فه‌يليه‌يل ده‌وڵه‌مه‌ن نه‌يرن

شفق نيوز

ئاساييه‌ ك هويچ زاينيگ بی ژان نيه‌ چ بيده‌نگ چ ژنه‌فياگ، ئيمه‌ی فه‌يليه‌يل له‌وه‌ر هووكاره‌يليگ وه‌ زوورمی وه‌ره‌و لای ته‌نيايی و جيايی كيشيم وه‌ به‌راورد وه‌ل تيكه‌ڵبوين، دی وه‌ گووره‌ی ئی هه‌ڵكه‌فتيشه‌ دامه‌زرانن تيميگ تووپان يا هه‌ر وازييگ تر وه‌جه‌م مه‌حاڵ نيه‌، وه‌لی ئه‌را ئيمه‌ سه‌خته‌.

وه‌ گووره‌ی ئه‌و قسه‌يله‌ ك ئاماژه‌ وه‌پی كرديم ليست دريژيگيش هه‌س له‌باوه‌ت ناو و كه‌سايه‌تيه‌يل فه‌يلی له‌ هه‌ردوگ ره‌گه‌ز، خاوه‌ن باوه‌ڕنامه‌و ئه‌زموونداره‌يل له‌ بواره‌يل جياجيا هه‌ر يه‌كيگ له‌ليان وه‌خت ته‌ماميگ ديريد وه‌ل نياز و هه‌وڵه‌يليگ ئه‌را ده‌سكه‌فتن يا وه‌ده‌سهاوردن و گه‌ردين له‌شوون فيشتر له‌و بواره‌يله‌ ك خوه‌يان له‌تی دينه‌سه‌و، له‌وه‌رانوه‌ر ئه‌وه‌يش هه‌ر له زويه‌و ئيراده‌يگ وه‌جه‌م له‌ليانه‌و نه‌كه‌فته‌سه‌ وه‌رچه‌ومان ئه‌را يايگرتن خوه‌ی وه‌ڕيه‌بردن و كاركردن وه‌ گيان ده‌سه‌جه‌می وه‌خاتر كيشه‌گه‌مان.

وه‌ل ئه‌وه‌يشا مه‌ردمانيگ نه‌دار و هه‌وه‌جه‌دار هه‌ن وه‌ سووز و وره‌ی ده‌وڵه‌مه‌ن و مه‌يل په‌يوه‌ندی ديرن، وه‌لی ئه‌و په‌نا نه‌يرن بڕه‌سنيده‌يانه‌ ئه‌و نيازه‌يليانه‌، له‌لايگ تريشه‌و مه‌رمانيگ فريه‌ ده‌وڵه‌مه‌نيش هه‌ن له‌ڕوی داراييه‌و، وه‌لی چمانی نه‌دارن و وشكن له‌ سه‌رخستن كيشه‌ی پيكهاته‌گه‌مان.

ئه‌وه‌ك من دوينمه‌ی ك ده‌وڵه‌مه‌نه‌يل فه‌يلی وه‌ل ئه‌و توانايی و دارايی ماددی و زانستيه‌، وه‌لی مه‌ترسييگ ديرن له‌ پشتگيری كيشه‌گه‌يان، وه‌ل ئه‌وه‌يشا دوينيده‌يان زياده‌ڕه‌وی ئه‌كه‌ن له‌ په‌يوه‌سبوينيان وه‌ لاڵكيان و مه‌زڵوميه‌ت وه‌پيه‌و فيشتر له‌وه‌ك تام تيه‌ڵی و بيبه‌شيگه‌ی كردگه‌، ئمجا له‌ی رويه‌و ناونيشانه‌يل ديارييگ هه‌س له‌و ناوه‌يله‌و نيشانه‌ی وجوود ده‌وڵه‌مه‌نه‌يل ئه‌وسای فريه‌يگه ك وه‌ ماڵ و حاڵ به‌شداری كردن له‌ كيشه‌گه‌مان وه‌بی ئاسه‌وار وه‌ردوام ئاينده‌يی.‌

