نووڕستنیگ وه‌ره‌و ئاینده‌یگ به‌تاڵ له‌ تون وتیژى دژ ژن له‌ ماڵ كورد

شفق نيوز

"نووڕیمنه‌ ئاینده‌یگ به‌تاڵ له‌ تون وتیژى دژ وه‌ ژن" ك شوماره‌ێگ له‌چالاكه‌یل و كه‌سایه‌تییه‌یل جووراوجوور له‌تى ئاماده‌ بوین.

 

له‌ى سمیناره‌ سافره‌ جه‌میل حافز چالاكوان و ئه‌ندام رابته‌ى ژنه‌یل عراقى و بوشرا ئه‌لئه‌مین وه‌ڕێه‌وبه‌ر جیوه‌جیكار رادیۆ مه‌حه‌به‌ له‌به‌غدا ته‌وه‌ر سمیناره‌گه‌ خستنه‌ وه‌ر باس.

 

سافره‌ جه‌میل حافز، هه‌ر له‌ ساڵه‌یل په‌نجاى سه‌ده‌ى وه‌رینه‌و چالاكوانیگ سیاسى و مه‌ده‌نیه‌، ك كار وه‌ل نه‌زیهه‌ دلێمى یه‌كه‌مین ژنه‌ وه‌زیر كردگه‌ له‌ ریكخریاگ وه‌رگرى له‌ هه‌ق ژنه‌یل.

 

حافز له‌ قسه‌یلى باس نه‌ته‌وه‌یل یه‌كگرتگ كرد له‌ڕوى تون وتیژى دژ ژنه‌یل و باسیگیش مێژوویى له‌بان ئه‌و سته‌م و چه‌وسیانه‌ كرد ك هاتگه‌سه‌ تویش ژنه‌یل عراقى و نموونه‌یگیش له‌و سته‌مه‌ له‌ شعر مه‌لا عه‌بود كه‌رخى خوه‌ندنه‌و ك له‌وه‌خت سه‌ره‌تاى دامه‌زرانن ده‌وڵه‌ت عراقى وتگه‌سه‌ى، وه‌ ئه‌وه‌ك شعره‌گه‌ باس له‌ هه‌ڵكه‌فت و خه‌بات وه‌ردوام ژن عراقى ئه‌كا.

 

حافز دیدیگ به‌راوردكارى باس كرد له‌ناونى بار ژنه‌یل له‌ عراق و ژنه‌یل ئۆرپا، ك گوایا ناڕه‌حه‌تكردن و قسه‌ى ناشرین ده‌رهه‌ق وه‌ ژن ماناى تون وتیژیه‌، وه‌ل ئه‌وه‌یشا ره‌خنه‌ له‌و  هویروڕا گرت ك داب ونه‌ریت كه‌نه‌ هووكار دویاكه‌فتن ژن.

 

هه‌ر له‌وه‌ر ئه‌وه‌یش حافز خوازیار بڕیگ چاره‌سه‌ر بوى ئه‌را مه‌ینه‌تیه‌یل عراق و وت: بایه‌سه‌ هووز و چینه‌یل حورمه‌ت ژن بگرن و هه‌ق خوه‌ى له‌ په‌روه‌رده‌ بیه‌نه‌ پى هه‌ر له‌ عومر مناڵییه‌و گرفت بخریه‌یده‌ وه‌رده‌م ئه‌وانه‌گ ریگرن دویه‌ته‌یلیان بچنه‌ خوه‌ندنگاو له‌هه‌مان خوازیار جیوه‌جیكردن یاساى ناسنامه‌ى ساڵ 1959 بوى.

 

دویاى ئه‌ویش، بوشرا ئه‌لئه‌مین وه‌ڕیه‌وبه‌ر رادیۆ مه‌حه‌به‌، به‌راورد ناونى گوزه‌یشته‌ى ژن و ئیسه‌ى كرد له‌عراق و له‌هه‌مان وه‌خت باس له‌وه‌ كرد ك ساڵ 1979 وه‌دویاوه‌ عراق له‌ژن كریاسه‌ دوزه‌خ و تون وتیژى له‌تى حاڵه‌ت تایبه‌تیگ داشتگه‌و په‌یوه‌س بویه‌سه‌ دیكتاتۆریه‌ت و بار خراو وڵاته‌گه‌.

ئه‌مین ئاماژه‌ وه‌ یه‌یش كرد ك گشت كوومه‌ڵگاى عراقى تون وتیژى ئه‌نجام ده‌ن و حورمه‌ت نه‌گرتن و تون وتیژى بویه‌سه‌ چشتیگ ئاسایى و به‌شیگ له‌ ژیان ژنه‌یل و هه‌ر له‌وه‌ر ئه‌وه‌یش بایه‌سه‌ پشت وه‌ نه‌وه‌ى جایه‌ڵ جوانه‌یل بووه‌سیم ئه‌را چاره‌سه‌ر دیارده‌ى تون وتیژى.

 

ئه‌مین هووكار بڵاوبوینه‌وه‌ى دیارده‌یل تون وتیژى دژ ژن له‌ عراق برده‌و ئه‌را بڕیگ  هووكار و له‌وانه‌یش: داب ونه‌ریته‌یل كوومه‌ڵایه‌تى و مه‌سه‌له‌ى وه‌كارهاوردن دینى و نزمى ئاست رووشنهویرى و زانستى له‌عراق و دویاكه‌فتن په‌روه‌رده‌ له‌ خوه‌ندنگایه‌یل عراقى و په‌یوه‌سبوین وه‌ گوزه‌یشته‌و هه‌یواین له‌ ئیسه‌.

 

ئه‌مین له‌لاى خوه‌یه‌و خوازیار جیوه‌جیكردن ئه‌و یاسایه‌یل خواسته‌ بوى ئه‌را مقه‌یه‌تیكردن له‌ ژن و بنبڕكردن كاره‌یل زوڵم و سته‌م له‌ كوڕ و دویه‌ته‌یل له‌ خوه‌ندگایه‌یل و چالاكه‌وكردن نه‌خش رێكخریاگه‌یل مه‌ده‌نى له‌وه‌ر خاتر هانداین كوومه‌ڵگا وه‌ره‌و پێشكه‌فتن.

 

ج. ا