به‌رزه‌خ كورد و به‌هه‌يشت عبادى

عه‌لى  حسێن فه‌يلى

شه‌فه‌ق نيوز/ جاريگ تر له‌ساێ كه‌شيگ وه‌خياڵ نه‌هاتن و نه‌وين وژدان له‌لاى كۆمه‌ڵگاى ناوده‌وڵه‌تى خواست پڕ ته‌مه‌ن ساڵه‌ى كورد له‌ چه‌وه‌ڕيكردن بيهووش كريا، ئيجاريشه‌ هويچ كه‌سيگ ئه‌هيمه‌ت وه‌ سه‌بر كورد و خواسته‌ ساده‌گه‌ێ نه‌يا، ئمجا ئه‌وه‌گ روێ ئه‌ياد هاوردنه‌وه‌ى سايكس بيكۆ و سيڤه‌ره‌ وه‌ سه‌رده‌ميگ تازه‌، ملله‌ته‌يل هه‌قخورياگيش له‌ى جه‌هان ئاڵشتكاريه‌ زه‌خمه‌يليان كوليه‌ێده‌و له‌ساێ نه‌وين وژدان نه‌گوێڕياێ و سڕبوين داوه‌ته‌يل دادگه‌رانه‌.

 

كورده‌يليش باوه‌ڕدارن وه‌ ئه‌وه‌گ هه‌ر فكره‌يگ زوڵم دروس بكا دژ مافه‌يل ئاده‌ميزاده‌و ناخوازن موبايعه‌ى رژيمه‌يل فراوانكارى و ناچارى بكه‌ن له‌ عراق، عراقيش چشتيگ نه‌يرێد له‌ ئه‌زموونه‌يل تر پيشكه‌شى بكا مه‌گه‌ر گله‌وخواردن ئه‌را ته‌پڵ له‌ناوبردن وه‌جه‌م"جينۆسايد"و كوشتن و سزاى سه‌خت!

 

دوياى ئه‌نجامداين راپرسى كوردستان ئه‌وه‌ چه‌سپان ك جموجويل و خه‌بات سياسى وه‌ ته‌نيا خواسته‌يل ره‌واى ملله‌ت جيوه‌جى ئه‌كاو مافه‌يل بته‌ويگ له‌لى دروس ئه‌كاو گشت عراقيه‌يل باوه‌ڕ وه‌پى ديرن و يه‌يش چه‌سپان ك خه‌بات دژ زاڵمه‌يل حورمه‌ت و مافه‌يل ئه‌را ده‌ستوور و ئاينده‌ ئه‌را گشت هاووڵاتيه‌يل جيوه‌جى ئه‌كا.

 

وه‌ گووره‌ى تويڕه‌يى ئيسه‌ى ملله‌ت كورد و غه‌در هاورياێ فه‌رمانڕه‌وايه‌يل به‌غدا، تويه‌مه‌يليگ ئه‌را مافه‌يل هه‌س ك كاڵيه‌ێد، ته‌نانه‌ت سه‌روه‌خوه‌يى وه‌ده‌س ئه‌يه‌رێد له‌ وه‌رز دره‌و، وه‌لێ كه‌سانيگ هه‌ن دار زوڵم ئاو ئه‌يه‌ن له‌ خاكيگ ترسناك وه‌ ئاژاوه‌يى و قسه‌ فريه‌يى.

 

ناكووكى ناونى هه‌ولێر و به‌غدا له‌وه‌ ته‌مام ئه‌دێ ك بويچگترين مناڵيگ له‌ كورستان ئحساس وه‌ ريز و حورمه‌ت و ئازادى ئه‌كا فيشتر له‌ گه‌وراترين وه‌ساڵاچگيگ عراقى ك ته‌شويش له‌بانى كرياگه‌ له‌ساێ ده‌يان ساڵ له‌ زوڵم.

 

كورد له‌ خه‌بات وه‌رده‌واميان دژ فه‌رمانڕه‌وايه‌يل شوفێنى ريشگ متمانه‌و حورمه‌ت كوتان و جاڕس بوين له‌و فكره‌ ك حوكم ئه‌كا له‌به‌غدا، وه‌ ئه‌وه‌گ جه‌نگ له‌وه‌ر وڵاتيگ ئه‌كه‌ن به‌تاڵ له‌ جه‌نگه‌يل و پڕ يه‌كسانى و دادوه‌رى.

