شه‌هید له‌یلا قاسم مه‌شخه‌ڵیگ ئلهامبه‌خش ئازادى

شفق نيوز

دادپه‌روه‌رى، ناوه‌یلیگ پرشنگدار جوور مه‌شخه‌ڵیگ ڕووشن دره‌وشیه‌نه‌وه‌ و تاریكى ڕیگه‌ى پڕ له‌ مه‌ترسى ڕووشنه‌وكه‌ن، چ پیاو بوون چ ژن. ملله‌ت كوردیش له‌ى ڕاسیه‌ وه‌ده‌ر نیه‌؛ به‌ڵكوو تایبه‌تمه‌ندى خه‌بات ملله‌ت كورد دژ وه‌ دوشمنه‌یل و داگیركه‌ره‌یل خاكه‌گه‌ى جووریگ له‌ جیاوازى وه‌پى وه‌خشانیه‌ ك له‌ ته‌واو دونیا وینه‌ى فره‌ كه‌مه‌.

ئه‌گه‌ر لاپه‌ڕه‌یل تاریخ هاوچه‌رخ خویناوى ملله‌ته‌گه‌مان بیه‌یمنه‌ یه‌كا بى گومان ناو مه‌رده‌یلیگ جوور شێخ سه‌عید پیران و عوبه‌یدولڵاى نه‌هرى و عه‌بدولسه‌لام بارزانى و شێخ مه‌حموود نه‌مر و سمكۆى شكاك و بارزانى نه‌مر، تاریخ وه‌ ئاو ته‌ڵا ناوه‌یلیان له‌ بان لاپه‌ڕه‌یل خوه‌ى نویسانیه‌ ك مایه‌ى شانازى و ئفتخار گشت لایه‌نیگه‌ و شایه‌تى ئه‌وه‌ ئه‌را دونیا وه‌گشتى ده‌ید ك ملله‌ت كورد ملله‌تیگ زینیه‌ و هویچ وه‌ختیگ سه‌ر ئه‌را داگیركه‌ره‌یل و زاڵمه‌یل و تاونباره‌یل تاریخ نه‌چه‌مانیه‌.

ئه‌گه‌ر له‌ تاریخ ملله‌ته‌یل دونیا ژنه‌یلیگ جوور ژان دارك فه‌ره‌نسى و جه‌میله‌ بوحیره‌د جه‌زایرى ناو ده‌ركردنه‌ ئه‌وه‌ تاریخ ملله‌ت كوردیش له‌ى باوه‌ته‌ ناوه‌یلیگ فره‌ جوور هه‌ساره‌ى پرشنگدار له‌ ئاسمانمان دره‌وشیه‌نه‌وه‌ جوور قه‌ده‌م خه‌یر و حه‌پسه‌ خان نه‌قیب و له‌یلا قاسم تا ڕه‌سیده‌ له‌یلا زانا.

ئه‌یانه‌ و ده‌یان و سه‌دان ژنه‌یلیگتر ك تاریخ ملله‌ت كورد ناویان له‌ تۆمارگه‌ى خوه‌ى نویسانیه‌.

ملله‌ت كوردیش جوور هه‌ر ملله‌تیگ زینى بایه‌ته‌ یاد ئى ناوداره‌یله‌ له‌ یادگارى خوه‌ى سابت بكه‌ید و ژیان و خه‌باتیان هه‌میشه‌ بخه‌یده‌ هویر خوه‌ى ونه‌وه‌یل نوو، چوینكه‌ هه‌ر ملله‌تیگ بایه‌ته‌ تاریخ خوه‌ى هه‌میشه‌ دوباره‌ و سێ باره‌ بخوه‌نید تا گه‌ر ئه‌زموونه‌یلى دوباره‌وه‌ نه‌ود چوینكه‌ هه‌ر ملله‌تیگ تاریخ خوه‌ى نه‌خوه‌نید تاریخه‌گه‌ى دوباره‌وه‌ بوود و یه‌یشه‌ جووریگه‌ له‌ زوڵم له‌ نه‌وه‌یل نوو ... بوونه‌ى ئى قسه‌مانیشه‌ ئه‌وه‌سه‌ ك له‌ى ڕووژه‌یله‌ ساڵیاد شه‌هید ڕیگه‌ى كورد و كوردستان له‌یلا قاسم حه‌سه‌ن كه‌یمن ك وه‌وه‌ ناسریاس ك یه‌كم ژنیگه‌ له‌ تاریخ هاوچه‌رخ ڕووژهه‌ڵات ناوڕاس له‌وه‌ر هووكاریگ سیاسى له‌ سێداره‌ دریاس.

