جاریگ تر به‌یت و بالویله‌ى هه‌ڵوژاردن!

شفق نيوز

 

ئیمه‌ ئه‌گه‌ر ته‌ماشاى یه‌كه‌م هه‌ڵوژاردن 2005 بكه‌یم، ئه‌و ئه‌زموونه‌ جیا بوى له‌ هه‌ڵوژاردنه‌یل تر دویاى ئه‌و ماوه‌ ك مه‌ردم له‌تى وه‌گشت ساده‌یى و ئومیدیگه‌و  روى له‌ سه‌ندووقه‌یل ده‌نگداین كردن وه‌خاتر ئه‌وه‌ك دى كووتایى وه‌ چه‌وسیان و زوڵم و كاولكارى باریه‌ید، وه‌لى وه‌چه‌واشه‌وه‌ تائیسه‌ چه‌ن جاریگ حكوومه‌ت دامه‌زریاو چه‌ن جاریگیش هه‌ڵوژاردن كریاو له‌ى عراقه‌ بیجگه‌ هه‌رێم كوردستان ك پیشكه‌فتن خاسیگ وه‌ خوه‌یه‌و دیه‌ هیمان له‌شوونه‌یل تر ناوڕاس و باشوور و خوه‌رئاواى عراق له‌ كیشمه‌كیش و ته‌قینه‌وه‌و ده‌رده‌سه‌رى زیاتر خشتیگ نه‌خریاسه‌ بان دیوار بنیاتناین و خزمه‌تگوزارییگ ئه‌را هاووڵاتى له‌ هویچ بواریگه‌و پیشكه‌ش نه‌كریاگه‌.

 

حزب و لایه‌نه‌یل سیاسى ته‌نیا له‌وه‌خت هه‌ڵوژاردن ملله‌ت خه‌نه‌ هویر، ته‌نیا له‌ى وه‌خته‌یله‌ نزیكن له‌ مه‌ردم، وه‌لى ئه‌گه‌ر بایمنه‌ پاى راسى وه‌ كرده‌وه‌ قه‌وڵه‌یلیان ئه‌نجام نه‌یانه‌ ك زویتر سه‌ر هاووڵاتى وه‌پى خه‌ڵه‌تاننه‌، ك یه‌یش مایه‌ى شوره‌یى و شه‌رمه‌زاریه‌ ئه‌رایان.

 

ئه‌گه‌ر ته‌ماشاى ره‌سم و دعایه‌ى كاندیدكریاگه‌یل بكه‌یم له‌ناو جاده‌و شوونه‌یل گشتى، دوینید دروشمه‌یلیگ له‌تى كه‌فیده‌ وه‌رچه‌و شایه‌ت خود خوه‌یانیش باوه‌ڕ وه‌پى نه‌كه‌ن، وه‌لى ئه‌وان توان وه‌و دروشمه‌یله‌ باوه‌ڕ وه‌ملله‌ت بارن و له‌ رووژ هه‌ڵوژاردن ده‌نگ وه‌پیان بیه‌ن، بیگومان ئمڕوو له‌ى عراقه‌ له‌ساى ده‌وڵه‌ت یاسا وه‌تایبه‌ت له‌ساى ده‌سڵاتدارێتى خود مالكى مه‌حاڵه‌ كه‌سیگ بتویه‌نید بیه‌ید له‌ سینه‌و بویشید من فڵان كار ئه‌نجام ده‌م و فڵانه‌ پرووژه‌ جیوه‌جى كه‌م، ئه‌یانه‌ گشتى قسه‌ى به‌تاڵه‌و هویچ تر، چوینكه‌ لایه‌نیگ نیه‌ ره‌زامه‌نى خوه‌ى نیشان داوید له‌بان ئه‌داى حكوومه‌ت و ره‌فتاره‌یلى له‌وه‌رانوه‌ر هه‌قه‌یل ره‌واى چین و تاكه‌یل كوومه‌ڵگا.

 

ئى ملله‌ت عراقه‌ فره‌ به‌دبه‌خت و سیه‌چاره‌ن، چوینكه‌ وه‌ل گشت هه‌وایگا شه‌ن كه‌ن و زوى كه‌فنه‌ كرابه‌رى یه‌كترى له‌ى جووره‌ حاڵه‌ته‌یلیگ . وه‌ل ئه‌وه‌یشا نوێنه‌ره‌یل ملله‌ت ك له‌بان ده‌نگ مه‌ردم ره‌سیه‌نه‌سه‌ پله‌و پایه‌ هیمان قه‌رده‌ كویه‌نه‌گه‌ نه‌یانه‌سه‌وه‌و داواى قه‌ردتریش كه‌ن له‌بانى، به‌ڵى ئه‌وان قه‌ردار ملله‌تن، یه‌یش وه‌و مانا ك هیمان قه‌وڵه‌یل كویه‌ن جیوه‌جى نه‌كردنه‌و له‌ زمه‌تیان مه‌ندگه‌و تیه‌ن وه‌بان ئه‌وه‌یشه‌و دروشم تازه‌ به‌رزه‌و كه‌ن و ئاواز خوه‌شخوه‌ش دانه‌ن ئه‌را ئه‌وه‌ك ئیجاریشه‌ جوور جاره‌یل تر  له‌ڕى ئه‌و به‌یت و بالویله‌و قه‌وڵ و درووه‌یل هه‌ڵوژاردنه‌و بڕه‌سنه‌ مه‌رام!

 

ئیمه‌ گشت وه‌ختیگ هایم وه‌ل ده‌نگداین و ئومیده‌واریم ك بتویه‌نیم له‌ساى دیموكراسى و ده‌سه‌وه‌ركردن هه‌قه‌یلمان بڕه‌سیمنه‌ خوه‌شگوزرانى و به‌خته‌وه‌رى، چوینكه‌ هه‌ڵوژاردن یه‌كیگ له‌ نیشانه‌یل ئازادى و دیموكراسى، وه‌لى له‌ى عراقه‌ مه‌سه‌له‌گه‌ جیاوازه‌، چوینكه‌ تائیسه‌یش مه‌ردم هویر له‌ ئاده‌میزاد شاره‌زاو شایسته‌ ناكه‌ن ئه‌را نوێنه‌رایه‌تى و كه‌س گونجیاگ نه‌خریاسه‌ شوون گونجیاگ مه‌گه‌ر وه‌ ده‌گمه‌ن، مه‌سه‌له‌گه‌ له‌یرا قاڵب هووزایه‌تى و حزبایه‌تى وه‌رگرتگه‌و یه‌یش ئه‌و غه‌ڵه‌ت گه‌وراسه‌ ك بایه‌سه‌ مه‌ردم فه‌قیر و خوه‌شباوه‌ڕ باجه‌گه‌ى بیه‌ن.

 

جه‌ماڵ ئه‌ركه‌وازى