سیاسه‌تمه‌دار و نه‌فره‌ت كورسی

شفق نيوز

ئه‌كه‌فێده‌و، جارجاریگ ئاڵشتكارى خاسى له‌لى ئه‌یه‌یده‌ وجوود ك یه‌یش مایه‌ى دڵخوه‌شى گشتمانه‌و شاد بویمن وه‌پى، جارجاریگیش خراوه‌و بووده‌ مایه‌ى دڵته‌نگى. ئمجا هه‌میشه‌ ئه‌و پرسیاره‌ ژنه‌فیم ك نیشانه‌یل فره‌یگ پرسیار گرێده‌ خوه‌ى، ك ئه‌ویش ئه‌وه‌سه‌ ئه‌راچه‌ ئاده‌میزاد ئاڵشت بوود؟ ئه‌راچه‌ سروشت و هسه‌یلى ئاڵشت بوون ك وه‌رده‌وامیش مه‌ناى رووژگار كه‌یم و خاسیش زانیم ك رووژگار ئاڵشت نادێ، به‌ڵكوو مه‌ردمه‌گه‌ ئاڵشت بوون و دڵڕه‌ق و خیانه‌تكار له‌لیان ده‌رچوود و زوى ره‌فیق دڵسووز له‌هویره‌و ئه‌وه‌ن!

ئیمه‌ مه‌ردمان فره‌یگ دوینیم ئاڵشت بوینه‌ له‌وه‌ر هووكاریگ باوه‌ڕ وه‌پى نه‌كریاگ، وه‌لى جى داخه‌ ئه‌و كه‌سه‌یله‌ دووسیان داشتیمه‌و متمانه‌ وه‌پیان داشتیمنه‌.

هه‌ر له‌وه‌ر ئه‌وه‌یش ترس له‌وه‌ دیرم گشت ئاده‌میزادیگ ئه‌زیزم سروشت خوه‌ى ئاڵشت بكاو دڵره‌ق بوود له‌هه‌نام له‌هه‌ر وه‌ختیگ یا وه‌ كه‌مترین وه‌خت فه‌راموشم بكا. هه‌ر له‌وه‌ر ئه‌وه‌یش په‌ندیگ هه‌س ك فره‌ وه‌دڵمه‌و ئویشید(پشت وه‌ ره‌فیق مه‌وه‌س چوین ره‌فیق لاره‌، پشت وه‌ دووسیش مه‌وه‌س چوین خیانه‌تكاره‌، ته‌نیا پشت وه‌ خودا بووه‌س هه‌ر خودا یاره‌).

ئه‌گه‌ر باس ئاده‌میزاد سیاسى بكه‌یم، ئه‌ویش كه‌سیگه‌ جوور ئیمه‌ له‌ گووشت و خوین، وه‌و خاتریشه‌ دوینید هه‌میشه‌ ئاڵشت بوودو شایه‌ت گشت وه‌ختیگیش سروشتى ئاڵشت نه‌ود، وه‌لى وه‌ هه‌رحاڵ هه‌ر ئاڵشت بوود، ك یه‌یش ماناى ئه‌وه‌ نییه‌ هه‌ق وه‌پى بیه‌م، چوینكه‌ خوداوه‌ند كه‌ریم ئیچنه‌ ئه‌راى دیارى كردگه‌ له‌بان ئه‌و كورسى یا ته‌خت له‌عنه‌تیه‌ بناده‌ى ك له‌عنه‌ت خاوه‌نه‌گه‌ى بكا جوور ئه‌وه‌ك له‌بان له‌عنه‌ت فرعه‌ونیه‌یل ژنه‌فیم. ئمجا له‌یره‌ پرسیار له‌خوه‌مان كه‌یم ك ئایا وه‌راسى ئه‌و كورسیه‌ نه‌فره‌تى یا له‌عنه‌تیه‌، یا ئیمه‌ زوڵمى كردیمنه‌و غه‌ڵه‌ت سیاسیه‌یل وه‌پیه‌و دوینیم؟ وه‌ل ئه‌وه‌یشا سه‌رمان سڕمینێد ك ئه‌راچه‌ مه‌ردمانیگیان له‌وانه‌ك به‌رزه‌و بوینه‌ ئاڵشت بوون و ره‌فیقه‌یلیان له‌هویره‌و به‌ن و هه‌ر وه‌ختیگیش باس مه‌سه‌له‌یگ وه‌لیا بكه‌ید هه‌زار مه‌هانه‌ و ده‌سپیچگ ئه‌راد دوینیده‌و، یا ناخوازێد دیدارد بكا؟ ئایا نازانێد وه‌ ده‌نگ ئیمه‌ ره‌سیه‌ ئى پۆسته‌و بایه‌د له‌بانى خزمه‌تمان بكا؟ وه‌لى جى داخه‌ چشته‌گه‌ وه‌ چه‌واشه‌وه‌ دوینیم و ئیمه‌ بایه‌د خزمه‌ت ئه‌و بكه‌یم!!

هه‌ر له‌وه‌ر ئه‌وه‌یش بایه‌د ئه‌وه‌ بزانێد ك وه‌و جووره‌ ئیمه‌ هه‌وه‌جه‌ وه‌پى دیریم ئه‌ویش هه‌وه‌جه‌ وه‌ ئیمه‌ دیرید، دى نووڕید هه‌ردوگلامان له‌بان یه‌كترى ژیه‌یم، وه‌گه‌ر نه‌ ئه‌گه‌ر ئیچنه‌ نه‌ود ژیان وه‌سه‌ر ناچێ، چوینكه‌ گشتمان دروسكریاگ رووژگاریگیم و ئى حاڵه‌تیشه‌ گشت لایه‌نه‌یل ژیانمان گرێده‌و له‌ خوه‌شى و ته‌نگى و كار و خوه‌ندن و سه‌ركه‌فتن و شكه‌ست و درامه‌ت و هاوسه‌رى و خوه‌شه‌ویسى و مناڵ و ره‌فیقى و گه‌شت، ك هه‌ر جاریگ وه‌ شیوه‌یگ .

ئمجا له‌وه‌ر ئه‌وه‌ك سیاسیه‌یل له‌ رووژگار ئاینده‌ له‌ده‌سمان نه‌یه‌ن و له‌ كیسیان نه‌چیم، بایه‌د قاپى له‌ڕوى هویچ كه‌سیگ نه‌وه‌سن، وه‌گه‌رنه‌ رووژیگ ئه‌یه‌ید هه‌وه‌جه‌ى وه‌پیمان كه‌فێدو گه‌ردیده‌ شوونمان و ئه‌یاد له‌ قاپیمان، وه‌لى ئه‌و وه‌خته‌ قاپى ئه‌راى واز ناكه‌یم و ئه‌را هه‌میشه‌ له‌ڕویى ئه‌وه‌سیمنه‌ى، چوینكه‌ شایسته‌ى گرنگیداین و قوربانیداین نییه‌و هه‌ركه‌سیگ له‌ ئیمه‌ كرامه‌ت خوه‌ى دیرید.

ئسرا شاواز
ج. ا