راده‌ى پێشكه‌فتن له‌هه‌رێم كوردستان

شفق نيوز

له‌بان سینه‌ى هاووڵاتیه‌یل عراقى وه‌ كورد و عه‌ره‌ب و گشت كه‌مینه‌یلى لاچى و هه‌ناسه‌ى خوه‌شى هه‌ڵمژین و مزگانى خه‌یر وه‌پیان دریا له‌سایه‌ى رژیم دیموكراسى، هه‌ر له‌وه‌یشه‌و هه‌رێم كوردستان وه‌ هه‌وڵ و ته‌قلاى پیاوه‌یل نیشتمانپه‌روه‌ر و دڵسووزه‌یلى كه‌فتنه‌ هه‌وڵ وه‌دیكردن ئه‌وه‌ك ئازادى و دیموكراسى توایده‌ى له‌جیاى ئه‌و هه‌مگه‌ زه‌ره‌ده‌ ك وه‌ هاووڵاتیه‌یل كورد ره‌سى له‌ زوڵم و جه‌ور.

 

 

وه‌خت ئه‌وه‌ هات ژیان تازه‌یگ هه‌ڵوژنن پڕ له‌ دادگه‌رى و یه‌كسانى و مقه‌یه‌تیكردن له‌ ریز و حورمه‌تیان، وه‌ل ئه‌وه‌یشا هه‌رێم كوردستان گه‌ردیه‌ شوون وه‌به‌رهاوردن و ئاوه‌دانكردن و خاسه‌وكردن شوونه‌واره‌یلى له‌گشت هه‌رێم و په‌یكردن ئابوورى له‌بان بنه‌ماى بته‌ویگ  له‌وه‌ر خاتر گه‌شه‌داین وه‌هه‌رێم جوور نیشتمانیگ كورد له‌تى دڵخوه‌ش بوود، تا ئه‌وه‌ بوى هه‌رێم بویه‌ قوبڵه‌ى گه‌شتیاره‌یل له‌ئاكام ئه‌و سه‌قامگیرى ئاسایشه‌ ك له‌تى وجوود دیرێد وه‌ل ئه‌و راده‌ى پیشكه‌فتنه‌ ك كه‌فێده‌ وه‌رچه‌و، هه‌ر له‌وه‌ر ئه‌وه‌یش بویه‌ نموونه‌یگ له‌وه‌رچه‌و گشت جه‌هان، یه‌یش له‌وه‌ختیگ ك وزاره‌ت كاروبار خارجیه‌ى بریتانى هه‌رێم كوردستان وه‌ خاڵ رووشنایگ زانست له‌ زووان لۆرد هاویل وه‌زیر خارجیه‌گه‌ى.

 

ئه‌وسا ملله‌ت كورد له‌ بار سه‌ختیگ ژیان بردیانه‌ سه‌رو تویش مه‌ویسى و مه‌ینه‌تیه‌یل فره‌یگ هاتن و قوربانیه‌یل فره‌یگیش دان له‌سه‌رده‌م حكوومه‌ته‌یل یه‌ك له‌شوون یه‌ك عراق، وه‌لى هه‌رێم كوردستان ئیسه‌ گامه‌یل فره‌یگ بڕیه‌ له‌په‌ره‌سه‌ندن و گه‌شه‌كردن وه‌تایبه‌ت له‌ڕوى ئابووریه‌و، یه‌یش بیجگه‌ ئه‌وه‌ك حكوومه‌ت كوردستان هه‌وڵ جددى ده‌ێد له‌كیشان نه‌خشه‌یگ ستراتیجى باوه‌تى له‌ سیاسه‌ت خارجیه‌ى خوه‌ى وه‌ل ده‌وڵه‌ته‌یل جه‌هان له‌وه‌ر خاتر دروسكردن و بته‌وكردن په‌یوه‌ندیه‌یلى وه‌ل ده‌وڵه‌ته‌یلا، هه‌ر له‌وه‌ر ئه‌وه‌یش دوینیم ك چوین په‌یوه‌ندیه‌یل خوه‌ى وه‌ ده‌وڵه‌ت یه‌كگرتگ بریتانى بته‌وه‌و كردگه‌ له‌بواره‌یل ئابوورى و بازركانى و رووشنهویرى و زانست و خاسه‌وكردن تواناى پیشه‌كاره‌یل كورد وه‌ گووره‌ى به‌رنامه‌یلى وه‌ل ئه‌و ده‌وڵه‌تا.

 

بیجگه‌ ئه‌وه‌یش ئه‌نجوومه‌ن وه‌زیره‌یل هه‌رێم له‌ دانیشتنیگى بریار جیوه‌جیكردن یاساى ده‌زگاى باڵه‌وداین ته‌یاره‌یل مه‌ده‌نى دا له‌هه‌رێم ك كارى خاسسازى ده‌سڵات و ریكخستن و وه‌ڕیه‌وبردن ته‌یاره‌خانه‌یله‌، وه‌ل ئه‌وه‌یشا بڕیاردا ك وزاره‌ت جیوازكردن له‌ حكوومه‌ت هه‌رێم كوردستان وه‌ ریككه‌فتن وه‌ل حكوومه‌ت مه‌ركه‌زى پرووژه‌ى په‌یوه‌سكردن خه‌ته‌یل ئاسن ئه‌نجام بیه‌ن له‌ناونى هه‌رێم و باقى شوونه‌یل تر عراق و جه‌هان. یه‌یش بیجگه‌ پرووژه‌ى وه‌به‌رهاوردن و چاره‌سه‌ركردن كه‌م وكوڕیه‌یل وه‌ ئامانج كارئاسانى و دابینكردن ده‌رفه‌ت زیاتر له‌بوار وه‌به‌رهاوردن و ئاوه‌دانى له‌ هه‌رێم كوردستان.

