ئه‌گه‌ر كورده‌يل فه‌يلى گشتى ره‌ته‌و كردن كى نوێنه‌رايه‌تييان ئه‌كا؟

شفق نيوز

ئه‌گه‌ريش ئه‌وانه‌گ په‌يوه‌سن وه‌ حزب و ريكخرياگه‌يله‌و جياوه‌ بكه‌يم، ئه‌وه‌ جايه‌ڵه‌يل ئمڕوو چشت فريه‌يگ له‌بان كيشه‌ى فه‌يلى نازانن و رووشنهويرييانيش وه‌رته‌نگ و كه‌مه‌و ئه‌وه‌گ له‌ نيسان گوزه‌يشت روێدا له‌ بوونه‌و چالاكيه‌يل ده‌لاله‌ته‌ له‌ى باوه‌ته‌وه‌و هه‌ر له‌بان ئه‌و بنه‌مايشه‌ په‌يوه‌ندى وه‌ حكايه‌ت قوربانيه‌يل كووچ وه‌پيكردن و پاڵه‌وانه‌يل زيندانه‌يل به‌عس نه‌يرن، يا ئاشنايى وه‌ل مه‌ينه‌تى خيزان بيسه‌روشوونه‌يل نه‌يرن و ماريفه‌تيش ماناى په‌يوه‌س و په‌يوه‌نديه‌و نه‌وه‌يل ئيسه‌يش خه‌ريك كاروبار وه‌رزشى و نواندن و چشته‌يل سه‌رده‌من و هه‌ر كه‌سيگ وه‌ گووره‌ى بايه‌خ و گرينگداين خوه‌ى و هه‌ر وه‌و خاتريشه‌ جه‌وهه‌ر ماريفه‌ت له‌باره‌ى مێژوو و داب ونه‌ريته‌يل نه‌يرێد، ئمجا هه‌ناى ك مێژوو كورده‌يل فه‌يلى زه‌فت كريا چوين پيشبينى بكه‌يم ك يه‌كيگ له‌و ماڵه‌يل زه‌فتكرياگه‌ بكريه‌ێده‌ شوون موزه‌خانه‌ يا كتاوخانه‌يگ وه‌ناو يه‌كيگ له‌ كه‌سايه‌تيه‌يل فه‌يلى و ئاقبه‌ت ئى نه‌فاميه‌ چه‌س؟ يه‌يش پرسياريگه‌و خوه‌ى خوه‌ى ده‌رئه‌خا، ك ك بيجگه‌ وه‌تاڵانبردن ماڵه‌يل و موڵكه‌يل ته‌نانه‌ت ناسنامه‌مانيش زه‌فت كرياو ساڵانه‌يش مليۆنه‌ها له‌بان كه‌سايه‌تيه‌يل مێژوويى و زانستى و كه‌سايه‌تيه‌يل ديار جه‌هانى خه‌رج كريا تا بخريه‌نه‌ بان نه‌ته‌وه‌يگ يا چينيگ دياريكرياگ و ئه‌را نموونه‌يش ئه‌نجومه‌ن پاريزگاو شاره‌وانى به‌غدايش مليۆنه‌ها دينار خه‌رج ئه‌كه‌ن ئه‌را ئاوه‌دانكردن جه‌زره‌يل ناوڕاس جاده‌، وه‌لێ ئاماده‌ نين ته‌نيا فلسگيش ئه‌را دروسكرن و دامه‌زرانن په‌يكه‌ريگ جوور نيشانه‌ى وجوود كورده‌يل فه‌يلى خه‌رج بكه‌ن ك فيشتر له‌ ده‌يه‌يگه‌ مينه‌ى شوونيگ گونجياگ ئه‌كه‌ن ئه‌را داناين ئه‌و په‌يكه‌ره‌ ك نوێنه‌رايه‌تى مه‌ينه‌تيه‌يل ئى پيكهاته‌ ئه‌كاو شوونيگ ئه‌راى وه‌دى نه‌كردن و ئيمه‌يش ئاماده‌ نييم ئه‌را هه‌ر ده‌سپيشخه‌رييگ وه‌خاتر به‌شداريكردن له‌ سه‌ندن كتاوه‌يل يا له‌چاپداين و دعايه‌كردن ئه‌ڕاى و ته‌نانه‌ت ئه‌وانه‌يش ك تايبه‌تن وه‌پيمان، ك دوياخريش له‌گشت بوونه‌يگ راى و ده‌نگه‌يليگ هه‌ن نه‌ك هه‌ر مه‌زه‌نه‌، به‌ڵكوو هه‌ر چاڵاكييگ تايبه‌تيش وه‌ كورده‌يل فه‌يلييش ره‌ته‌و ئه‌كه‌ن له‌ژير مه‌هانه‌ى"ئه‌وانه‌ نوێنه‌رايه‌تى ئيمه‌ ناكه‌ن"، ئمجا ئيمه‌يش له‌يرا ئه‌پرسيم ئه‌گه‌ر گشت ئه‌وانه‌ ره‌ته‌وكرياگ بوون، ئه‌ى كى نوێنه‌رايه‌تى ئى پيكهاته‌ ئه‌كا؟

