مه‌ينه‌تی كورده‌يل فه‌يلی وه‌ل كوردستانا

شفق نيوز

سروشت تاكه‌يل وه‌سه‌به‌ب وه‌زع ئارام و سه‌قامگير و ژيان ئاسايی هه‌ريم كوردستانه‌وه‌ له‌شوون ئه‌و ئه‌زموون سه‌ركه‌فتگ و تاريخيه‌ ك تويه‌نست بووگه‌ ناوچه‌يگ ئارام له‌ناوخود عراق ، يه‌يش وه‌تايبه‌ت له‌ شوون ساڵه‌يل ١٩٩١ وه‌دوياوه‌ ك گشت ده‌زگايه‌يل حكوومی و ئه‌منی و مه‌ده‌نی كوومار ترسناك له‌تی كيشياوه‌ .

ئه‌و گويڕانكاريه‌ وه‌تايبه‌ت چين جايه‌ڵ جوانه‌يل گرته‌وه‌ ك مه‌به‌س له‌ليان له‌ساڵه‌يل هه‌يشتا سه‌ده‌ی گوزه‌يشت وه‌دوياوه‌ ئه‌را ئه‌وه‌ك وه‌ئازادی بژيه‌ن له‌سايه‌ی چه‌رخ تازه‌و تا رميان رژيم ، بيجگه‌ ئه‌وه‌يش گويڕانكاری له‌ديد سياسی و ئايدۆلۆجی پارته‌يل كوردی له‌شوون وچان جه‌نگاوه‌ره‌يليان و بيده‌نگی تفه‌نگ و وه‌رگرتن جڵه‌و ده‌سڵات و كاركردن جددی ئه‌را دامه‌زرانن ده‌ستوور و دروسكردن ده‌زگايه‌يل حكوومی هه‌ريم ك ئه‌ويش بيگومان له‌شوون رميان رژيم به‌عس و تارووژ ئمڕوو ك خه‌ريك چوينيه‌تی مامڵه‌كردنن وه‌ل عراق ديموكراتی تازه‌ وه‌گووره‌ی رژيميگ فيدراڵی .

ئه‌و قوناغ و ئه‌و وه‌زعه‌ بويه‌ مايه‌ی په‌ره‌سه‌ندن رووح نه‌ته‌وه‌يی كوردستانی له‌لای چين جايه‌ڵه‌يل وه‌شيوه‌يگ فراوانيگ ، ئه‌ويش وه‌سه‌به‌ب خوه‌شه‌وه‌يسی فكر نه‌ته‌وه‌يی و دوير له‌ فشاره‌يل ده‌روينی و ده‌سڵاتدارێتی و كاريگه‌ری جياخوازی ك تواس وه‌ زوور خوه‌ی بخه‌يگه‌ ناو جاده‌ی كوردستانی ، بيگومان ئه‌ويش له‌وه‌ر خاتر وه‌ديهاتن خه‌ويگ كويه‌ن ئه‌را دامه‌زرانن ده‌وڵه‌تيگ كوردستانی سه‌روه‌خوه‌يی ، يه‌يش بويه‌ سه‌به‌بيگ ئه‌را دروسكردن ديواريگ وه‌فرين وه‌ل كورده‌يل فه‌يليا وه‌سه‌به‌ب وجووديان له‌ ناوچه‌يل ده‌يشت هه‌ريم ، ئه‌ويش بيجگه‌ ئه‌وه‌ك كورده‌يل فه‌يلی وه‌زعيگ پڕ له‌كيشه‌ داشتن و ريگه‌ی ناونيان دويره‌و كه‌فت له‌ڕوی په‌يوه‌ندی كوومه‌ڵايه‌تی و فكری و رووشنهويری ، وه‌ل ئه‌وه‌يشا چشته‌يل فره‌يگ بويه‌سه‌ سه‌به‌ب ئه‌هميه‌ت نه‌داين وه‌ مه‌سه‌له‌ی كورده‌يل فه‌يلی و بيجگه‌ دريغيكردن له‌لايه‌ن ئی چينه‌وه‌ له‌دراسه‌تكردن كاروان تاريخ رووشنايگ هاوبه‌ش و نوڕستن ئه‌را لاپه‌ڕه‌يل پاك كورده‌يل فه‌يلی هه‌ر له‌سه‌ره‌تای دامه‌زرانن جموجويل كوردايه‌تيه‌وه‌ تا رووژ ئمڕوو وه‌ل ئه‌و هه‌مگه‌ خه‌بات حزبی و رووح وه‌رگيريكردنه‌ له‌وه‌خته‌يل ده‌سڵاتدارێتی رژيم وه‌رين ، گشت ئه‌يانه‌ كاريگه‌ری خراويگ كرده‌ بان په‌يوه‌ندی برايانه‌و يه‌كڕه‌گه‌زی وه‌ل كورده‌يل فه‌يليا .

