چاڵه‌گه‌ی موسڵ، ئه‌و شوونه‌گ دويای داعش ناو په‌يا كرد

شفق نيوز

مه‌ردم ناوچه‌گه‌ باس له‌وه‌ ئه‌كه‌ن و ئويشن: ئه‌گه‌ر خواستيد بچيده‌ ناوچه‌ی خه‌سفه‌ له‌وه‌ رخد نه‌چێد گوم بويد، چوينكه‌ هه‌ر له‌دويره‌و بوو ته‌رم كيشيده‌د وه‌ره‌و لای و ئه‌گه‌ريش دڵيگ پوڵاين داشتويد ئه‌تويه‌نيد گورج ته‌ماشای بكه‌يد وه‌رجه‌ ئه‌وه‌ك سه‌رد گيژ بدێ.

چاڵه‌گه‌ی موسڵ وه‌ڕاسی مه‌ترسيداره‌ و شوونيگه‌ فريه‌ قه‌يز و پڕ له‌ تاوان ئنسانی ك له‌ سه‌رده‌م هاوچه‌رخ له‌ وه‌رانوه‌ر عراقيه‌يل ئه‌نجام درياگه‌. ئی شوونه‌ وه‌ دويری ٢٠كم كه‌فته‌سه‌ باشوور موسڵ له‌ناوچه‌ی عه‌زبه‌ ك چاڵ گه‌ورايگه‌و بويه‌سه‌ قه‌ورسان سه‌ره‌كی قوربانيه‌يل ده‌س ريكخرياگ ترۆريستی داعش و نزيكه‌ی په‌نج كيلۆ مه‌تريش له‌ جاده‌ی سه‌ره‌كی ناونی به‌غداو موسڵه‌و دويره‌و ته‌نانه‌ت له‌ ناونی ساڵه‌يل ٢٠٠٣ تا ٢٠١١يش ناوچه‌يگ گه‌رم پڕ كيشه‌ بويه‌.

ناوچه‌ی خه‌سفه‌ هه‌ر له‌ سه‌ره‌تای كۆنترۆڵكردن موسڵ له‌لايه‌ن داعشه‌و له‌ مانگ حزه‌يران گوزه‌يشت ناوداری فريه‌يگ په‌يا كرد، ئه‌وسا له‌يوا بڵاو كريا ك فيشتر له‌ ٢٠٠ ده‌سگيركرياگ زيندانی بادووش له‌وار گوله‌واران كريانه‌و ده‌يه‌ها له‌ليان خريانه‌سه‌ ئه‌و چاڵه‌و هويچ شوونه‌وارگيان نه‌مه‌ندگه‌.

وه‌لی چه‌كداره‌يل داعش له‌وه‌ر ئه‌وه‌ك ئه‌و چاڵه‌ پڕه‌و بكه‌ن له‌ی دوياخره‌ چه‌ن سه‌ياره‌يگ بارهه‌ڵگر و دار و كوچگ فريه‌يگ فڕه‌ دانه‌ ناوی، ك وه‌گووره‌ی قسه‌ی مه‌ردم شايه‌ت له‌وه‌ رخيان چيه‌ ك دويای له‌باربردن ده‌وڵه‌ته‌گه‌يان له‌ی نزيكه‌يله‌ خوه‌يان فڕه‌ بدريه‌نه‌ ناو ئه‌و چاڵه‌.

خاڵس جومعه‌

ج . أ