ته‌ڵا ئه‌را ژانژوو !

شفق نيوز

له‌ی باوه‌ته‌و عه‌لائه‌دین سه‌جادى له‌ كتاوه‌ زینده‌وه‌ره‌گه‌ی باس له‌ مادده‌ی ته‌ڵا ئه‌كاو ئویشید: ته‌ڵا له‌ بنه‌ڕه‌ته‌و سروشتى گه‌رمه‌و له‌وه‌ر جووشخواردن فريه‌ى به‌شه‌ خاكیه‌گه‌ى وه‌به‌شه‌ ئاویه‌گه‌ى، نه‌ وه‌ئاگر سزیه‌ید و نه‌يش‌ له‌ناو خاك ڕزیه‌ید، دويای ئه‌وه‌يش ئويشيد: ئه‌گه‌ر هه‌زاران ساڵیش له‌بانى ڕه‌ى بوود هويچ وه‌ختيگ ره‌نگه‌و نيه‌يد، وه‌ل ئه‌وه‌يشا تايبه‌تمه‌ند و شاره‌زايه‌يليش ئه‌وه‌ ده‌رخستنه‌و ئويشن: ئه‌و شوونه‌یله‌ ك كان ته‌ڵاس وه‌(١٠٨٠)ساڵ ئه‌و ته‌ڵا دروس ئه‌كه‌ن.

ته‌ڵا ئه‌و مادده‌ى نه‌رم و زه‌رد و بریقه‌داره‌سه‌ ك مه‌ردم حه‌یرانى بوینه‌ وه‌تایبه‌ت ژنه‌یل، يه‌يش بیجگه‌ قانجاز جوانى و گرانیه‌گه‌ى، ئمجا هه‌ر له‌سه‌رده‌م كویه‌ن پیشینه‌یلمان له‌باوه‌ت ته‌ڵا وتنه‌: هه‌ركه‌سیگ ته‌ڵا وه‌پى بوود دڵى له‌كاركردن ریك و پیك ئه‌كاو هه‌ركه‌سیگيش سه‌رى ژان بكا، ته‌ڵا بووه‌سیده‌ سه‌ریه‌و ژانه‌گه‌ی لاوه‌يد ، ئمجا هه‌ر وه‌و خاتريشه‌ دوينيم ژنه‌یل سه‌ررشته‌دار و زانا وه‌و شيوه‌يشه‌ ئه‌يه‌رنه‌ی كار.

بيجگه‌ ئه‌وه‌يش له‌قانجازه‌یل تر ته‌ڵا ئه‌وه‌سه‌ ك ئه‌گه‌ر هویرده‌ بكریه‌یدو جوور سورمه‌ باریه‌یده‌ چه‌وا، ئه‌وه‌ له‌ی حاڵه‌ته‌ چه‌و رووشن و جوانه‌و ئه‌كاو هیز دوینستنیش تیژتره‌و ئه‌كا، يا خاوه‌ن ئه‌زموونه‌يل وتنه‌: ئه‌گه‌ر گووش وه‌ ده‌رزى ته‌ڵا كونا بكریه‌يد دى ئه‌و كونا هه‌ر مينيد و نيايده‌ يه‌ك، ئه‌گه‌ريش هه‌ر شوونیگیش له‌ لاشه‌ی ئاده‌ميزاد وه‌ ته‌ڵا داخ بكریه‌ید هويچ وه‌ختيگ توقڵه‌ ناكا، یا هه‌ر شوونیگ له‌ له‌ش ئاده‌میزاد توقڵه‌ كردوید وه‌ته‌ڵا داخ بكریه‌ید یه‌كسه‌ر شوونه‌گه‌ى خاسه‌و ئه‌دێ، له‌ شيه‌وكردنيگ پزيشكييش ئه‌وه‌ ده‌ركه‌فتگه‌ ك ته‌ڵا ئه‌را حاڵه‌ت ته‌نگه‌نه‌فه‌سييش چاره‌سه‌ر خاسيگه‌.

ئمجا وه‌و خاتريشه‌ ئه‌تويه‌نيم بويشيم: ته‌ڵا مادده‌يگه‌ پڕ قانجاز نه‌فدار له ‌ژیان ئاده‌میزاد، وه‌لى وه‌ل ئه‌وه‌يشا هيمان مه‌ردمان فريه‌يگ هه‌ن ته‌نيا له‌وه‌ر ناوه‌گه‌ى یا ره‌واجی و په‌سه‌نیه‌گه‌ى له‌ناو مه‌ردم كومه‌ڵگا ئه‌يه‌رنه‌ى كار نازانن قانجازى چه‌س؟!، وه‌لی قانجاز ته‌ڵا له‌وه‌ فيشتره‌ ك ته‌نيا ئه‌را جوانی و خوه‌يڕازانن باريه‌يده‌ كار و با‌س له‌وه‌يش‌ ئه‌كه‌ن ك "كێلۆباترا"ى شاژن مسر له‌وه‌خت خه‌فتن رويپووشيگ له‌ ته‌ڵا خستياده‌ بان ده‌م وچه‌وی وه‌خاتر مقه‌يه‌تيكردن له‌ جوانيه‌گه‌ی، يه‌يش مانای ئه‌وه‌سه‌ ك ته‌ڵا بيجگه‌ جوانيه‌گه‌ی مقه‌يه‌تی له‌ جوانييش ئه‌كا.

بيگومان ئی مادده‌ له‌ سه‌رده‌م ئمپراتۆريه‌ته‌يل رۆمانی وه‌خاتر چاره‌سه‌ر نه‌خوه‌شيه‌يل پووس هاوريا كار، چوينكه‌ وه‌ گووره‌ی شيه‌وكردن پزيشكی ئه‌وه‌ ده‌ركه‌فتگه‌ ك ئی مادده‌ دژ به‌كترياو په‌نام فايرۆسی كاريگه‌ری فريه‌يگ ديريدو ئه‌را ماوه‌ی فيشتر له‌ سه‌ده‌يگيشه‌ پزيشكه‌يل وه‌ چاره‌سه‌ر خاسيگ تاريفی كردنه‌ ئه‌را "ژانژوو "له‌ سقان ئاده‌ميزاد و كوتان دڵ و زيايكردن مادده‌ی هۆرمۆن ئه‌را ئه‌و ژنه‌يله‌ ك ناڵنن وه‌ده‌س كه‌می ئی مادده‌ی بنه‌ڕه‌تيه‌ و نه‌هيشتن فايرۆس ئايدز و نه‌خوه‌شيه‌يل تر له‌ لاشه‌ی ئاده‌ميزاد.

ره‌نجده‌ر ئاواره‌