئى بار ناسه‌قامگیر ئاسایش و خزمه‌تگوزارى و ژیانه‌ كار كه‌یم، دى كار ره‌سانن له‌تى خاس له‌تى دوینید و خراویش هه‌س، وه‌لى وه‌چه‌واشه‌ى ئه‌وه‌ك ئویشنه‌ى، ئیمه‌ى كورده‌یل فه‌یلى بیجگه‌ تویچیان و كه‌مى شاره‌زایى و نه‌ف وه‌رنه‌گرتن له‌ هه‌له‌یل هه‌ڵكه‌فتگ ، وه‌لى وه‌ل ئه‌وه‌یشا جوواو نه‌دانه‌وه‌ى داواكاریه‌یلمان له‌لایه‌ن لایه‌نه‌یل په‌یوه‌ندیداره‌و له‌ به‌غدا یا كوردستان ئه‌وه‌ بوى ك پێشنیار كریا، وه‌لى چشته‌یلیگ هه‌ن كه‌مه‌ كه‌مه‌ ئاماژه‌ وه‌ هاوردنه‌وه‌ى عافیه‌ت كه‌ن له‌ناو خیزان فه‌یلى، شایه‌ت مه‌مه‌ر یه‌یش ئه‌وه‌ بوود ك جوور هه‌ڵقه‌یگ په‌یوه‌سكه‌ریم له‌ناونى برایه‌یلمان له‌ نه‌ته‌وه‌ى كوردو برایه‌یلمان له‌ مه‌زه‌و، ك یه‌یش هیلیده‌مان نه‌خش گرنگ بیاشتویم له‌ نزیكه‌وكردن دیدو ئه‌ڕاى چوین، وه‌لى وه‌ مه‌رجیگ ناكووكیكه‌ره‌یل نه‌ف وه‌ربگرن له‌ى تایبه‌تمه‌ندیه‌ وه‌شیوه‌ى خاسیگ .

 

له‌لایگ تره‌و ئیمه‌ى كورده‌یل فه‌یلى دیدو نوڕستن و پابه‌ندى و ئه‌جنداى خوه‌مان دیریم ك شایه‌ت له‌یه‌كبڕیان داشتوون وه‌ل یه‌كا، وه‌لى وه‌شیوه‌ى گشتى شه‌قام فه‌یلى چشت خراویگ یا فتنه‌یگ له‌وه‌ر خاتر ده‌سكه‌فت سیاسى دروس نه‌كردگه‌ له‌ چوارچیوه‌ى ئه‌و كیشه‌یله‌ ك وجوود دیرن، ئیمه‌ بخوازیم و نه‌خوازیم زانیمن ك ئى جووره‌ رێڕه‌ویگ زه‌ره‌ده‌ ئه‌رامان له‌گشت لایگه‌و، ئیمه‌ وه‌خشین و سه‌قامگیرى و ئاسایش و دادگه‌رى ئه‌خوازیم، كێشه‌یل ئیسه‌ى سیاسى ئه‌وقه‌ره‌ په‌سه‌ن نییه‌و شایسته‌ى ئه‌وه‌یش نییه‌ ئه‌وقه‌ره‌ گرنگى وه‌پى بدریه‌ێد و هه‌قه‌ گرنگى وه‌ هاووڵاتیه‌یل عراقى و هه‌قه‌یلیان بدریه‌ێد وه‌بى جیاوازى نه‌ته‌وه‌یى یا چینایه‌تى.

 

ئى بار سیاسى مه‌ترسیدار ئمڕووه‌ ك ناونیشان كیشمه‌كیش ناونى برایه‌یلمان له‌ خوه‌ى ناگه‌، گوزه‌یشته‌ى تیه‌ڵیگ ئه‌خاده‌ هویرمان و مه‌ترسى ئاینده‌ له‌لى كریه‌ێد، وه‌لى ئیمه‌ى فه‌یلیه‌یل هه‌ڕه‌شه‌یگ نییم ئه‌را هویچ كه‌سیگ و میلیشیاى چه‌كداریش نه‌یریم وه‌ زووان تون وتیژى قسه‌ بكا ك تواناى فشارناین داشتوود له‌بان باقى لایه‌نه‌یل، هه‌ر له‌وه‌ر ئه‌وه‌یش كه‌سیگ له‌لیان نه‌خستیه‌سه‌مانه‌ وه‌ر هساوه‌یل خوه‌ى، وه‌لى ئه‌وه‌ك تویه‌نیم ئه‌نجامى بیه‌یم، ئه‌وه‌سه‌ ك رووژگار و قه‌وڵه‌یل گوزه‌یشته‌و مه‌ترسیه‌یل بار ئیسه‌ بخه‌یمنه‌ هویریان ك رووژ وه‌رووژ وه‌ره‌و لاى خوه‌ى كیشیده‌مان و هیلێده‌مان زیاتر ترس له‌ئاینده‌ بیاشتویم.

 

ئیمه‌ جوور تاكه‌ كه‌س ناتویه‌نیم دڵنیایى بیه‌یمنه‌ گشت پێكهاته‌یل ملله‌ت و بویشیم به‌دبه‌ختى و مه‌ویسیه‌یل دوباره‌وه‌ نیه‌ون، به‌ڵكوو ئى ئه‌ركه‌ كه‌فێده‌ مل خاوه‌ن بڕیاره‌یل و بایه‌سه‌ دڵنیایى بیه‌نه‌ باوگ وداڵگه‌یل و گشت رووڵه‌یل ملله‌ت وه‌ ئه‌وه‌ك دى ده‌رفه‌تیگ نییه‌ ئه‌را زیایبوین بیوه‌ژنه‌یل و یه‌تیم و گیایكه‌ره‌یل و جاریگ تر نیاز كووچ وه‌پیكردن زیاتر نییه‌و دى جه‌نگیش نییه‌ مه‌گه‌ر ته‌نیا وه‌ل تیرۆریسته‌یل و دى هه‌ڕه‌شه‌یش ناكه‌یم و هه‌ق و ده‌سكه‌فته‌یل ملله‌تیش نافه‌وتنیم و له‌وه‌رجه‌ گشتیانیش هه‌ق كورده‌یل فه‌یلى.

 

عه‌لى حسێن فه‌یلى

 

ج. ا