ئداره‌ى ئه‌مريكى وه‌ دێد جياواز

عه‌بدوڵڵا جه‌عفه‌ر كوفلى

شه‌فه‌ق نيوز/ ئداره‌يل تازه‌ێ ئه‌مريكى هه‌وڵ ده‌رخستن جياوازيه‌يلى ئه‌ياد جيا له‌ ئداره‌يل تر وه‌رين، وه‌ ئه‌وه‌گ هه‌ر سه‌رۆكيگ گه‌ردێده‌ شوون شيوازيگ جياوازى خوه‌ى له‌تى ده‌ربخه‌ێد وه‌ شيوه‌يگ جياوازتر له‌ كه‌س وه‌رجه‌ خوه‌ى تا ئه‌وانه‌گ ده‌نگ وه‌پى دانه‌ ئحساس وه‌ په‌شيمانى نه‌كه‌ن يا به‌شيگه‌ له‌ به‌رنامه‌ هه‌ڵوژاردنه‌گه‌ێ وه‌ل جياوازييگ.

 

ئى جياوازييشه‌ وه‌ ئاشكراى له‌لاى ترامپ سه‌رۆك ئه‌مريكى ده‌ركه‌فێد وه‌ جياواتر له‌ باراك ئۆباماێ وه‌رجه‌ خوه‌ى، يه‌يش چووده‌و ئه‌را ئه‌وه‌گ هه‌ر يه‌كيگ له‌ليان ئنتما ئه‌را خوه‌ندنگاى جيوازيگ ديرن له‌ ديدێ ئه‌را ئداره‌ى حوكم، ئمجا يه‌كيگيان خاسسازى بار ناوخوه‌يى(ئابوورى و ته‌ندروسى)په‌يڕه‌و كرد وه‌ گرينگى فريه‌يگ و ئه‌واكه‌يش گرينگى ئه‌ياده‌ سياسه‌ت خارجى و هه‌وڵ ئه‌وه‌ ئه‌ياد ئه‌مريكا جوور هيزيگ سه‌ره‌كى نيشان بيه‌ێد ك تواناى درخستن رۆڵ خوه‌ێ ديرێد و كاريگه‌ره‌ له‌ دروسكردن رويداگه‌يل هه‌ڵويسته‌يليگ له‌ كيشه‌يل گشتى ناوده‌وڵه‌تى و ئى جياوازييشه‌ ده‌ركه‌فێد له‌ چشته‌يل جوور:

 

سه‌ردان ترامپ ئه‌را شانشين عه‌ره‌بى سعودى و دانيشتنى وه‌ل سه‌ركرده‌يل ده‌وڵه‌ته‌يل عه‌ره‌بى و ئسلامى و ريككه‌فتنه‌يل گه‌وراى له‌ بوار ئابوورى و سياسى و ئاسايشى و ئمزاكردن له‌بان به‌ياننامه‌ێ هاوبه‌ش له‌وه‌ر ستراتيجيه‌ت دريژماوه‌ێ جوور نه‌خشه‌ڕێ ئه‌را وه‌رده‌وامى و بته‌وكردن په‌يوه‌نديه‌يل كويه‌ن، وه‌لێ ئيجاره‌ وه‌شيوه‌يگ فراوانتر، يه‌يش نيشانه‌ى جياوازى ئداره‌ى تازه‌س له‌ ره‌فتار و فه‌هم و جيوه‌جيكردن، يه‌يش بيجگه‌ ئه‌وه‌گ په‌يوه‌نديه‌يل وه‌رينيش وه‌ گشتى په‌يوه‌نديه‌يليگ ئابوورى و سه‌ربازى بويه‌، وه‌لێ ئيجاره‌ لايه‌نه‌يل وه‌به‌رهاوردن و ئاسايشيش گرته‌ خوه‌ێ و په‌ياميگ ئاراسته‌ى ده‌وڵه‌ته‌يل ناوچه‌گه‌ كرد وه‌ ئه‌وه‌گ سعوديه‌ وه‌رگريه‌يل ئابوورى و سياسى و ئاسايشى ديرێد و ئه‌تويه‌نێد جڵه‌و كيشه‌يل ناوچه‌گه‌ بگرێده‌ ده‌س و له‌ هه‌مان وه‌خت ئاسايش سعوديه‌و ئاسايش ناوچه‌گه‌ به‌شيگه‌ له‌ ئاسايش ئه‌مريكاو گرينگداره‌ ئه‌ڕاى و به‌شيگ له‌ ستراتجيه‌ت ئه‌كريكا وه‌رانوه‌ر ناوچه‌گه‌ وه‌كار بردگه‌.

