داعش چوين هاته‌سه‌ به‌رهه‌م؟

شفق نيوز

نمايش و جيوه‌جيكردن ئی فيلم تازه‌ له‌ سه‌ره‌تای مانگ شه‌ش ساڵ گوزه‌يشت له‌ پاريزگای موسڵه‌و ده‌سكرده‌ نمايشه‌يل خوه‌ی و ئی داعش ده‌سكرديشه‌ له‌ چه‌ن سه‌عاتيگ ده‌س گرته‌ بان گشت شار موسڵ له‌ باكوور عراق و پاڵه‌وانه‌يل ئی فيلميشه‌ پيكهاتن له‌ هه‌زاران ئه‌كته‌ر ك له‌ ئۆرپاو ئه‌مريكاو ئوسترالياو سۆماڵ و توركياو كوردستان و وڵاته‌يل باكوور ئه‌فريقيا رويكردنه‌ عراق و سوريا.

وه‌ل ئه‌وه‌يشا باس له‌وه‌يش ئه‌كه‌ن ك بڕيگ ده‌سڵاتدار و بريارده‌ر سياسی و ئداری ناو حزبه‌يل كوردستانييش جوور ئه‌كته‌ر پشت په‌رده‌ نه‌فت و غاز و ميوه‌جات ئه‌را ئه‌و داعشه‌ فرووشن و وه‌ ته‌ياره‌يش له‌ روسياو له‌ وڵات چيكه‌و ته‌قه‌مه‌نی جبه‌خانه‌ ئه‌را داعش دابين ئه‌كه‌ن.

يه‌يش گوايا ئه‌و برا كورده‌يل بازرگانه‌ به‌شداری هويچ كرده‌وه‌يگ سه‌ربازی ناكه‌ن، به‌ڵكوو كار ئه‌وان ته‌نيا كاسبيه‌ وه‌ل داعش و گوايا خوه‌يانيش باسی كردنه‌، كاسبييش هويچ عه‌يبه‌يگ له‌تی نيه‌"رزق و رووزی ها لای خودا".

ئويشن داعش له‌ روخساره‌و فريه‌ مۆدێرنن و له‌ ره‌نگ و روی و ريش دانانيش هويچ فه‌رقيگ نه‌يرن وه‌ل پاڵه‌وانه‌يل فيلم "رساله‌" و زنجيره‌ درامايه‌يل تر ئسلامی و بگر تا ڕاده‌ی فريه‌يگيش جنگه‌يليانيش هه‌ر جوور ئه‌وانه‌و ته‌نيا فه‌رقيان ئه‌وه‌سه‌ ك وه‌ عه‌ره‌بی قسه‌ ناكه‌ن، به‌ڵكوو له‌ليان هه‌س وه‌ توركی و عه‌ره‌بی و ئنگليزی و سويدی و ئه‌ڵمانی و مۆدۆی ئه‌فريقی و فارسی و كوردی..هتد قسه‌ ئه‌كه‌ن.

له‌ ئه‌ڵلاجه‌ويه‌يل ئه‌و فيلم ره‌نگاوڕه‌نگه‌ ئه‌وه‌سه‌، ك ئه‌و هه‌مگه‌ جه‌نگاوه‌ره‌يله‌ جوور جاران وه‌ سورای شتر نايه‌ن ئه‌را جيهاد، به‌ڵكوو وه‌ ته‌ياره‌ی ئايرباس توركی و وه‌ جه‌مه‌و ئه‌يه‌نه‌ توركياو له‌وراوه‌ چه‌ن رووژيگ وچان ئه‌يه‌ن و ئمجا ئوغر ئه‌كه‌ن وه‌ره‌و سورياو عراق و كوردستان ئه‌را جيهاد دژ كورد و شيعه‌و سنی.

له‌ هه‌مان وه‌خت له‌ ره‌ساننه‌يل توركيای علمانييش ئويشن ئاگادار نييم له‌ هاتن ئه‌و پاڵه‌وانه‌يل فيلم رساله‌و فه‌جرولئسلامه‌و هه‌ر يه‌ك له‌ قه‌ته‌ر و سعوديه‌و سوريايش فريه‌ وه‌ په‌رووشن ئه‌را ئه‌و بار سه‌خته‌ ك رويكرده‌سه‌ ناوچه‌گه‌،ك ته‌نيا ئه‌مريكا نه‌ود ئويشيد ماوه‌ی ئه‌و فيلمه‌ ٣ ساڵ دريژه‌ ديريد، ك ئه‌ويش جوور فه‌تاحفاڵ قسه‌ ئه‌كاو دگان وه‌ ئه‌وه‌يش ئه‌نه‌يد ك له‌و فيلميشه‌ چشته‌يل فريه‌يگيش ها له‌تی جوور سه‌ربرين و نانبرين و كاولكردن شار و ئاوايی و تاڵانكردن دارايی و سامان مه‌ردم و ژن فرووشتن و گه‌ناته‌كاری و برين مووچه‌ی مه‌ردم كوردستان و گشت چشتيگ تر، ك ته‌نيا خوداناسين و ئسلام و ئايين له‌تی نيه‌، ئمجا كووتايه‌گه‌يشی هه‌ر جوور فيلميگ وه‌ ئنگليزی نويسريه‌يد" THE END " ، ك ئه‌ويش كه‌ی ته‌مام بدێ مه‌گه‌ر هه‌ر خوداو ئه‌مريكا بزانن.

لوقمان به‌رزنجی

ج . أ