وه‌لێ ملله‌ته‌يل هانه‌ هه‌زاره‌ى سێيه‌م و ئه‌وان ك مێژوو گوزه‌يشته‌يش نه‌يرن ئاماده‌ن مێژوو ئه‌را خوه‌يان بسينن و له‌ كه‌سايه‌تى "رامبۆ"پا‌ڵه‌وانيگ ئه‌فسووناوى دروس ئه‌كه‌ن و ئيمه‌يش گرينگى وه‌ ئاداب و روێداگه‌يل مێژوو خوه‌مان نايه‌يم ك گشت ئه‌يه‌يش هووكارى نه‌وين وجوود ديد ئاشكرايگ و نه‌وين پابه‌نديمانه‌ وه‌پيه‌و.

ئمجا وه‌ باوه‌ڕم ئه‌و مناڵه‌ ك هيمان شيره‌خوه‌ره‌و ئه‌و پياو پيره‌ ك پيرى وه‌پيه‌و دياره‌و ئه‌و پياوه‌ ك هيمان مقه‌يه‌تى له‌ جنگ فۆلكلۆرى كردگه‌و ئه‌وانه‌گ شانازى وه‌ پايه‌يل كومه‌ڵايه‌تى و باوه‌ڕنامه‌يل ئه‌كاديميان ئه‌كه‌ن هويچ جياوازييگ له‌ناونيان ناكه‌يم ته‌نيا له‌و كاره‌ نه‌ود ك پيشكه‌شى ئه‌كه‌ن و خزمه‌ت وه‌ى پيكهاته‌ ئه‌كاو هه‌ركه‌سيگيش هه‌وڵ زينگه‌وكردن كيشه‌گه‌مان ئه‌ياد و مقه‌يه‌تى له‌ ناسنامه‌مان ئه‌كاو هه‌وڵ هاوردنه‌وه‌ى مافه‌يلمان ئه‌ياد وه‌ هه‌ر ديد و شيوازيگ ك مادام خزمه‌ت وه‌ كيشه‌گه‌ ئه‌كاو كه‌سه‌يل تر وه‌ره‌و لاى ئه‌كيشێد ماف خوه‌يه‌ ك بويشێد نوێنه‌رايه‌تى كورده‌يل فه‌يلى ئه‌كا چ له‌ناوخود يا ده‌يشت وڵات، منيش ئويشم ئه‌وانه‌گ ك كار ئه‌كه‌ن له‌ى باوه‌ته‌و مه‌رج نيه‌ چه‌وه‌ڕى لايه‌نگرى و دگان وه‌پياناين ته‌ماشاكه‌ره‌يل و زووان دريژه‌يل بكه‌ن، چوينگه‌ مادام ت كار ئه‌كه‌ێد خوه‌د خاوه‌ن ئمتيازێد.

عه‌لى حسێن فه‌يلى