 

ترامپ وه‌ تايبه‌ت دوياى سه‌ردانه‌گه‌ێ ئه‌را سعوديه‌، له‌ دێد كۆمه‌ڵگاى ئه‌مريكى ئاڵشت بوى له‌بان ئايين ئسلامى ك وه‌ ئايين گه‌ورا تاريفى كرد و جى ريز و حورمه‌ت موسڵمانه‌يليش بوى و داواى روى وه‌ڕوى بوينه‌وه‌ى فكره‌ێ تونڕه‌وى ته‌كفيرى بوى ك جوور نه‌خوه‌شييگه‌و هاته‌سه‌ تويش ده‌وڵه‌ته‌يل ئسلامى وه‌رجه‌ ده‌وڵه‌ته‌يل خوه‌رئاوا، ئمجا ئه‌و جه‌ماعه‌ته‌يل ترۆريستيه‌ ك سياسه‌ته‌يليان له‌بان تونڕه‌وێ ئايينى و ويرانكردن و كاڵين خوسه‌وكينه‌ت دامه‌زرانن بوينه‌ هه‌ڕه‌شه‌يگ راسه‌وخۆ ئه‌را بان ئاسايش ناوچه‌گه‌و جه‌هان و شيوانن سه‌قامگيرى و متمانه‌ له‌ ناونى كۆمه‌ڵگايه‌يل، چوينكه‌ هويچ وه‌ختيگ مه‌رز نه‌يرێد و بى ئايينه‌.

 

كۆمار ئسلامى ئيران، ئه‌و ده‌وڵه‌ته‌سه‌ ك تويه‌نست فه‌رز ئه‌جنداێ خوه‌ى له‌بان مه‌يدان هه‌رێمى بكاو رۆڵ خوه‌ى ده‌ربخه‌ێد له‌ روێداگه‌يل ناوچه‌گه‌ له‌ساێ هيزه‌ ئابوورى و سياسى و تايفيه‌گه‌ێ و تويه‌نست بنه‌ماى وازيه‌گه‌ له‌ سوريا و يه‌مه‌ن و لوبنان و عراق ئاڵشت بكا وه‌ ئامانج هيلال شيعه‌، يه‌يش بيجگه‌ ئه‌وه‌گ ئويشن پشتگيرى جه‌ماعه‌ته‌يل ترۆريستى جياجيايش ئه‌كا ئه‌را جيوه‌جيكردن ئامانجه‌يلى و له‌وه‌يش جياتر نيازه‌يلى ك له‌و مه‌رزه‌ ناوسيه‌ن، به‌ڵكوو له‌ هه‌ڕه‌شه‌يش فيشتر وه‌ له‌ناوبردن ناوچه‌ێ سنى له‌ وجوود و ئاڵشتكردنى وه‌ شيعه‌.

 

ئداره‌ى وه‌رين ئه‌مريكا فريه‌ جار ته‌سه‌يور ئيران كردياد له‌بان ره‌فاره‌يلى و چه‌وپووشى له‌لى كردياد و جوور به‌شيگ له‌ چاره‌سه‌ر كيشه‌يل زانستياده‌ێ ك هاته‌ تويش ناوچه‌گه‌و هه‌ر وه‌و خاتريشه‌ ئمزا له‌بان ريككه‌فتن ئه‌تۆمى كرياو ده‌س خسته‌ ناو ده‌س گفتگوو هه‌رێمى و هه‌ڵويستيشى له‌ وه‌رانوه‌ر ئيران نه‌ڕه‌سياده‌ ئاست هيز راسكانى ئه‌مريكى.

 

وه‌لێ دێد ئداره‌ى تازه‌ جياواز بوى له‌واكه‌و ئيران جوور سه‌رچه‌وه‌ى كيشه‌يل و ته‌مويلكردن ماددى و مه‌عنه‌وێ جه‌ماعه‌ته‌يل ترۆريستى زانێد و جوور سه‌ر مار ئه‌را سياسه‌ته‌يل تونڕه‌ولا و تايفى تاريفى ئه‌كا.

 

دێد ئداره‌ى تازه‌ێ ئه‌مريكى ئه‌را ئيران له‌يوا ئه‌كا له‌ هاوپه‌يمانه‌يلى بچنه‌ سه‌نگه‌ر نوايين ئه‌را روى وه‌ڕوى بوينه‌وه‌ى هه‌وڵه‌يل ئيران له‌ ناوچه‌گه‌و له‌لايگ تريشه‌و له‌يوا له‌ ئيران ئه‌كا وازى وه‌ گشت وه‌ره‌قه‌يلى بكا له‌وه‌ر مقه‌يتيكردن به‌رژه‌وه‌نديه‌يلى و سه‌رگه‌ردان بمينێد له‌ وه‌رانوه‌ر خواست ملله‌ته‌يل ناوچه‌گه‌و زياتر گرفت ئه‌راى دروس ئه‌كاو هه‌ر وه‌و خاتريشه‌ ئوميد فشاره‌يل جياجيايگ له‌لى ئه‌كريه‌ێد.

عه‌بدوڵڵا جه‌عفه‌ر كوفلى