هونه‌ر هويره‌وكردن و قسه‌كردن
هويچ چشتيگ ئه‌وه‌نه‌ی وشه‌ی نه‌رم و بزگه‌خه‌نين و قسه‌ی شيرين و نيازپاكی ناتويه‌نيد وه ئاسانی بچێده ناو دڵه‌يله‌و، هه‌ر له‌وه‌ر ئه‌وه‌يش بايه‌سه فريه گرينگی وه‌و باوه‌ته بدريه‌يد و بكريه‌يده بنه‌مايگ سه‌ره‌كی له هه‌وڵ و گامه‌يلمان ئه‌را بونيادناين باڵه‌خانه‌ی ئه‌ميد و ئه‌زره‌ته‌يلمان، وه‌تايبه‌ت زانايه‌يل و مامۆستايه‌يل ئايينی ك بايه‌سه له وتاره‌يليان فريه ئاگادار بوون و نادێ له‌و ره‌وته ده‌ربچن.
يه‌كيگ له پاشايه‌يل فره‌نسا بريار قه‌يه‌غه‌كردن خوه‌يڕازانن و خوه‌يجوانه‌وكردن ژنه‌يل و پووشانن جنگ جوان و ته‌ڵاو مجه‌وهرات دا، ئه‌و بڕياره كاردانه‌وه‌ی گه‌ورايگ دروسكرد و ژنه‌يليش رازی نه‌وين بڕيار پاشا جيوه‌جی بكه‌ن و دی ده‌سكريا شكات و ناڕه‌زايه‌تی و تويڕه‌يی و خوته‌و بووڵه‌و له‌ناو شار بويه هه‌را و ده‌نگ ناڕه‌زايی به‌رزه‌و بوی، ژنه‌يل فيشتر له جاران خوه‌يان رازانن و ته‌ڵاو جوانی پووشان.
پاشا تويش ناڕه‌حه‌تی هات و نه‌زانست چه بكا، بڕياردا وه هه‌ڵه‌په‌ڵه دانيشتنيگ نائاسايی وه‌ل راويژكاره‌يل ئه‌نجام بيه‌يد، راويژكاره‌يليشی ئاماده‌بوين و گفتگوو ده‌س وه‌پيكرد، يه‌كيگ له راويژكاره‌يل پيشنيار په‌شيمانبوينه‌وه له‌و برياره كرد له‌وه‌ر خاتر به‌رژه‌وه‌ندی گشتی، يه‌كيگيانيش وت: نه‌خه‌ير، په‌شيمانبوينه‌وه نيشانه‌ی كزی و به‌ڵگه‌ی ترسه‌و بايه‌سه هيز خوه‌مان نيشانيان بيه‌يم.
راويژكاره‌يل بوينه دو به‌ش، به‌شيگيان وه‌ل په‌شيمانبوينه‌وه بوين و ئه‌و به‌شه‌گه‌يش دژ په‌شيمانبوينه‌وه، ئمجا پاشا وت: ئارام بگرن، ئارام بگرن..بچن دانای ئی شاره ئه‌رام بچڕن. دانای شاره‌گه هات و پاشايش باس كيشه‌گه ئه‌رای كرد، كابرای دانا وته پاشا: مه‌ردم گووش له‌ليد ناگرن ئه‌گه‌ر جه‌نابد هوير له‌و چشته بكه‌يد ك خوه‌د ئه‌خوازيده‌ی نه‌ك ئه‌وه‌ك ئه‌وان ئه‌خوازنه‌ی. پاشا وت: ئه‌ی چاره‌سه‌ر ئی كيشه چه‌س، ئايا په‌شيمانبوينه‌وه چاره‌سه‌ره؟ دانا وت: نا، وه‌لی برياريگ ده‌ربكه ئه‌را ئه‌و ژنه‌يله ك جوانن هه‌وه‌جه وه خوه‌يجوانه‌وكردن نه‌يرن، ئمجا برياريگ تايبه‌تيش ئه‌را ئه‌و ژنه‌يله ده‌ربكه ك ناشيرينن و ڕی وه‌پيان بدريه‌يد خوه‌يان بڕازننه‌و، چوينكه ئه‌يانه هه‌وه‌جه وه‌پی ديرن ئه‌را شاردنه‌وه‌ی ناشيرينی و چرچی سيماو روخساريان.
پادشا بڕياره‌گه ده‌ركرد، چه‌ن سه‌عاتيگ وه‌پی نه‌چی، ژنه‌يل ته‌ڵاو مجه‌وهه‌رات خوه‌يان دانان و هه‌ر يه‌كيگ له‌ليان له‌يوا ته‌ماشای خوه‌ی كردياد ك جوانه‌و هه‌وه‌جه وه خوه‌يڕازانن نه‌يريد. ئمجا كابرای دانايش وه پاشا وت: ئيسه فامستيد هه‌نای خوازياريد مه‌ردم گووش له‌ليد بته‌كنن و بريارد قه‌بوول بكه‌ن بايه‌سه وه‌گووره‌ی ئه‌قڵ ئه‌وان هويره‌و بكه‌يد، دی ئه‌وسا له ئاره‌زوو ئه‌وان ئه‌فاميد و ئه‌دێده ده‌روه‌چه‌يگ ئه‌را ئحساسيان.
قه‌ڵه‌م پرێس
ج . أ
