كورده‌یل به‌غدا مه‌گه‌ر وه‌گڕ ئاگر نه‌ورووز داخ دڵه‌یلیان ساڕیژ بوود!!

شفق نيوز

نه‌زانن ك نه‌ورووز كورده‌وارى هیمان تام وله‌زه‌ت ئه‌وساى هه‌ر مه‌ندگه‌و ته‌نیا هس وه‌ ئه‌وه‌ بكه‌ن رووژ نه‌ورووز هه‌ر ئه‌وه‌ بوود ك جنگ تازه‌ بپووشن و بچنه‌ سه‌یرانگاو شوونه‌یل جوان و دڵڕفن و خه‌ریك هه‌ڵپه‌ڕگه‌و چووپى كیشان و خواردنه‌وه‌و كه‌یف و سه‌فا بوون، نه‌خه‌یر، ئیمه‌ گشتمان زانیم ئى عه‌یده‌ تاریخى فره‌ كویه‌نه‌و چووگه‌وه‌ ئه‌را سه‌رده‌م حوكمڕانى زه‌حاك زاڵم و سته‌مكار له‌وه‌ختى وه‌ مار بان شانیه‌وه‌ حوكم ناعه‌ده‌ڵات خوه‌ى نیشانداو زوڵم و سته‌م فره‌یگ له‌ مه‌ردم ژیر ده‌سڵاتى كردو ئه‌وه‌ بوى هه‌ر ڕووژ چه‌ن جایه‌ڵ جوانیگ كردیاگه‌ قوربانى ئاسووده‌یى خوه‌ى له‌وه‌ر ساقى و سه‌ڵامه‌تى لاشه‌ى، چوینكه‌ ئه‌و داستانه‌ باس دویرو دریژیگه‌و نیه‌توایم له‌یرا باسى بكه‌یم، وه‌لى ئیمه‌ مه‌به‌س باسه‌گه‌مان ئه‌وه‌سه‌ ك له‌گشت شوونه‌یل كوردنشین له‌ رووژ نه‌ورووز له‌ (21) ئادار مانگ (3)گشت ساڵیگ  یاد ئى عه‌ید كورده‌واریه‌ كریه‌یگ و هه‌ر ناوچه‌و شوونیگ تام و ڕه‌نگ خوه‌ى ده‌نه‌ نه‌ورووز له‌ڕوى هسكردن و گوزارشه‌وه‌.

ئیمه‌ زانیم عه‌ید نه‌ورووز وه‌ك عه‌یدیگ جه‌هانى ئاشكرا كریا له‌لایه‌ن ریكخریاگ (یونسكۆ)وه‌، یه‌یش ماناى ئه‌وه‌سه‌ ئى عه‌یده‌ له‌ڕاسى میرات گه‌ورایگه‌ ئه‌ڕا ملله‌ته‌گه‌مان مه‌نده‌سه‌جى، ك هه‌رچه‌نى ملله‌ته‌یل فره‌یگیش شان وه‌شان ملله‌ت كورد یاد عه‌ید نه‌ورووز كه‌ن جویر ملله‌ته‌یل ئیران و توركیاو پاكستان و ئازه‌ربایجان و هندستان و ......هتد، وه‌لى ئه‌گه‌ر بایمنه‌ پاى راسى و لاپه‌ڕه‌یل تاریخ به‌یمنه‌ یه‌كا دوینیم ك نه‌ته‌وه‌ى كورد وه‌گووره‌ى به‌ڵگه‌یل تاریخى، عه‌ید نه‌ورووز وه‌ عه‌یدیگ تاریخى و نه‌ته‌وه‌یى خوه‌ى زانیگ و له‌وه‌یش زیاتر ئه‌وه‌سه‌ ك ساڵانه‌ وه‌ كردنه‌وه‌ى ئاگر و  له‌ى ساڵه‌یل دویاخریشه‌ له‌وه‌ختى پیره‌مێرد شاعر نه‌ته‌وه‌یى شعر (ئه‌مڕۆژى ساڵى تازه‌یه‌ نه‌ورۆزه‌ هاته‌وه‌)دانا تیه‌كه‌ڵ وه‌و خوه‌شى و هه‌ڵپه‌ڕگه‌و شادیه‌ بوى و زیاتر حه‌ماسیه‌ت به‌خشا مه‌ردم ملله‌ت كورد له‌ سه‌رانسه‌ر كوردستان.

