ئه‌زره‌ت وه‌ ئه‌زره‌ت

شفق نيوز

  ئاده‌میزاد له‌وه‌ختیگ ك ئه‌یاده‌ دونیاو چه‌وه‌یلى وه‌ دیده‌ن ئى دونیا واز بوود تا رووژیگ مرید هویچ وه‌ختیگ دڵى له‌ ئه‌زره‌ت و ئاره‌زوو به‌تاڵ نیه‌ودو هه‌میشه‌ ها هووڵ ئه‌وه‌ك بڕه‌سیده‌ ئه‌و مه‌رامه‌ ك به‌شیگ تر له‌ ئه‌زره‌ته‌یلى جیوه‌جى ئه‌كا.

هه‌ر له‌وه‌ر ئه‌وه‌یش دوینیم فره‌جار مه‌ردمانیگ هه‌ن هه‌وڵ ده‌سخستن هه‌قه‌یل خوه‌یان ده‌ن و هویچ وه‌ختیگ ئه‌و به‌شه‌ ك كریاسه‌ نسیویان مایه‌ى ئاسووده‌كردن ئه‌زه‌ره‌ته‌یلیان نه‌ویه‌و هه‌ر وه‌و خاتریشه‌ جه‌زره‌وه‌ى فیشتر دانه‌ تا بتویه‌نن بڕه‌سنه‌ ئه‌و چشته‌و ده‌س له‌ چه‌مگى به‌ن بكه‌ن.

بیگومان هه‌ر كه‌سیگ و سفه‌ت و ره‌فتار جیاواز دیرید له‌ كه‌سه‌یل تر، ك تویه‌نیم بویشیم دیارترین ئه‌و سفه‌ته‌یلیشه‌ ئه‌زه‌رت و ئاره‌زووه‌، یه‌یش هه‌ق گشت كه‌سیگه‌و كه‌س نه‌بایه‌د حاشا له‌ى تاسه‌و خواسته‌ بكا، وه‌لى جارجاریگ دوینیم فریه‌یگ له‌و ئه‌زه‌ره‌ته‌یله‌ بوونه‌ مه‌حاڵ و چنه‌ خانه‌ى ناهمى و نا دیده‌نیه‌و، هه‌ڵبه‌ته‌ یه‌یش هووكار خوه‌ى دیرید و مه‌رزداره‌، چوینكه‌ كه‌سه‌یلیگ هه‌ن له‌ ماڵ مه‌ردم خوه‌ن و به‌ن، كه‌سه‌یلیگیش هه‌ن باج ناهمى و به‌دبه‌ختى ده‌ن.

له‌ وڵاتیگ جوور عراق ك هه‌میشه‌ میلكان حه‌سره‌ت كاڵ و ده‌رده‌سه‌رى و گرفته‌یل جوراوجوور بویه‌ وه‌ دریژایى ساڵه‌یل فریه‌یگ ، دوینیم ئه‌و ئه‌زره‌ته‌یله‌ ك له‌ دڵ زوورم مه‌ردمه‌گه‌ى كاڵیاگه‌، هیمان هه‌ر ناته‌سه‌ به‌ر و له‌ساى چه‌وه‌ڕیكردن بى ئاكام ژیه‌ن و رووژ له‌دویاى رووژ شوونیان بته‌وتر بوود له‌ خانه‌ى ره‌نج و نائومیدى.

مه‌رگه‌سات و ماڵویرانى و شوونه‌وار جه‌نگه‌یل و مه‌سه‌له‌ى داگیركارى و تایفه‌گه‌رى له‌ى عراق فره‌ نه‌ته‌وه‌و فره‌ ره‌گه‌زه‌ كیشه‌ى بى كووتایگه‌و گشت ئه‌زره‌ته‌یلیگ خاكه‌سه‌ر كردگه‌و خواست و هه‌وه‌جه‌ى ئى ملله‌ته‌یل سته‌مدیده‌ ئه‌زره‌ت وه‌ ئه‌زره‌ت بوینه‌و خه‌رمان حه‌سره‌ت له‌لى جه‌م كردنه‌و هه‌میشه‌ له‌جیاى ساڕیژكردن زاخ ترش و تیژ كریاسه‌ بان زه‌خمه‌یل پڕ له‌ژان و هویچ ده‌سڵاتیگ نه‌تویه‌نستگه‌ ره‌زایه‌ت مه‌ردمه‌گه‌ى له‌تى وه‌ده‌س باریدو هه‌میشه‌ ئى مه‌ردم بیتاوان و جه‌وركیش كریانه‌سه‌ ئاگردوى به‌رژه‌ندى ته‌كڕه‌وى و تونڕه‌وى و تایفه‌گه‌رى.

ئنجا ئایا تاكه‌ى ئى ماڵویرانى و بى ئه‌زره‌تیه‌ وه‌رده‌وام بوود له‌ساى ئه‌وانه‌ك خه‌یر و به‌یر ئى وڵاته‌ نانه‌سه‌ گیرفان و گووش نایه‌نه‌ هه‌وه‌جه‌و ئه‌زه‌ره‌ته‌یل ئى ملله‌ت شه‌كه‌ت و جه‌فاكیشه‌، ك به‌شیگى له‌ساى نه‌دارى و ژارى ژیه‌ن و به‌شیگیشى شام شه‌و نه‌یرن؟ یه‌یش بیجگه‌ ئه‌وه‌ك عراق وه‌ وڵات یه‌تیمه‌یل تاریف كریاگه‌و بیجگه‌ مه‌ترسى مه‌رگ و كرده‌وه‌ى ترۆریستى و ته‌قینه‌وه‌یل رووژانه‌ له‌ى ساڵه‌یل دویاخر وه‌ناو ئازادى و دیموكراسیه‌ ك جوور ده‌ردوبه‌ڵایگ چنگ ناسه‌ قورگ ئه‌زره‌ته‌یل و خنكانه‌سه‌ى.

وه‌لى جوور ئه‌وه‌ك پیشینه‌یل وتنه‌"له‌ى ستوین تا ئه‌و ستوین ئه‌له‌فه‌ره‌ج" به‌شكه‌م خوداوه‌ند په‌روه‌ردگار وه‌ به‌زه‌یى خوه‌ى ئى ملله‌ت هه‌ڕه‌شه‌ له‌لیكریاگ عراقه‌ له‌ خه‌م و مه‌ینه‌تى قورتار بكاو ئاشتى و ئاسووده‌یى باریده‌وه‌و ئه‌زه‌ره‌ت ئه‌زره‌تمه‌نه‌یلیش له‌ساى بار ئاسایش و سه‌قامگیرى جیوه‌جى بوود.

ج . عه‌لیمرى