وه‌ختیگ مه‌سله‌حه‌ت بكه‌فێده‌ نواى ئنسانیه‌ت

شفق نيوز

له‌شاریگه‌وه‌ ئه‌را شاریگ تر جیاوازى دیرى، ئنجا وه‌گووره‌ى داب ونه‌ریت و سروشت ئه‌و كوومه‌ڵگایه‌یله‌ مینیگ ك چاره‌نویس په‌یوه‌ندیه‌یل ده‌سنیشان ئه‌كاو دى وه‌ گووره‌ى وه‌سه‌رچگن وه‌ختیش كاریگه‌رى راسه‌وخۆ دیرى له‌شیواز ئاڵشتكردن ئه‌و په‌یوه‌ندیه‌یله‌. هه‌ر له‌وه‌ر ئه‌وه‌یش مه‌به‌س سه‌ره‌كى له‌ى باوه‌ته‌ زیاتر ده‌سنیشانكردن ئه‌و خاڵه‌یله‌سه‌ ك په‌یوه‌ندیه‌یل كوومه‌ڵگاى خوه‌مان ئه‌وسا چوین بویه‌و ئیسه‌ چوینه‌.

ئاشكراس ئه‌وسا ئه‌و په‌یوه‌ندیه‌یله‌ ك وجوود داشت په‌یوه‌ندیه‌یل بته‌ویگ بوین و لایه‌نه‌یل خاس ئه‌و په‌یوه‌ندیه‌یلیشه‌ فره‌ترین خوه‌شه‌ویسى دروسكردویگ له‌ناونى مه‌ردم و هاتوچووكردن یه‌كترى و ده‌سمیه‌تداین كه‌سه‌یل لیقه‌ومیاگ ك وه‌جووریگ له‌ گشت خوه‌شى و ناخوه‌شییگ وه‌ل یه‌كا بوین، یه‌یش وه‌و مانا ك ئه‌و جووره‌ په‌یوه‌ندیه‌یل كویه‌نه‌ له‌بان بنه‌ماى به‌رژه‌وه‌ندى دروس نه‌وین، به‌ڵكوو ئه‌و هووكاره‌یله‌ دروسى كردویگ  ك په‌یوه‌س بوین وه‌ دڵسووزى و خوه‌شه‌ویسیه‌وه‌. وه‌لى ئه‌و په‌یوه‌ندیه‌یل كوومه‌ڵایه‌تى ئمڕووه‌ دیاره‌ وه‌ره‌و كزى چووگ و مه‌ترسى فره‌یگ دیرى ئه‌را ئیسه‌و ئاینده‌، چوینكه‌ زوورم ئه‌و په‌یوه‌ندیه‌یله‌ ك دروس بوون زیاتر له‌بان بنه‌ماى به‌رژه‌وه‌ندیه‌، له‌وه‌ر ئه‌وه‌ یه‌یش چشتیگ نیه‌ بویشیم هه‌ر له‌خوه‌یه‌وه‌ دروس بویه‌، یه‌یش هووكار سه‌ره‌كى سستم سه‌رمایه‌دارى جه‌هانیه‌ ك له‌یوا له‌تاكه‌یل كوومه‌ڵگا ئه‌كا ته‌نیا له‌وه‌ر خاتر به‌رژه‌وه‌ندیه‌یل خوه‌یان كار بكه‌ن، ئنجا هه‌ر وه‌ختیگیش به‌رژه‌وه‌ندى كه‌فته‌ نواى كار ئنسانى، ئه‌وه‌ دى بزان ك ژیان وه‌ره‌و خراوبوین چوود.

ئه‌گه‌ر بایگ و ته‌ماشاى وڵاته‌یل پیشكه‌فتگ بكه‌یم، دوینیم وه‌هویچ شیوه‌یگ په‌یوه‌ندى كوومه‌ڵایه‌تى له‌تیان نه‌مه‌ندگه‌و فره‌ سه‌ردن له‌ هامشووكردن، ته‌نانه‌ت تا ڕاده‌یگ ك ژن و پیاویگ وه‌یه‌كه‌وه‌ ژیه‌ن ته‌نیا لایه‌ن غه‌ریزه‌یى وه‌ل یه‌كا جه‌میانه‌و ئه‌كا، یا له‌و شوونه‌یلیشه‌ ك كار له‌تى كه‌ن ته‌نیا مه‌سه‌له‌ى به‌رژه‌وه‌ندى خودى خوه‌یانه‌ ك په‌یوه‌ندى وه‌ل ئه‌و كه‌سه‌یلا دروس بكه‌ن ك وه‌لیانا كار كه‌ن، وه‌ ماناى ئه‌وه‌ك هویچ په‌یوه‌ندییگ  كوومه‌ڵایه‌تییان نه‌مه‌ندگه‌. هه‌ر له‌وه‌ر ئه‌وه‌یش دوینید كار كردیه‌سه‌ بان گشت كوومه‌ڵگایه‌یل ئنسانى له‌وڵاته‌یل جه‌هان.

ئیمه‌ وه‌رده‌وام له‌ زووان گه‌ورایه‌یله‌وه‌ ژنه‌فیم ك باس رووژه‌یل گوزه‌یشته‌ ئه‌ڕامان كه‌ن ك مه‌ردم له‌و روژگاره‌یله‌ چوین ژیان ساده‌و خوه‌شیگ بردنه‌سه‌ سه‌ر، وه‌لى ئیسه‌ گشت چشتیگ ئاڵشت بویه‌، ئنجا ئه‌گه‌ر بایگ و بویشیم ئه‌و ئاڵشتبوینه‌ له‌ ئه‌نجام پیشكه‌فتن دونیا ئه‌و په‌یوه‌ندیه‌یلیشه‌ ئاڵشت و كزه‌و بوینه‌ راس نیه‌، چوینكه‌ راستر ئه‌وه‌سه‌ ك له‌ ئه‌نجام به‌رژه‌وه‌ندى خودى ئه‌و په‌یوه‌ندیه‌یله‌ وه‌ره‌و كزى چن.

ئه‌گه‌ر بایگ و مه‌سه‌له‌گه‌ له‌یوا بچووگه‌ ڕییه‌وه‌، ئه‌وه‌ بیگومان له‌ئاینده‌ هویچ په‌یوه‌ندییگ نیه‌مینیگ ، ئنجا ئیمه‌ى كوردیش وه‌ تایبه‌ت خاوه‌ن كلتوور و داب ونه‌ریت تایبه‌ت خوه‌مانیم، وه‌لى وه‌ داخه‌و خه‌ریكه‌ په‌یوه‌ندیه‌یلمان وه‌ره‌و خراوى گام نه‌یگ ، هه‌ر له‌وه‌ر ئه‌وه‌یش نواگرتن له‌ى جووره‌ ژیان ئمڕووه‌و په‌سه‌نكردن ژیان جاران بووگه‌ ئه‌رك گشت كه‌سیگ خاس و نیشتمانپه‌روه‌ر، چوینكه‌ ئیمه‌ وه‌ك ئاده‌میزاد وه‌ په‌یوه‌ندیه‌یل كوومه‌ڵایه‌تیه‌وه‌ جوانیم، چوینكه‌ تاك وه‌بى كوومه‌ڵگا مه‌حاڵه‌و كوومه‌ڵگایش زه‌ره‌دمه‌ند بوود و ژیانیش ئه‌و خوه‌شى و مانایه‌ نیه‌مینیگ.