ژنێگ ك 57 ساڵ له‌يه‌ووه‌ر داواێ مافه‌يل كورد كرد

شفق نيوز

 

ڕەوشەن بەدرخان؛ له‌ تێکۆشەره‌یل ناودار کورده ک له‌ ساڵ “١٩٠٩.ز” له‌ باکوور کوردستان له‌داڵگ په‌ێا بويه‌؛ ڕه‌وشه‌ن به‌درخان دویه‌ت “ساڵح بەدرخان”ه‌ ک‌ باپیرێ براێ بەدرخان، پاشاێ گەوراێ میر بۆتان بویە.

 

وه‌ختێگ عوسمانییەيل بنه‌ماڵه‌ێ بەدرخانه‌یل لە باکوور کوردستان ده‌رکردن، باوگ رەوشەن ناچار بویە وه‌ل خێزانەگه‌ێ بچووده‌ ‌شار ده‌مشق و لەوره‌ نیشتەجێ بوود؛ هه‌ر له‌و سه‌رده‌میشه‌ خاتوو ڕەوشەن لە مه‌درسه‌يل ده‌مشق ده‌سکرده‌ ده‌رس خوه‌نین و تا پله‌ێ‌ مامۆستایی دریژه‌ وه‌ ده‌رس خوه‌نین خوه‌ی دا و بویه‌ مامۆستا لە پەیمانگاێ ژنه‌یل ده‌مشق.

 

ساڵ ١٩٣٥ ژیان هاوسه‌ری وه‌ل “جەلادەت بەدرخان” نانه‌يه‌كه‌و و تا شانزە ساڵ وه‌ خوه‌شی وه‌ل یه‌کا ژیان و لە ساڵ ‌١٩٥١ جەلادەت ھاوسەرێ کووچ‌ دويایین کرد؛ خاتوو رەوشەن که‌سایه‌تييگ نیشتمانپه‌روه‌ر بوی و له‌ دریژه‌ێ ژیانێ ھەڵوێسته‌يل و چالاكيه‌يل نەتەوەیی فره‌ێگ له‌ خوه‌ێ هيشتگه‌سه‌ جێ‌، لەوانە لە ساڵ ١٩٥٧ بویه‌سه‌ نوێنەر کورد لە کۆنگرەێ (دژ ئێمپرالیزم) له‌ یۆنان؛ ھەرچەن ‌له‌و کۆنگره‌ ٦ کورسی ئه‌ڕا نوێنەره‌یل کورد دیاری کردوين، وه‌لێ دوياخر وه‌ خاتر رێلێگرتنیان تەنیا خاتوون ڕه‌وشه‌ن جوور نوێنەر گشت کوردستان و جوور ژنێگ خەباتگێڕ کورد لە کۆبوونەوه‌یل ئەو کۆنگرە بەشداری کرد و وە توندی لە دژ ئیمپریالیزم و دابەشکردن خاک کوردستان هه‌ڵوێست خوه‌ێ نیشان دا و باس مافەيل ڕەواێ نەتەوەێ کورد کرد؛ ھەرچەن لە لایەن تورک و عەرەبەيل شۆڤێنیەو ھێرش کریا‌ سەرێ، وه‌لێ ئەو گووش له‌ هه‌ڕه‌شه‌ و دژایه‌تی ئه‌وان نه‌ته‌كان و دريژه‌ وه‌ قسەیل خوه‌ێ داو داخوازییەيل نەتەوەێ کورد پێشکەش وە کۆنگرگرەگە کرد.

 

خاتوو رەوشەن بەدرخان رووژ ١٩٩٢/٦/١ کووچ ‌دويایین کرد و رووژ دوياتر لە شام وە خاکسپاريا.

‌ڕەوشەن بەدرخان بێجگە لە زووان کوردی، زووانه‌یل عەرەبی و تورکی وه‌ خاسی زانستگه‌ و شاره‌زايیش لە زووانه‌یل فەرەنسی و ئنگلیزی و ئەڵمانی داشتگه‌.

 

لە بوار هه‌ڵه‌وگه‌رداننيش سێ كتاو وە زووان عەرەبی چاپ کردگه‌‌:

1- صفات من الادب الكردي – بیروت 1954، 71 لاپه‌ڕه‌س.

2- غرامي و الامي – هه‌ڵه‌وگه‌رداننه ‌له‌ توركییه‌و‌ له‌ ساڵ 1957 له‌ دمەشق چاپكرياس ‌و 85 لاپه‌ڕه‌س.

3- مذكرات امراة- له ‌دمه‌شق چاپكرياس ‌و 140 لاپه‌ڕ‌‌ه‌س.