 

له‌یرا بایه‌سه‌ یه‌یش بخه‌یمنه‌ ڕوى ك حكوومه‌ت هه‌رێم له‌ بوار كه‌رت كشتوكاڵییش هه‌وڵ خاسیگ داگه‌ وه‌ گووره‌ى پشتگیریكردن زه‌ویكاڵ و جفتیاره‌یلى وه‌ ریژه‌ى 15% له‌ چوارچیوه‌ى بودجه‌ى وه‌كاربریاگى، ك ئى ریژه‌یشه‌ وه‌به‌راورد وه‌ل ساڵ گوزه‌یشت به‌رزتره‌و بویه‌و ئه‌و پشتگیریه‌ ره‌سیه‌سه‌ 65 ملیار دینار و له‌ بودجه‌ى ساڵ 2013یش زیاتره‌و بوود، یه‌یش ماناى ئه‌وه‌سه‌ حكوومه‌ت هه‌رێم گرینگى ده‌ێده‌ كشتوكاڵ وه‌ شیوه‌یگ راسكانى و هه‌ر له‌وه‌ر ئه‌وه‌یش خولیگ له‌ دهۆك واز بوى و نزیكه‌ى 20 رینماییده‌ر كشتوكاڵى له‌تى به‌شدارى كردن، ك ئامانج له‌ى خوله‌ ئه‌وه‌ بوى په‌ره‌ بدریه‌ێد وه‌ به‌هره‌ى رینماییده‌ره‌یل كشتوكاڵى وه‌شیوه‌ى زانستى و كرده‌وه‌یى و هه‌ر له‌وه‌ر ئه‌وه‌یش شاره‌زایه‌یل تایبه‌تمه‌ند له‌ى بواره‌ ك له‌زانكۆى تكساس ئه‌مریكیه‌و هاتوین ئه‌را هه‌رێم ده‌رس ده‌وره‌گه‌ گرتنه‌ مل ئه‌را هووكاره‌كردن رینماییده‌ره‌یل كورد له‌بوار كشتوكاڵى وه‌ ئامانج زیایكردن به‌رهه‌م.

 

بیگومان هه‌رێم كوردستان شوون پایه‌داریگ ئه‌را خوه‌ى دیارى كرد له‌ جه‌هان، ك یه‌یش خوه‌ى له‌ سیاسه‌ته‌ خاجیه‌گه‌ى دیه‌و، وه‌ به‌ڵگه‌ى ئه‌وه‌ك مه‌سعود بارزانى سه‌رۆك هه‌رێم كوردستان نامه‌یگ ده‌سنویس له‌ باراك ئۆباماى سه‌رۆك ئه‌مریكا وه‌رگرت و داره‌ى ده‌س قونسوڵ گشتى تازه‌ى ئه‌مریكى له‌هه‌رێم له‌وه‌خت پیشوازیكردنى له‌ مه‌سعود بارزانى له‌ هه‌وارگه‌ى سه‌ڵاحه‌دین، ك ئه‌و نامه‌ جه‌خت له‌بان له‌یه‌كڕه‌سینه‌وه‌ى هاوبه‌ش كرد له‌ناونى هه‌ردوگلا، هه‌ر له‌وه‌ر ئه‌وه‌یش قونسوڵ ئه‌مریكى وت: وجوود قونسوڵخانه‌ى گشتى وڵاته‌یل یه‌كگرتگ له‌ هه‌رێم زه‌مانه‌ت و ئومید ملله‌ت كوردستانه‌ له‌ساى ئى په‌یوه‌ندیه‌یل بته‌وه‌.

 

وه‌ل ئه‌وه‌یشا بریار دریا له‌بان داناین پارچه‌ زه‌وییگ ئه‌را دروسكردن باره‌گاى قونسوڵخانه‌ى گشتى ئه‌مریكى له‌هه‌ولێر پایته‌خت، ك یه‌یش گامیگ تره‌ له‌ بته‌وبوین په‌یوه‌ندیه‌یل دبلۆماسى له‌ناونى هه‌رێم كوردستان و ئه‌مریكا.

 

له‌ هه‌مان وه‌خت لایه‌ن رووشنهویرییش له‌هویره‌و ناوه‌یم ك حكوومه‌ت هه‌رێم كار له‌بان هاوكاریكردن هه‌ر پشتگیریگ رووشنهویرى ئه‌كا وه‌ ئامانج په‌ره‌داین و گه‌شه‌كردن رووشنهویرى له‌ كوردستان، وه‌ى جووره‌ تویه‌نیم بویشیم هه‌رێم كوردستان رووژ وه‌ڕووژ زیاتر خه‌ریك پیشكه‌فتنه‌و بویه‌ نموونه‌ى رووشنیگ له‌ جه‌هان.

 

محه‌مه‌د عه‌لى سه‌ماوى

 

 

ج. ا