له‌یلا قاسم حه‌سه‌ن له‌ ساڵ 1952 له‌ ئاواى بانمیل له‌ شار خانه‌قین په‌یا بویه‌ و خوه‌نین سه‌ره‌تایى و ناوه‌ندى و دویاناوه‌ندى خوه‌ى له‌ خانه‌قین ته‌واوكرد و له‌ ساڵ 1972 له‌ به‌ش كوومه‌ڵناسى له‌ كۆلیج ئاداب له‌ زانكۆى به‌غدا قه‌بوول كریا و زویتر له‌ ساڵ 1970 چویه‌ ڕیزه‌یل پارت دیموكرات كوردستان و خاوه‌ن باوه‌ڕ قویلیگ بوى وه‌ ئازادى ملله‌ته‌یل و وه‌تایبه‌تى ئازادى ملله‌ت كورد زوڵم لیكریاى خوه‌ى، و له‌ى باوه‌ته‌ وه‌ئه‌ندام بوینى له‌ پارت دیموكرات كوردستان ئه‌و باوه‌ڕیه‌ قویلتره‌و كرد، هه‌ر له‌وه‌ر ئه‌وه‌یشه‌ بوى ك له‌ ناوه‌ند زانكۆیى كار ڕیكخستن حزبى كرد وه‌ل گرووپیگ خه‌باتكه‌ر ك پیكهاتوى له‌ (جه‌واد هه‌مه‌وه‌ندى و نه‌ریمان فوئاد و حه‌سه‌ن حه‌مه‌ ڕه‌شید و ئازاد قاسم) و له‌وه‌ر چالاكى و زینیه‌تى ئى جه‌وانه‌یل كورده‌ ترس چویه‌ دڵ ڕژیم و نیگه‌ران بوى، ئه‌وه‌ بوى له‌ 24 نیسان 1974 ده‌زگاى ئه‌من ڕژیم به‌عسى له‌ نیمه‌ى شه‌و وه‌ چه‌ك و تفاق فره‌یگه‌و هه‌ڵكوتا بان ماڵ له‌یلا قاسم و ده‌زگیرى كرد و له‌ شوون دادگایى كردن كارتۆنییگ بڕیار له‌سێداره‌داینى دریا له‌ شوون كه‌متر له‌ دوهه‌فته‌ و له‌ ڕووژ 12 مانگ ئه‌یار ساڵ 1974 وه‌ل هه‌رسێ هاوڕیه‌یلى له‌ سێداره‌دریا و له‌یلا قاسم بڕیار دا جنگ كوردى بپووشى ئه‌را ڕووژ جیوه‌جیكردن له‌سێداره‌داینه‌گه‌ى و وه‌ ده‌م خوه‌نستن سروود نه‌ته‌وه‌یى كوردى "ئه‌ى ڕه‌قیب هه‌ر ماوه‌ قه‌ومى كوردزمان" په‌ت سێداره‌ كریا ملى و وه‌ شه‌هاده‌ت ڕه‌سى، و خوه‌ى وه‌ته‌نى بویه‌ وه‌وى یا بووك كوردستان و بویه‌ سه‌رچاوه‌ى ئلهامبه‌خشیگ ئه‌را گشت ئازادیخوازه‌یل جه‌هان و مه‌شخه‌ڵیگ ئه‌را ته‌واو شووڕشگێڕه‌یل ك هه‌وڵ و ته‌قه‌لا و ماڵ و گیان وگشت وجوودیان كه‌نه‌ قوربانى ئه‌را سه‌ربه‌رزى و سه‌رفه‌رازى ئاده‌میزاد و دادپه‌روه‌رى كوومه‌ڵایه‌تى و ئازادى نیشتمان... هه‌زران سه‌ڵام له‌ گیان پاك شه‌هید له‌یلا قاسم و هاوڕیه‌یلى و ته‌مام شه‌هیده‌یل ڕیگه‌ى كورد و كوردستان.

 

ماجد سوره‌میرى