له‌ كۆسۆفى و ئه‌سمه‌ر قورتار بویمن، ئیسه‌ نوره‌ى ئه‌ڵه‌مداره‌

شفق نيوز

تا ئیسه‌ وه‌ته‌واوى نه‌كه‌فته‌سه‌ ژیر كۆنترۆڵ ده‌وڵه‌ت و جى نائومیدى و دڵه‌ڕاوه‌كى مه‌ردم بیده‌سڵات و هاووڵاتیه‌یله‌.

وه‌دریژایى 9 ساڵ له‌عومر عراق تازه‌ كاره‌ساته‌یل فره‌یگ رویدا له‌ناوڕاس و باشوور وڵات، یه‌یش ماناى ئه‌وه‌سه‌ هیمان داخ له‌دڵه‌یل و پاشمه‌نده‌یل به‌عس سته‌مكار و خوینمژ ئاز ئه‌وه‌ له‌تیان مه‌ندگه‌ گه‌رده‌لویلان و بشیوى له‌وڵاته‌گه‌ دروس بكه‌ن وه‌پشتگیرى بڕیگ له‌ده‌وڵه‌ته‌یل عه‌ره‌بى و هه‌رێمى ك پویل فره‌یگ وه‌پیانه‌و خه‌رج كه‌ن ئه‌را وه‌دیهاتن ئامانج و مه‌ندنه‌وه‌ى ده‌سڵاته‌یلیان له‌بان ته‌خت دكتاتۆریه‌ت، وه‌و ئومیده‌ ك بتویه‌نن جاریگ تر هه‌مان رژیم وه‌ وه‌رگ تازه‌یگه‌و بارنه‌و، ك هه‌رچه‌نى ئیسه‌یش له‌ زوورم دام و ده‌زگایه‌یل هه‌مان بڕیار و یاسایه‌یل ئه‌و رژیم رمیاگه‌ په‌یڕه‌و كریه‌ێدو هیمان ته‌كڕه‌وى و تونڕه‌وى ده‌سى له‌یه‌قه‌ى ده‌سڵات نه‌ویه‌سه‌و، وه‌لى له‌گشت ئه‌یانه‌ خراوتر ئه‌وه‌سه‌ ك تائیسه‌یش نیه‌زانیم چاره‌نویس ئه‌و ترۆریست و كه‌نه‌كاره‌یله‌ ك ده‌سگیر كریه‌ن چوینه‌و چوین دوباره‌ تویه‌نن له‌ ته‌لبه‌ن تاوانبارى بچنه‌ ده‌یشت و ده‌س بكه‌نه‌ هه‌مان كارو كرده‌وه‌!! بیگومان یه‌یش پرسیاریگه‌و جواوه‌گه‌ى ها لاى وه‌رپس و حزبه‌یل!

گشتمان زانیم به‌دبه‌ختى و ماڵویرانى و نه‌وین خزمه‌تگوزارى ژیان ئاسووده‌یى له‌ مه‌ردم به‌غدا تیه‌ڵ كردگه‌و بیجگه‌ ئه‌وه‌یش قه‌ره‌باڵغى ناو جاده‌و خاڵه‌یل فره‌ى وشكانن و كه‌مى كاره‌با وه‌تایبه‌ت له‌ى وه‌رز و قرچه‌ى گه‌رمى تاوسانه‌ بویه‌سه‌ كیشه‌ى سه‌ره‌كى هاووڵاتیه‌یل ك وه‌ پلان چه‌سپانن هویچ یاسایگ مه‌حاڵه‌ بایده‌ بان تایم ئاسایى، دوینیم وه‌ل ئه‌وه‌یشا له‌ى رووژه‌یله‌ دزى و جه‌رده‌یى فره‌یگ سه‌رهه‌ڵداگه‌و مه‌ردمان جیاجیایگ جوور چه‌ته‌ ده‌سكردنه‌سه‌ ڕواكانن مناڵ و دزین سه‌یاره‌و چه‌پاوكردن ماڵ مه‌ردم و یه‌كیگ له‌و مه‌ردمان چه‌ته‌یلیشه‌ ناو خوه‌یان نانه‌نه‌سه‌"چه‌ته‌ى مراد ئه‌ڵه‌مدار"و زیاتر له‌ناوچه‌ى مه‌دائن سه‌ر وه‌شار به‌غداى پایته‌خت خه‌ریك كاره‌یل نائنسانى و ڕواكانن و چه‌ته‌یى و دزى و چه‌پاوكردنن، یه‌یش له‌وه‌ختیگ ئاشكرا بوى ك هیز ئاسایش عراقى چه‌ن كه‌سیگ له‌لیان ده‌سگیر كردن و ئاشكراى خوه‌یان كردن ك ئه‌یانه‌ چه‌ته‌ى ئه‌ڵه‌مدارن.

مه‌سه‌له‌ى ناوناین خوه‌یان وه‌"چه‌ته‌ى مراد ئه‌ڵه‌مدار"، له‌و زنجیره‌ فیلم توركى دوبلاژكریاگه‌ بریاگه‌ ك ناونیشانى"دووڵ گورگه‌یل – وادى الزئاب"ه‌و پاڵه‌وان ئه‌و زنجیره‌ فیلمه‌یلیشه‌ كابرایگه‌ وه‌ناو"مراد ئه‌ڵه‌مدار"و ده‌ور پاڵه‌وانیه‌تى و نه‌ترسى له‌تى دوینێد! هه‌ر له‌وه‌ر ئه‌وه‌یش دیاره‌ ئى چه‌ته‌یله‌ شانازى وه‌و ناوه‌ كه‌ن و ئامانجیان ئه‌وه‌سه‌ وه‌و ناوه‌ مه‌ردم رخه‌و بووه‌ن و یاخى بوون له‌یاساو ده‌ستوور ئنسانیه‌ت، هه‌ر له‌وه‌ر ئه‌وه‌یش ئویشیم له‌ كۆسۆفى و ئه‌سمه‌ر قورتار بویمن ئیسه‌ى نوره‌ى مراد ئه‌ڵه‌مداره‌!

ئنجا ته‌نیا چاره‌سه‌ریگ ئه‌را بنبڕكردن ئى جووره‌ تاقم و چه‌ته‌یلیگ ئه‌وه‌سه‌ ك سزاى دادگه‌رانه‌ له‌بانیان بچه‌سپیه‌ێدو یاساى دادوه‌رى له‌بانیان جیوه‌جى بكریه‌ێد تا جاریگ تر نه‌چنه‌ قه‌ره‌ى ئى چنه‌ كاریگه‌و، ولى فایده‌ى چه‌س له‌ى لاوه‌ ده‌سگیر كریه‌ن و له‌ولاوه‌ ئازاد كریه‌ن!

 

جه‌ماڵ ئه‌ركه‌وازى