چه‌ له‌ خه‌ڵك كوردستان ئه‌خوازین؟

شفق نيوز

ئه‌وه‌ك له‌ده‌سیان هاتگه‌ دژ وه‌ ملله‌ت كورد كردنه‌سه‌ى، دى له‌هه‌ر بار و قوناغیگ چه‌ وه‌پیان كریاوید دریغى نه‌كردنه‌و چه‌كه‌یل قورس خوه‌یان له‌بان خه‌ڵك كوردستان تاقیه‌و كردنه‌، تا حوكم به‌عسیه‌یل دڕنده‌ ك زیاتر له‌(30)ساڵ جینۆساید كورد كردنه‌ له‌ كیمیاواران و ئه‌نفال ك هه‌ر رووژ یگ و ڕووفات به‌شیگ له‌لیان له‌ناوچه‌یل چووڵ و بیاوان بان مه‌رز عراق دوینریه‌نه‌و، یه‌یش بیجگه‌ كاولكردن ئاوایى و شاره‌یل كوردستان و ته‌قالاكردن ئه‌را لاوردن ناسنامه‌ى نه‌ته‌وه‌یى و پاكسازى ره‌گه‌زیمان.

 

كورد ئه‌زموون تیه‌ڵیگ دیرید له‌بان مێژووى سیه‌ى به‌عسیه‌یل و سوپاى عراق و سه‌ركوتكارى و هه‌ڵوێسته‌یل گوزه‌یشته‌یان وه‌رانوه‌ر وه‌ ملله‌ته‌گه‌مان. دامه‌زرانن فه‌رمانده‌یى ئۆپه‌راسیۆنه‌یل دجله‌ كاریگ نایاسایى و ناده‌ستووریه‌و له‌هه‌مان وه‌خت ژیرپاخستن ده‌ستوور و ریككه‌فتنه‌یله‌و لاداین عراقه‌ وه‌ره‌و حكوومه‌تیگ سه‌ربازى و ناچاركردنه‌ وه‌ زوور هێز له‌ عراقیگ تازه‌.

 

ئه‌وان له‌ى سه‌رده‌مه‌ ژیه‌ن، وه‌لى وه‌هه‌مان ئه‌قڵیه‌ت دیكتاتۆره‌یل گوزه‌یشت، ك جى داخه‌ بار ئاسایش عراق كریاسه‌ قوربان كیشمه‌كیشه‌یل سیاسى و بردن عراق وه‌ره‌و گوڵه‌م خوین و كنار جه‌نگیگ تایفه‌گه‌رى له‌ سه‌رده‌م و قوناغ دیموكراسیه‌ت و مه‌ده‌نیه‌ت و په‌ره‌داین وه‌ مه‌سه‌له‌ى هه‌قه‌یل ئاده‌میزاد و بنه‌ماو شیوازه‌یل ناوده‌وڵه‌تى له‌ بوار سیاسه‌ت حوكمدارى. ئیمه‌ گشتمان خاس زانیمن ك مه‌رام له‌ دامه‌زرانن ئى هیزه‌یل چه‌كدار ناده‌ستوورى دجله‌و كلكردن سوپا وه‌ره‌و ناوچه‌یل داوڕیاگ چه‌س. ئى فه‌رمانده‌ییشه‌ هاوشیوه‌ى فه‌یله‌ق(1، 5)سوپاى عراق رژیم به‌عسه‌ ك خوه‌یان وه‌ته‌نى تایبه‌ت بوى وه‌ كاروبار شمال، ك عه‌لى كیمیاوى وه‌رپرسیاریه‌تى سیاسى و سه‌ربازى ئى فه‌یله‌قه‌یله‌ گرتویده‌ مل، وه‌لى خه‌یاڵیان خاوه‌ جوور عه‌لى حه‌سه‌ن مه‌جید چه‌ بتوان له‌یوا بكه‌ن یا وه‌ مه‌رام خوه‌یان بچووده‌ سه‌ر. هه‌ر ئه‌و ئه‌فسه‌ر و پله‌داره‌یل سه‌رده‌م رژیم به‌عسه‌نه‌ ك ئیسه‌ هاوریانه‌سه‌و ئه‌را ناو سوپاو گشت دام و ده‌زگایه‌یل ئاسایش و وه‌رپرسیاریه‌تى وه‌پیان دریه‌ید وه‌ مه‌هانه‌ى ئه‌وه‌ك ئه‌زموون دیرن و شاره‌زان له‌ بواره‌گه‌، وه‌لى ئه‌زموون له‌ چه‌ دیرن؟ له‌ كیمیاواران؟ یا له‌ ئه‌نفال و كاولكردن كوردستان؟ یا به‌هره‌یى و شاره‌زایى له‌ سه‌ركوتكردن خه‌ڵك كوردستان و برایه‌یل شیعه‌ له‌ كه‌ربه‌لاو نه‌جه‌ف؟

 

بیگومان ئه‌وانه‌ ده‌سیان قرمزه‌ وه‌ خوین روڵه‌یل ئى ملله‌ت سته‌مدیده‌، ئه‌ى مه‌گه‌ر فه‌رماندار ئۆپه‌راسیۆنه‌یل دجله‌ له‌وه‌خت رژیم به‌عس پله‌ى عه‌مید روكن نه‌یاشت؟ ئه‌ى نه‌وتولشوجاعه‌ى سه‌دام نه‌یاشت؟؟

 

ئه‌وان له‌ خوه‌یانا كورد ناڕیك و نه‌گونجیاگ و پشت شكن یه‌كترى و یه‌كده‌نگ نین، وه‌لى دانیشتن سه‌رۆك هه‌رێم كوردستان وه‌ل گشت لایه‌نه‌یل سیاسى كوردستان و ته‌نانه‌ت برایه‌یل ئۆپۆزسیۆنیش په‌یام ته‌بایى و یه‌كهه‌ڵویستى مه‌سه‌له‌ نه‌ته‌وایه‌تیه‌گه‌مانه‌ له‌ وه‌رانوه‌ر هه‌ر ئه‌گه‌ریگ . دى ئایا سه‌رۆك وه‌زیره‌یل عراق چه‌ تواید له‌ گیان كورد؟ چه‌ تواید له‌ پێشمه‌رگه‌؟ ئه‌یه‌ بوى پاداش ئه‌و خاسیه‌یله‌ له‌وه‌رانوه‌ر كورد؟ دیاره‌ نان كورد شووره‌ هه‌ر كه‌سیگ خوه‌یده‌ى قه‌درى نازانید، مالكى له‌سه‌رده‌م ئۆپۆزسیۆن هه‌میشه‌ له‌ كوردستان قاپى ئه‌ڕاى واز بوى و خوه‌ى ئۆپۆزسیۆن بوى دژ وه‌ به‌عس، وه‌لى ئیسه‌ سوپاى له‌لیمان زینگه‌و ئه‌كاو ده‌یه‌ها كه‌س له‌ به‌عسیه‌یل تیه‌ریده‌ رز سوپاو فه‌رمانده‌یى دجله‌ وه‌پیان دامه‌زرنید!.

 

به‌فرین حسێن خه‌لیفه‌

ج. ا