قرمیان له‌ ژیان هاوبه‌ش بى مه‌مه‌ر نییه‌!

شفق نيوز

ك خوازیار ژیان هاوبه‌شن وه‌ل كوردا، وه‌لى له‌راسى ئى جووره‌ مكوڕبوینیگ له‌باوه‌ت مه‌سه‌له‌ى ژیان هاوبه‌ش له‌چوارچیوه‌ى وڵاتیگ و له‌ژێر ساى فه‌رمان حكوومه‌ت ناوه‌ندى بى ئامانج و بى مه‌مه‌ر نییه‌!

 

هه‌میشه‌ سیاسه‌ت داگیركار و دیكتاتۆریه‌ت دویر بویه‌ له‌ هه‌ق و ئازادیه‌یل ئاده‌میزادو هویچ ده‌ستووریگ ئنسانى له‌ى رویه‌و په‌یڕه‌و نه‌كردگه‌و ته‌نیا تواستگه‌ ده‌سه‌ڵات خوه‌ى بچه‌سپنیدو زه‌فتكردن خاك و كلتوور و رووشنهویرى و فه‌رهه‌نگ  نه‌ته‌وه‌یل تر ئامانج سه‌ره‌كى بویه‌ ئه‌را ده‌سه‌ڵات داگیركار ئه‌را تاواننه‌وه‌ى ئه‌و نه‌ته‌وه‌ى ژیرده‌سه‌ له‌ناو خوه‌یان و له‌باربردن كلتوور و مێژووه‌گه‌ى.

 

هه‌ر له‌وه‌ر ئه‌وه‌یش دوینید فره‌جار مێژوو جوور كه‌سه‌یگ نابینا بویه‌ وه‌تایبه‌ت له‌ هه‌ناى كوردو ئه‌و ملله‌ته‌یله‌ ك بى ئاگا بوینه‌ له‌ راسى رویداگه‌یل و دى وه‌ دروو شایه‌تى له‌بان هه‌ر شوڕش و چالاكى و ئازایه‌تییگ داگه‌، وه‌ل ئه‌وه‌یشا دوینید فره‌جاریش مێژوو كپه‌و كریاگه‌و ده‌سڵات سته‌مكار نه‌یشتگه‌ ئه‌و مێژووه‌ خوه‌ى بایگه‌ زووان و قسه‌ بكا، ئمجا ماڵویرانى و كاولكارى كوردیش له‌وره‌ بویه‌ ك مێژوو هویچ وه‌ختیگ ئى ملله‌ته‌ وه‌ گه‌ورایى و سه‌روه‌خوه‌یى نه‌یه‌و هه‌میشه‌ جوور ملله‌تیك بویچگ ته‌ماشاى كردگه‌.

هه‌ر له‌وه‌ر ئه‌وه‌یش كورد له‌وه‌ر زوڵم و سته‌م فره‌یگ له‌لى تاویانه‌سه‌ ناو نه‌ته‌وه‌ى عه‌ره‌ب و فارس و تورك، دى له‌وه‌ختیگیش ئه‌و نه‌ته‌وه‌یله‌ ته‌قالا ئه‌را ئه‌وه‌ كردنه‌ كورد بكه‌نه‌ به‌شیگ له‌ جه‌سه‌ى خوه‌یان بیگومان له‌وه‌ر ژیان هاوبه‌ش نه‌ویه‌، به‌ڵكوو له‌وه‌ر ئه‌وه‌ بویه‌ نه‌ك كورد رووژیگ له‌ڕووژان داواى مێژوو و جوگرافیایگ جیاو سه‌روه‌خوه‌ى بكا!!

 

له‌یره‌ قرم عه‌ره‌ب و نه‌ته‌وه‌یل تر داگیركار ده‌ركه‌فید، ك له‌وه‌ر خوه‌شه‌ویسى كورد ژیان هاوبه‌ش هه‌ڵنه‌وژاننه‌و ئاشكرایشه‌ ك دوشمن سه‌رسه‌خت ملله‌ت كورد بوینه‌، به‌ڵكوو قرمیان له‌ ژیان هاوبه‌ش ئه‌وه‌سه‌ ك ئى ملله‌ت سته‌مدیده‌ هه‌ر له‌ژیرده‌سه‌یى و چه‌وسیان بمینیدو له‌بان خاك خوه‌ى ئازادو سه‌روه‌خوه‌ى نه‌ود.

 

ئمڕوویش ئه‌وه‌ك دوینریه‌ید و ئاشكراس به‌ش كورد له‌ پرۆسه‌ى سیاسى له‌وه‌خت ئازادكردن عراق له‌ 2003 تائیسه‌ ته‌نیا هه‌وڵ و ته‌قلاس ئه‌را وه‌ده‌سهاوردن هه‌قه‌یل ره‌واى، ك یه‌یش هه‌ق سروشتى خوه‌یه‌ جوور هه‌ر ملله‌تیگ تر له‌ساى ئه‌و هه‌قه‌یله‌ بژیه‌ید ك رووژگار فره‌یگ خوین و قوربانى ئه‌راى داو  له‌وه‌ر خاترى ده‌یه‌ها ساڵ ناهمى بوى له‌ژیان ئاسووده‌یى و سه‌رفرازى، وه‌لى وه‌ل ئه‌وه‌یشا حزب و لایه‌نه‌یل تر عه‌ره‌ب وه‌ حكوومه‌ته‌گه‌یانیشه‌و دگان وه‌و راسیه‌ نه‌نانه‌و هه‌ر وه‌ختى هساو ئه‌یه‌یده‌ پاى هه‌ق و چاره‌نویس" ژیان هاوبه‌ش" هه‌ڵوژنن و پا له‌بان ئى داخوازیه‌ داگرن و ئویشن ناخوازیم خاك عراق به‌شبه‌شه‌و بوود! چوینكه‌ خوه‌یان خاس زانن له‌ بنه‌ڕه‌ته‌و خاك عراق به‌شیگى وه‌ زوور لكیاسه‌ پیه‌و، ك ئیسه‌ ئاره‌زوو جیایى ئه‌كا، ماناى ئه‌وه‌سه‌ دى كورد بایه‌د بزانید ك عه‌ره‌ب وه‌ خاتر خوه‌شه‌ویسى كورد نییه‌ خوازیار ژیان هاوبه‌شه‌، به‌ڵكوو قرمیان له‌و ژیان هاوبه‌شه‌ بى مه‌مه‌ر نییه‌و مه‌ندنه‌وه‌ى كورده‌ له‌ مه‌ویسى و به‌دبه‌ختى.

 

جه‌ماڵ ئه‌ركه‌زاى