میدیاكاره‌یل كه‌مه‌وكردن وه‌خت قه‌يه‌غه‌ی هاتوچوو به‌غدا خه‌نه‌ خانه‌ى پلان سه‌د ڕووژى حكوومه‌ت

شفق نيوز

وه‌ هه‌نگامیگ خاس دانه‌ قه‌ڵه‌م وخستنه‌ى خانه‌ى ئه‌و پلان سه‌د ڕووژیه‌ ك سه‌رۆك وه‌زیره‌یل ده‌سنیشانى كردیه‌ ئه‌را هه‌ڵسه‌نگاندن یا ته‌قویم كاركردن حكوومه‌ت.

میدیاكار حازم شه‌رع له‌ په‌یوه‌ندییگى وه‌ل ماڵپه‌ڕ شه‌فه‌ق وت:"سه‌عاته‌یل مه‌نع ته‌جه‌ول بارسه‌ختیگ كرده‌ سه‌ربار بارووه‌زع ئابوورى له‌ به‌غدا ، چوینكه‌ زوورمى كارخانه‌یل و شوونه‌یل گه‌شتوگوزار و پیاسه‌كردن له‌ وه‌خته‌یل پڕكار به‌سیان". و له‌بان ئه‌وه‌یشه‌ جه‌ختكرد ك:"هه‌رچه‌نى ئى هه‌نگامه‌ هه‌نگامیگ خاسه‌ وه‌لى فره‌ دویاكه‌فت".

ئه‌وه‌یشه‌ ڕووشنه‌وكرد ك:"كه‌مه‌وكردن سه‌عاته‌یل مه‌نع ته‌جه‌ول وه‌ هه‌نگامیگ ئه‌را مه‌یلكیشان جاده‌ى عیراقى دریه‌یده‌ قه‌ڵه‌م و به‌شیگه‌ له‌ پلان سه‌د ڕووژى خاسه‌وكردن كاركردن حكوومه‌ت".

له‌ باوه‌ت كه‌مه‌وكردن سه‌عاته‌یل مه‌نع ته‌جه‌ول شه‌رع وت:"ئه‌و خودنیشانداین و ناڕه‌زایى ده‌ربڕینه‌یل مللیه‌ ك به‌غدا وه‌خوه‌یه‌و دیه‌ى ژیان ئاسایى ئه‌را شه‌وه‌یل به‌غدا هاوردنه‌وه‌ و هیشت جاده‌یل پڕه‌و بوود له‌ سه‌یاره‌ و شوونه‌یل گه‌شت و گوزرایه‌یلى ئارایش كریان وپڕ بوین له‌ مه‌ردمیگ ك تا وه‌رجله‌ سێ مانگ هه‌ر دیاریان نه‌وى".

له‌ لاى خوه‌یه‌و میدیاكار فله‌یح جه‌وارى له‌ قسه‌یلى ئه‌را شه‌فه‌ق وت:"كه‌مه‌وكردن سه‌عاته‌یل مه‌نع ته‌جه‌ول ئه‌را ته‌نیا سێ سه‌عات خریه‌یده‌ خانه‌ى پلانه‌ 100 ڕوویه‌گه‌ و هاله‌ به‌رژه‌وه‌ندى هاوڵاتى به‌غدادى". و زیاتریش وت ك:"بار ئاسایشى له‌ى وه‌خته‌ وه‌ره‌و خاسى چوود ، و ئه‌را مقه‌یه‌تى كردن ئى ده‌سكه‌فته‌ هه‌وه‌جه‌مان ها وه‌ وه‌شوون كه‌فتن و وشیارى له‌ لایه‌ن ده‌سڵاتدارى ئاسایشى چوینكه‌ گشتلایگ دڵیان وه‌یه‌ خوه‌شه‌".

ئاماژه‌یش وه‌وه‌دا ك:" هاتنه‌وه‌ى ژیان ئاسایى ئه‌وسا هه‌وه‌جه‌ى ها ساڵه‌یل فره‌یگ وهه‌وڵ و ته‌قه‌لایه‌یلیگ چڕ ه‌ پڕ و هاوكارى ناوبه‌ین هاوڵاتیه‌یل و حكوومه‌ت و له‌وه‌ر ئه‌وه‌ ئویشم ك كه‌مه‌وكردن سه‌عاته‌یل هاتوچوو نه‌كردن وه‌ هووكار سه‌ره‌كى خاسه‌وبوین بارووه‌زع به‌غدا نیه‌شماریه‌ید".

له‌وه‌رده‌وامى قسه‌یلى وت ك:"كارا كردن ئى ته‌قه‌لایه‌یله‌ و چه‌سپاننیان ئه‌رك میدیاى ئازاده‌ و ئیمه‌ى له‌ى وه‌خته‌ هه‌وه‌جه‌مان هاوه‌ پى ئه‌را وشیاركردن جاده‌ى عیراقى".

له‌ لاى خوه‌یه‌و میدیاكار جه‌مال كه‌ریم له‌ په‌یوه‌ندییگى وه‌ل ماڵپه‌ڕ شه‌فه‌ق وت:"ئى كه‌مه‌وكردن سه‌عاته‌یل مه‌نع ته‌جه‌وله‌ به‌ڵگه‌یگه‌ ئه‌را خاسه‌و بوین بار ئاسایشى به‌غداى پایته‌خت له‌ شوون 7 ساڵ له‌ تون و تیژى هه‌رچشتى جوانه‌ كردویده‌ ئامانج".

ئه‌وه‌یشه‌ ڕووشنه‌وكرد ك:"وڵاته‌گه‌ قه‌یرانیگ وه‌خوه‌یه‌و دوینید له‌ باوه‌ت ڕیككه‌فتن له‌بان وه‌زیره‌یل ئاسایشى و ئى بڕیار كه‌مه‌وكردنه‌ له‌ى وه‌خت قه‌یرانیه‌ ته‌حدایگه‌ ئه‌را هه‌ركه‌سى هه‌وڵ بیه‌ید ده‌س له‌ به‌غداى پایته‌خت بكه‌یده‌ ئامانج".

ئاماژه‌یش وه‌وه‌دا ك:"خودنیشانداینه‌یل به‌غدا نه‌خش و ده‌ور خاسیگ داشتن ئه‌را دوباره‌ زینیه‌وكردن لایه‌نه‌یل فره‌یگ ژیان". و له‌بان ئه‌وه‌یشه‌ جه‌ختكرد ك:"ئه‌وه‌سه‌ ژیان خه‌ریكه‌ وه‌ بار ئاسایى خوه‌ى چوود له‌ به‌غدا و گشت لایگ له‌بان ئه‌وه‌ كووكن ك ملله‌ته‌یل خوه‌یان ئازادیه‌یل وه‌به‌رهه‌م تیه‌رن".

شایان باسه‌ ك نویسینگه‌ى فه‌رمانده‌ى گشتى هێزه‌یل چه‌كدار له‌ ڕووژ شه‌ممه‌ى وه‌رین ئه‌وه‌ ئاشكراكرد ك ماوه‌ى مه‌نع ته‌جه‌ول له‌ په‌نج سه‌عات كریاسه‌ سێ سه‌عات له‌ یه‌ك شه‌وه‌كى تا چوار شه‌وه‌كى.

 

ئا: یاسر عماد

ت: ماجد سوره‌مێرى