نه‌ورووز لاى فره‌ كه‌س ماناى تایبه‌ت و ریزو حورمه‌ت فره‌یگ دیریگ و ره‌سه‌نایه‌تى كویه‌ن كورده‌وارى هیمان وه‌پیه‌وه‌ مه‌ندگه‌و چه‌و دوشمنه‌یل وه‌پى كوور كریه‌یگ . ئه‌وه‌سه‌ له‌ به‌غداى پایته‌خت عراق رى وڕه‌سم نه‌ورووز جویر ئه‌وساى كورده‌وارى هه‌ر تام و له‌زه‌ته‌گه‌ى جارانى مه‌ندگه‌و له‌دڵ پاك و راسه‌قینه‌یگه‌وه‌ كورده‌یل به‌غدا گوزارش له‌لى كه‌ن و یادى پیرووز كه‌ن له‌شوونه‌یل جیایا ك هه‌رچه‌نى وه‌زع به‌غدایش وه‌ ته‌واوى روى له‌خاسى یه‌كجارى نه‌كردگه‌و هیمان ته‌قینه‌وه‌و توقانن له‌لى نه‌وڕیاگه‌، وه‌لى وه‌ل ئه‌وه‌یشا دوینید دویكه‌ڵ ئاگر نه‌ورووز له‌ناو جاده‌و شوونه‌یل كوردنشین به‌غدا وه‌ ئازادى وه‌ره‌و ئاسمان سه‌رفرازى به‌رزه‌و بوود و ریڕه‌و خوه‌ى گرته‌سه‌ وه‌ر، وه‌تایبه‌ت له‌ (جاده‌ى كفاح)كوردنشین.

ئه‌را ئى رى و ڕه‌سم پیرووزیشه‌ مه‌ردم فره‌یگ به‌شدارى جوانیگ وه‌ روحیه‌ت و هس پاك و ئنتماى كورده‌واریه‌وه‌ كه‌ن له‌ كردنه‌وه‌ى ئاگر نه‌ورووز، چوینكه‌ نه‌ورووز شوون تایبه‌تیگ دیریگ له‌ناو دڵ گشت كوردیگ ، وه‌تایبه‌ت له‌لاى ئه‌و كورده‌یله‌ ك وه‌راسى تیه‌نگ رى و ڕه‌سمه‌یل باوگ و باپیره‌یل كورده‌واریین، وه‌لى دوینید چه‌رخ چه‌پگه‌رد وه‌ مه‌یل و كامیان نیه‌شكیه‌یگه‌وه‌و ئه‌وه‌سه‌ مه‌گه‌ر ته‌نیا وه‌گڕ ئاگر نه‌ورووز داخ دڵه‌یل خوه‌یان ساڕیژ بكه‌ن و ته‌نیا چشتیگ ئه‌ڕایان مه‌ندویگه‌وه‌ له‌ باوانیان هه‌ر نه‌ورووزه‌.

نه‌ورووز له‌ڕوى زووانه‌وه‌ ماناى رووژ تازه‌یگ ده‌یگ ك چیمنه‌ ناو یه‌كم ساڵ تازه‌ى كوردیه‌وه‌و له‌ هه‌مان وه‌خت وه‌رچه‌رخان وه‌رزیگه‌و هاتن وه‌رز خوه‌ش و دڵگیریگه‌ ك ئه‌ویش وه‌رز وه‌هاره‌و ده‌ر وده‌یشت پڕ بوود له‌ سه‌وزه‌ڵانى و گژوگیاو دیمه‌ن وڵاته‌گه‌مان جوانتر و ڕه‌نگین تره‌و بوود، وه‌لى ئاگر نیشانه‌ى نه‌ورووزه‌و كورده‌یل به‌غدایش وه‌ كردنه‌وه‌ى ئاگر نه‌ورووز شانازى وه‌ عه‌ید نه‌ورووزه‌وه‌ كه‌ن تویه‌نن روح كوردایه‌تى وه‌ڕاسى نیشان بیه‌ن دویر له‌گشت مامڵه‌یگ سیاسى و تاج سه‌ربه‌رزى وه‌پیه‌وه‌ بنه‌نه‌ سه‌ر، چوینكه‌ نه‌ورووز گشت سه‌رده‌مه‌یل زوڵم و سته‌مكارى و له‌ناوبردن و قه‌یه‌غه‌كردن بڕیه‌ تا ره‌سیه‌سه‌ ئى وه‌خته‌ ك ئه‌وه‌سه‌ په‌یوه‌ندى كرده‌ نه‌وه‌یلى و میرات خوه‌ى ره‌سانه‌ رووژگار ئمڕوو تا وه‌رده‌وام وه‌ زنگى و یادكردن بمینیگ .

داستان نه‌ورووز له‌گشت ماڵه‌ كوردیگ به‌رقه‌راره‌و گه‌وراو بویچگ شانازى وه‌و داستانه‌ كه‌ن ك ملله‌ت كورد له‌تى سه‌ربه‌رز و سه‌ركه‌فتگ بوى و كووتایى وه‌ ده‌سڵات ناعادڵانه‌ى زه‌حاك هات وه‌ ده‌س كاوه‌ى ئاسنگه‌ر. هه‌ر له‌وه‌ر ئه‌وه‌یش ئومیده‌واریم ئى عه‌یده‌ ساڵ وه‌ساڵ وه‌ خوه‌شى و شادى بایگه‌وه‌و گه‌وراو بویچگمان وه‌ روح كورده‌واریه‌وه‌ پیشوازى له‌لى بكه‌یم.

 

جه‌ماڵ ئه‌ركه‌وازی