ئه‌نجام ته‌ماكارى!

شفق نيوز

قه‌ت له‌ ماڵ دنیا تیر ناخواد؟، ئه‌گه‌ر بخوازید نموونه‌یش بیه‌رى، ناتویه‌نى فریه‌ دویر بچید، له‌ى وڵات عیراق خوه‌مانه‌ به‌عزه‌كه‌سیگ تا دویه‌كه‌ ویڵ و وه‌یلان وڵات وشاره‌یل غه‌ریبى بوى، ئمڕوو هات ده‌سڵات وچاره‌نویس مه‌ردم وه‌یاوه‌رى گشت پیكهاته‌یل گرده‌ ده‌سه‌و، وه‌لى تا ده‌سى له‌ ده‌سڵات به‌ن بوى خه‌ریكه‌ یه‌واش یه‌واش پشت له‌ گشتلایگ بكا و ئه‌خوازێ گشت چشتیگ بناده‌ بن به‌خه‌ڵ خوه‌ى... وه‌لى ئایا ئه‌ى پیاوه‌ وه‌ ئه‌نجام كار خوه‌ى ئه‌زانێ؟ من گومان دیرم، وه‌لى ئه‌وه‌نه‌ وه‌پیم كریه‌ێد ك ئى وه‌سه‌رهات كورده‌وارى خوه‌مانه‌ بخه‌مه‌ وه‌رچه‌وى، به‌شكه‌م هه‌م خوه‌ى وهه‌م هاوهویره‌یلى په‌ند له‌لى وه‌ربگرن... ئویشن بازرگانیگ بوى فره‌‌ ته‌‌ماكار و وه‌‌رچه‌‌وته‌‌نگ بوى كاروانیگ گه‌‌وراى حوشتر داشت وه‌‌پى ئازووقه‌‌ و كاڵاى بازرگانه‌‌یل وه‌‌ كه‌‌را هاوردیاد وبردیاد؛ ڕووژیگ له‌‌ ڕووژان پیره‌‌مه‌‌ردیگ هات ئه‌‌را لاى و داوا له‌‌لى كرد ١٠٠ حوشتر كرایه‌‌ بكا تا وه‌‌ پییان گه‌‌نجینه‌‌ى گه‌‌ورایگ له‌‌ تڵا و دوڕ و جه‌‌واهر له‌ شوونیگه‌و بیه‌رێ ك له‌ ناو سه‌ندووقه‌یل گه‌ورایگ شاردیه‌سه‌یانه‌و، كابراى بازرگانیش وه‌لیا رێككه‌فت ك بار  په‌نج حوشتر له‌لیان بیاده‌ پى، وه‌ختى ڕه‌سینه‌ جى كار  و كابراى بازرگان ته‌ماكار ته‌ماشاكرد ئى پیره‌مه‌رده‌ ئى هه‌مگه‌ سه‌ندووق پڕ له‌ تڵا و جه‌واهره‌ له‌ بیاوانیگ چووڵ و هووڵ دیه‌سه‌و، وته‌ پى نیه‌ویشیده‌ پیم ڕاز یا سڕ ئى كاره‌ چه‌س؟ پیره‌مه‌ردیش ده‌س كرده‌ بن به‌خه‌ڵ و سورمه‌دانیگ ده‌ركرد و وت: وه‌ختى میل سورمه‌دانه‌گه‌ سامه‌ بان چه‌و چه‌پم هه‌رچى گه‌نجینه‌ى شاریایه‌ دوینم.. وه‌ختى سه‌د حوشتره‌گه‌ باركردن، بارزگان وته‌ پیره‌مه‌رد ك فریه‌ شه‌كه‌ت بویه‌ وه‌لیا و بایه‌ته‌ كه‌رایه‌گه‌ ئه‌راى زیاێ بكا؛ ئه‌ویش وت قه‌ى نه‌یرێ و بار په‌نج حوشتر تره‌ك ئه‌راى نا بانى و له‌یره‌ ته‌ماكارى كه‌فته‌ كار وچه‌ن جاریگتر داواى زیاتر كرد تا ڕه‌سانه‌ى بار 20 حوشتر ، پیره‌مه‌ردیش هه‌ر وه‌ى داواكاریه‌یله‌ قه‌بوول كردیاد.. وه‌ختى ڕه‌سینه‌ نیمه‌ى ڕى هاتنه‌وه‌ بازرگان ته‌ماكار وته‌ پیره‌مه‌رد تو پیره‌مه‌رد وه‌ساڵاچوى گه‌ورایگید وئى هه‌مگه‌ گه‌نج دونیا وه‌كار تو نیه‌تیه‌ید و ئه‌را من خاسه‌ و مادام تو جارى سورمه‌دانه‌گه‌ دیرید تویه‌نید گه‌نجینه‌یلیگ تر په‌یا بكه‌ید، به‌و له‌ى كاروانده‌ واز بار و بیه‌ره‌ى من، پیره‌مه‌رده‌گه‌یش وه‌ختى له‌وه‌ ڕه‌سیه‌و ك ئى كابرا نیازى پاك نییه‌ وته‌ پى قه‌ى نه‌یرى .. وه‌لى ته‌ماكارى حه‌د نه‌یرى و له‌یره‌ بازرگانه‌گه‌ دوباره‌ وته‌ پیره‌مه‌رد: یا ئى سورمه‌دان سحرییده‌ ده‌یده‌ پیم یا یه‌سه‌ له‌یره‌ كوشمه‌د، پیره‌مه‌ردیش ناچار بوى سورمه‌دانه‌گه‌ داپى؛ وه‌لى وته‌ پى مقه‌یه‌ت به‌ ته‌نیا یه‌ك چه‌ود وه‌پى سورمه‌ بیه‌!.

