تراژيديای كورد ئێزيدی

شفق نيوز

گوزه‌يشته‌ ئه‌نفال و هه‌ڵبجه‌ بوی، ئمڕوو نووره‌ی كورد ئێزيديه‌! سه‌د هه‌زار مناڵ و جايه‌ڵ و پير له‌ترس مردن شه‌نگاڵ هيشتنه‌سه‌جی و ته‌نيا جه‌وه‌ڵ شك برديان و ئه‌ويش باوه‌ش ئه‌رايان واز كرد.

خيزانه‌يل ئێزيدی، مناڵه‌يل نازار شه‌نگاڵ، په‌نا برديانه‌ وه‌ر كويه‌و جاريگتر تابلۆيه‌يل دڵته‌زن له‌ مێژوومان دوباره‌ بويه‌و. جينۆسايد ئێزيديه‌يل روينويسيگ بويچگ هۆڵۆكۆست و ئه‌نفال و هه‌ڵه‌بجه‌ن، بڕيگ ملله‌ت يه‌كجار ئه‌نفال كريا، وه‌لی كورد فيشتر له‌ سێ جار ئه‌نفال كريا.

ئه‌وه‌سه‌ وه‌خت ئه‌گوزه‌ريد و تاوتاويگ زه‌نگ مردن كوتيه‌يد، كورده‌يل گيركردگ كويه‌ی شه‌نگاڵ ماڵئاوايی له‌ليمان ئه‌كه‌ن، مردن ها ڕييه‌و، مردن چه‌وشاره‌كی وه‌ليانا ئه‌كا، له‌ دووزه‌خ گه‌رمايی شوونيگ نيه‌ خوه‌يان له‌تی مقه‌يه‌تی بكه‌ن، قاپی ئوميد له‌ليان به‌سياگه‌و له‌ناو خوه‌ر و گه‌رمای وه‌رداڵان ركابه‌ری مه‌رگ ئه‌كه‌ن، ك نازانيم ئايا هوير له‌ چه‌ ئه‌كه‌ن، چ خوه‌شه‌ويسيگ له‌ده‌سدان و چوين چه‌وه‌ڕی ئه‌كه‌ن له‌ دونيای نه‌فامی، ئايا تاوانيگ هه‌س له‌وه‌ گه‌وراتر ك چراخ ژيان بيتاوانيگ كوشيه‌يده‌و ته‌نيا له‌وه‌ر ئه‌وه‌ك سه‌ر وه‌ ئايينيگ يا مه‌زه‌ويگ يا ملله‌تيگ جياس؟

له‌ڕاسی هويچ ئازاريگ شك ناوه‌يم ك بتويه‌نيد شان بيه‌يد له‌شان ئه‌سر چه‌وه‌يل مناڵيگ ك ترس زوور ئه‌رای هاوردگه‌و تاوان ته‌نگ له‌لی هه‌ڵچنيه‌، ئيمه‌ ئمڕوو له‌و ئازاره‌يل ئيوه‌ ژيه‌يم و هه‌ر وشه‌يگدان هه‌زار مانا ديريدو ئه‌سر چه‌ويلدان وه‌لمانا قسه‌ ئه‌كه‌ن و په‌يام خوه‌يان ره‌سنن، وه‌لی دی نازانيم گونای ئيوه‌ چه‌س وه‌و شيوه‌ جينۆسايد بكريه‌ين، ته‌نيا هه‌ر له‌وه‌ر ئه‌وه‌ ك وه‌ ئێزيدی له‌دايك بوينه‌!

حه‌مه‌ دۆستان

ج . أ