 

ئمجا ئه‌ى براى عه‌ره‌ب، ئه‌و نه‌ته‌وه‌ ك خه‌و وه‌ ئازادى و سه‌روه‌خوه‌ييه‌و ناوينێد نه‌ته‌وه‌يگه‌ مردگ! كورد سه‌رچه‌مانن وه‌ شووره‌يى زانن و ناچار جه‌نگ بكه‌ن وه‌خار مافه‌يليان، يه‌يش راسى هه‌ر كه‌س و ملله‌يگه‌، هه‌ر له‌وه‌ر ئه‌وه‌يش راسى به‌نه‌يل له‌ عبوديه‌ت ئه‌مام ئه‌دێ و راسى كورديش له‌ گش ريه‌يليگ ك هه‌ڵيانوژنێد له‌ ئازادى وه‌خاتر ره‌سين ئه‌را جيوه‌جيكردن مافه‌يلێ.

 

ئه‌ى براى عه‌ره‌ب، كورد هه‌وڵه‌يل فريه‌يگ دا له‌وه‌ر خاتر عراقيگ به‌تاڵ له‌ جه‌نگ و كيشه‌و كيشمه‌كيش نه‌ته‌وه‌يى و مه‌زه‌وى و خه‌باتيش له‌وه‌ر خاترى كرد، وه‌لێ چه‌وه‌ڕێ به‌خته‌وه‌ركردن گشت عراقيه‌يل له‌ساێ بار سه‌خت ك فه‌رمانڕه‌وايه‌يل له‌تى تويه‌م نه‌فره‌ت و جياجيايى له‌ ناونى هاووڵاتيه‌يليان ئه‌خه‌ن، چه‌وه‌ڕيكردن خراويگه‌و حكومه‌ت له‌ گشت بڕياره‌يلى بوو يا ره‌نگ هويچ ئاوه‌دانى و ئه‌مان و سه‌قامگيرييگ ناوينێد.

 

ئه‌ى برا، سه‌رۆك وه‌زيره‌يل عراق واده‌ى ئه‌وه‌دا به‌غدا و به‌سره‌ هاوشيوه‌ى هه‌ولێر وه‌پيان بكا! وه‌لێ كيشه‌گه‌ ها له‌ورا وه‌رجه‌ ئه‌وه‌گ ده‌س بكاده‌ ئاوه‌دانكردنه‌وه‌ى به‌غداو به‌سره‌ هه‌وڵ ويرانكردن سلێمانى و هه‌ولێر و دهۆك ئه‌ياد له‌ شيوه‌ى موسڵ و ئه‌نبار!!

 

ئى حكومه‌ته‌ له‌ وه‌ختيگ مڵاقد وشك بوود له‌ئاكام نه‌وين ئاو وه‌پيد ئويشێد ئاو حه‌رامه‌و له‌ شه‌وه‌يل تار وه‌پيد ئويشيد كاره‌با جايز نيه‌ و له‌ساێ نه‌وين ئاسايش كوشنده‌ى هاووڵاتيه‌يل ئويشيده‌پێد ئاسايش كفره‌ و له‌ساێ بازرگانيكردن وه‌ دين و دونيا له‌ڕێ دابه‌شكردن فه‌توايه‌يل ته‌كفيرى و بى وه‌رانوه‌ر ئويشێد لايه‌نگر ئايين و مه‌زه‌وه‌يل شك وه‌ هويچ چشتيگ ناكه‌ن و ده‌ركردن و كووچبه‌رييش له‌ى وڵاته‌ كاره‌سات نيه‌!

 

براى عه‌ره‌ب، هه‌ناى ك گشت ئى به‌ڵايه‌يله‌ ئه‌ياده‌ تويشد، دى چوين مه‌رز له‌ ملله‌تيگ ناوه‌سن موبايعه‌ى فه‌ن وفێل به‌غدا ناكا له‌ هه‌ر وه‌خته‌يليگ؟ و چوين ئاسمان كه‌و و پاك هه‌رێميگ فيدراڵى له‌ ئاسمان سيه‌ى ژيرساێ حوكمه‌يل ناڕه‌وا له‌ى وڵات پڕ مه‌ينه‌تيه‌ حه‌بس ئه‌كريه‌ێد.

 

چوين سزاى ملله‌تيگ ئه‌دريه‌ێد وه‌ بوونه‌ى مه‌شق مافيگ ئاسايى ئه‌را بڕيار چاره‌نويسى؟

 

براى عه‌ره‌ب، وه‌ نسبه‌ت ئه‌را ئيمه‌ مه‌رز هه‌تاهه‌تاس وه‌ به‌سياگى نامينێد و ئاسمانيش له‌ زيندانى له‌نگر ناگرێد و ملله‌ت سزادرياگيش تا ئه‌به‌د له‌ به‌رزه‌خ عبادى نامينێد، ئمجا هه‌ڵه‌په‌ڵه‌ قورتار خوه‌دان بكه‌ن له‌ به‌هه‌يشت ئى ريزداره‌.

عه‌لى حسين فه‌يلى