بازرگان ته‌ماكار وت دیاره‌ تو ئه‌خوازى من بخه‌ڵه‌تنید و نه‌یلیده‌م وه‌ یه‌كجار هه‌رچى گه‌نجینه‌ى دونیاس په‌یا بكه‌م!!، وله‌یره‌ هات سورمه‌دانه‌گه‌ كرده‌وه‌ و چه‌و چه‌پ وه‌پى سورمه‌دا و ته‌ماشاكرد هه‌ر گه‌نجینه‌س و له‌وه‌ر چه‌وى دیار ئه‌یاد، ته‌ماكارییه‌گه‌ى زیاتره‌و بوى وگرده‌ میل سورمه‌دانه‌گه‌ و هاورده‌ى بان چه‌و ڕاسیشیا وه‌ته‌ماى ئه‌وه‌ ك گه‌نجینه‌یل زیاتریگ بوینیده‌و؛ وه‌لى تا میله‌گه‌ هاورده‌ بان چه‌ویا دنیا له‌وه‌رچه‌وى تاریكه‌و بوى و ده‌س كرده‌ هاوار ... پیره‌مه‌رده‌گه‌یش وته‌ پى یه‌ ئه‌نجام ته‌ماكاریه‌ و یه‌یشه‌ ڕاز ئى سورمه‌دانه‌سه‌!!.. بازرگانه‌گیش ڕجا و تكراى فره‌یگ له‌لى كرد چاره‌یگ ئه‌راى بوینیده‌و تا چه‌وه‌یلى خاسه‌و بوون.. ئه‌ویش وت ته‌نیا چاره‌ى تو ئه‌وه‌سه‌ ك وه‌ كه‌وش و كڵاش بیه‌نه‌ لاى ملدا تا یه‌واش یه‌واش چه‌وه‌یلد خاسه‌و بوون وڕووشنایى دونیا بوینید!! ... له‌و ڕووژه‌وه‌ ئى كابراى بازرگانه‌ له‌ بان جاده‌ى گشتى وسیاس و له‌ رێواره‌یل ڕجا ئه‌كا ك وه‌ كه‌وش و كڵاش بیه‌نه‌ لاى ملیا، به‌شكه‌م یه‌ خوداس ڕووژیگ  له‌ ڕووژان چه‌وه‌یلى ڕووشنه‌و بوون!!!

 

ماجد سوره‌مێرى