يه‌ك مه‌زارگه‌ ئه‌را دو ئايين!

شفق نيوز

 

ئمجا له‌ ده‌وروه‌ر شار كۆيه‌ وه‌ دويری ٣ كيلۆ مه‌تر مه‌زارگه‌يگ هه‌س، ك بويه‌س جی باوه‌ڕ موسڵمان و مه‌سيحيه‌يل ناوچه‌گه‌و په‌يڕه‌وكاره‌يل ئه‌و هه‌ردوگ ئايينه‌ ك ئاماژه‌ وه‌ ناوه‌گانيان كرديم ئه‌و مه‌رزاره‌ له‌لايان جی قه‌درو حورمه‌ته‌و وه‌ مه‌زارگه‌ی پيرووزيگ زاننه‌ی و رووژانه‌يش مه‌ردم سه‌ردانی ئه‌كه‌ن.

له‌يرا جوور ئه‌وه‌ك ئاشكراس ته‌نيا يه‌ك هووكار ئه‌و مه‌زارگه‌ لای موسڵمنه‌يل و مه‌سيحيه‌يل جيا ئه‌كاده‌و، ك ئه‌ويش ناو مه‌زاره‌گه‌س، چوينكه‌ له‌لای موسڵمانه‌يل وه‌ "شێخ محه‌مه‌د دێرێ" ناسرياگه‌و له‌لای مه‌سيحيه‌يليش وه‌ "مه‌ربێن قه‌ديشه"‌ ناسرياگه‌.

له‌ باوه‌ت مێژوو ئی مه‌زاره‌گه‌، دياره‌ هيمان وه‌ته‌واوی ئاشكرا نه‌ويه‌ ك كه‌س ناو ئی مه‌زاره‌ له‌ چ سه‌رده‌ميگ ژياگه‌و له‌بان په‌يڕه‌و كام ئايين ئاسمانی بويه‌، وه‌لی كه‌سه‌يليگ هه‌ن باس له‌وه‌ ئه‌كه‌ن ك ئی مه‌زارگه‌ هه‌ر له‌ كويه‌نه‌و وجوود داشتگه‌و مه‌ردم ناوچه‌گه‌و ده‌وه‌روه‌ری وه‌ پيرووز ته‌ماشای كرنه‌و چينه‌سه‌ ته‌وافی و مه‌راز له‌لی خواستنه‌.

ئمجا له‌يرا موسڵمان و مه‌سيحيه‌يل، هه‌ر يه‌كيگ له‌ليان ئه‌و مه‌زارگه‌ وه‌ هن خوه‌يان زانن، وه‌لی دوير له‌ كينه‌ت و هيمان تائيسه‌يش هويچ گرفتيگ له‌ ناونيان په‌يا نه‌ويه‌ له‌ی باوه‌ته‌و و هويچ وه‌ختيگ له‌ پيرووزكردن ئه‌و مه‌زارگه‌ كه‌مه‌و نه‌كرياگه‌ له‌لايه‌ن مه‌ردم موسڵمان و مه‌سيحيه‌يل ناوچگه‌.

ئی مه‌زارگه‌ له‌ وه‌خت ئه‌نفالكردن ملله‌ت كورد، رژيم به‌عس ته‌قانه‌وه‌ی و خاپووری كرد، وه‌لی دويای ئازادی كوردستان و سه‌قامگيربوين مه‌ردم ناوچه‌گه‌، جاريگتر له‌لايه‌ن مه‌سيحيه‌يل و موسڵمانه‌يل سه‌رله‌نوو ئاوه‌دانه‌و كريا.

ئيسه‌يش دويای ئه‌وه‌ك جاريگتر ئه‌و مه‌زارگه‌ ئاوه‌دانه‌و بوی، پياگه‌يل ئايينی مه‌سيحی جوور مه‌تران و قه‌شه‌يل بريار ئه‌وه‌ دان ك گشت ساڵيگ يه‌كه‌م رووژ جومعه‌ دويای جه‌شن هه‌ڵسانه‌وه‌ بكريه‌يده‌ رووژ مه‌ربێنه‌ی قه‌ديشه‌و گشت مه‌سيحيه‌يل كوردستان و شاره‌يل تر عراقيش سه‌ردان ئه‌و مه‌زارگه‌ بكه‌ن و ڕی و ڕه‌سم ئايينی له‌تی ساز بكه‌ن و هه‌ميشه‌ مقه‌يه‌تی له‌لی بكريه‌يد چ له‌لايه‌ن مه‌سيحی يا موسڵمانه‌يله‌و.

ره‌نجده‌ر ئاواره‌

سه‌رچه‌وه‌/ ماڵپه‌ڕ كۆيسنجه‌ق