ئيمه‌ ئه‌وه‌ له‌ هوير ناوه‌يم ك گشت ئه‌و ريكخرياگ و حزب و ده‌زگاو كه‌سايه‌تيه‌يله‌ ك رووژه‌يليگ كار له‌وه‌ر زينگه‌وكردن كيشه‌ی كورده‌يل فه‌يلی كرديان نيازيان پاك نه‌وی له‌ی بواره‌و ك هه‌رچه‌نی ماف ره‌وايگه‌، ئه‌وانه‌كيش سه‌بردار بوين و وه‌رگه‌ی ئه‌و وه‌رپرسيارێتيه‌ گرتن و هه‌ر كه‌سيگ وه‌گووره‌ی قه‌واره‌و توانی خوه‌ی هه‌وڵ دا له‌ی رويه‌و، ئه‌وه‌ بيگومان جی ريز و شانازی وه‌رده‌واميگه‌، ك هه‌رچه‌نی كار ئه‌و ريكخرياگ و ده‌زگايه‌يله‌ وه‌ره‌و كزی و كه‌می روی كردگه‌ وه‌ بوونه‌ی بيده‌سڵاتی مه‌ردم و خاوه‌نه‌گه‌ی و نه‌وين پشتگيری، وه‌لی وه‌ل ئه‌وه‌يشا ئمڕوو بايه‌سه‌ ئيمه‌ هوير له‌ كيشه‌گه‌مان بكه‌يم ك سه‌رده‌ميانه‌سه‌و نه‌بايه‌د ئازةيتبار بويم دوياى مردن و له‌هويره‌وبردنی، ك ئه‌گه‌ر‌ رووشنهوير وه‌ قه‌ڵه‌م و ده‌وڵه‌مه‌ن وه‌ توانای و سياسی وه‌ ئه‌زموونی له‌ی پيكهاته‌مانه‌ نه‌جويليه‌يد، ئه‌وه‌ هويچ مه‌هانه‌يگ تر نه‌يرن له‌ تومه‌تباركردن يه‌كتری وه‌ دريغيكردن و له‌ هه‌مان وه‌خت وه‌ دريژايی ساڵه‌يليش ئه‌وانه‌ك كار كردنه‌ نه‌گه‌ردينه‌سه‌ شوون ئه‌و مه‌هانه‌يله‌ ك دريغيكه‌ره‌يل روی له‌لی ئه‌كه‌ن، به‌ڵكوو ئه‌وان وه‌رده‌وامن له‌بان ئه‌ركه‌يليان ئه‌را پيشكه‌شكردن خزمه‌ت.

وه‌ل ئه‌و هه‌مگه‌ ره‌شبينيه‌يل وه‌ديكرياگيشه‌ له‌و راسيه‌يله‌ تيه‌ڵه‌، ئه‌گه‌ر بايگ په‌نديش وه‌ربگريم له‌لی ئه‌وه‌ بيگومان ئه‌تويه‌نيم له‌ی چوارچيوه‌ ده‌ربچيم و خوه‌مان قورتار بكه‌يم له‌ قه‌بولنه‌كردن يه‌كتری جوور ئه‌وه‌ك بويه‌ هووكار كه‌فتنمان.

ئمجا گشت تاكه‌يل پيكهاته‌گه‌مان شاعير و نويسه‌ر نيه‌ ك مه‌هانه‌ له‌ خوه‌مان بگريم ئه‌را ته‌نيايی و خه‌ريكبوين وه‌ كاره‌و، ئه‌تويه‌نيم بويشيم نزيك له‌ راسی ك بڕيگ له‌ ئه‌زموون شكه‌ستخواردگ ديريم ك مايه‌ی ئوميد نيه‌، يه‌يش بيجگه‌ هه‌ر فه‌رامووشكردنيگ له‌لايه‌ن مه‌ردمان تر، دی دريغيمان وه‌بوونه‌ی وازهاوردن كار ده‌سه‌جه‌ميه‌ ك هه‌وه‌جه‌ وه‌پی ديريم فيشتر له‌ په‌سه‌نكردن ي ره‌ته‌وكردن كه‌سه‌يل تر.

وه‌رجه‌ نزيكه‌ی مانگيگ له‌ڕی ئاماده‌بوينمان ئه‌را دانيشتنيگ تاوتويكاری له‌باوه‌ت كيشه‌ی فه‌يليه‌يل قسه‌ی شاره‌زايگ كه‌فته‌ هويرم ك وت: فه‌يليه‌يل ريككه‌فتن و يه‌كگرتن نه‌يرن و زياده‌ڕه‌وی ئه‌كه‌ن وه‌ ئه‌وه‌ك له‌ ده‌وڵه‌مه‌نه‌يل به‌غدان وه‌ل مه‌سه‌له‌يل تر.

قسه‌ی ئه‌و شاره‌زا بايه‌سه‌ وه‌ دقه‌ته‌و هوير له‌لی بكريه‌يد و بايه‌سه‌ وه‌ به‌ڵگه‌وه‌ پيشكه‌ش بكريه‌يد، بيجگه‌ ئه‌وه‌ بايه‌سه‌ چشته‌يليگ ئه‌را رای گشتی ئاشكرا بكه‌يم تا مه‌سه‌له‌گه‌ يه‌كلاوه‌ بكريه‌يد وه‌ تايبه‌ت ده‌سنيشانكردن شيواز زياده‌ڕه‌وی و جياوازی ناونيمان، ك باوه‌ڕم ئه‌وه‌سه‌ بايه‌سه‌ له‌ چوارچيوه‌ی مێژووی پيكهاته‌گه‌مان مامڵه‌ وه‌ليا بكه‌يم له‌وه‌خت خوه‌ی نه‌ك ئمڕوو، ئه‌ويش له‌وه‌ر ئه‌وه‌ك تا بوار فراوانتر نه‌يه‌يم و كه‌سيگ تر بايد و تومه‌تبارمان بكا وه‌ كاره‌يل تر هاوشيوه‌، ك من له‌يرا ئويشيم ئی دريغيه‌ ئاشكراس له‌لايه‌ن خاوه‌ن كيشه‌گه‌و يه‌كه‌مجار دريغيه‌ له‌ من و تن و باقی مه‌ردم، وه‌ ئه‌وه‌ك ده‌وڵه‌مه‌نه‌يلمان ئه‌را ئيمه‌ نيين، چوينكه‌ ئيمه‌ ده‌وڵه‌مه‌ن نه‌يريم.

عه‌لی حسێن فه‌يلی

ج . أ