فه‌لسه‌فه‌ له‌فامستن قه‌وراه‌ی نه‌ته‌وه‌يی و ده‌سنيشانكردن ريڕه‌و فكری و په‌روه‌رده‌كردن به‌راورد يا مقارنه‌ی هه‌ر په‌يمانه‌ يا قياسيگ وه‌ل نه‌ته‌وه‌يل ترا بووگه‌ سه‌به‌ب ده‌رچگن له‌ ئايدۆلۆجی و تونڕه‌وی و دروسكردن ناحه‌زه‌يل نه‌ته‌وه‌يی و كه‌مه‌ كه‌مه‌ تاره‌سيگه‌ كيشمه‌كيش ره‌گه‌زی وه‌رده‌وام . به‌ڵگه‌يل فره‌يگيش هه‌س له‌ی باوه‌ته‌وه‌ ، چوينكه‌ له‌ی دوياخره‌ دياره‌يگ ناوناين ئاشكرا بوی جوير ئه‌وه‌ك وه‌كورده‌يل فه‌يلی وتيان (عه‌ره‌به‌يل) ك ئه‌ويش له‌لايه‌ن چين جايه‌ڵه‌يل ئی وه‌خته‌وه‌ ژنه‌فيه‌يگ و مامڵكردن وه‌ل كورده‌يل فه‌يليا وه‌ك كورد پله‌ دو له‌ڕوی ئنتماوه‌ ، ك وه‌بی هه‌ق هساويلن كريه‌يگ و يه‌يش ئشاره‌ت ترسناكيگه‌و حاڵه‌تيگ له‌وه‌ربه‌س و ناكووكی دروس كه‌يگ و هيليگ كورده‌يل فه‌يلی هس وه‌ دڵته‌نگی و نائوميدی بكه‌ن و ئه‌و په‌يوه‌ندی ره‌گه‌زی و براييه‌ له‌ناو بچووگ و دويره‌وكه‌فتن ئاشكرايگ بكه‌فيگه‌ ناونی كورده‌يل و له‌هه‌مان وه‌خت واقع كوردی دابه‌ش بووگ ئه‌را به‌شه‌يل يا چين چينه‌و بووگ يا بووگه‌ سه‌ره‌تايگ ئه‌را نه‌هيشتن شه‌ريحه‌يگ له‌ كورده‌يل ره‌سه‌ن ، وه‌ل ئه‌وه‌يشا وه‌ك نه‌خوه‌شييگ شيرپه‌نجه‌ يا سه‌ره‌تانيگه‌و روی كه‌يگه‌ لاشه‌ی كورد ، ئه‌يه‌ بيجگه‌ ئه‌وه‌ك لاداينيگه‌ له‌ ريڕه‌و يا فكره‌و ئايدۆلۆجيه‌ت سه‌ركرده‌ی هه‌ميشه‌ زنگ و نه‌مر مه‌لا مسه‌فای بارزانی و له‌هه‌مان وه‌خت داگيركردن و له‌كه‌داركردن تاريخ كورد وه‌گشتی و فه‌يلی وه‌ تايبه‌ت و كزه‌وبوين هه‌ڵويسته‌يل و هه‌قه‌يل نيشتمانی و سياسی ، وه‌ل ئه‌وه‌يشا بووگه‌ مه‌هانه‌يگ ئه‌را كينه‌ت له‌دڵه‌يل و ناحه‌زه‌يل كورد و دويريش نيه‌ كاره‌گه‌ روی له‌كاره‌سات بكه‌يگ .