ئایا نه‌وین كوڕ وجاغ كوورییه‌؟!

شفق نيوز

 ئایا تا چ راده‌یگ ئى په‌ند پیشینه‌یله‌ راسه‌؟ كوڕ مایه‌ى وجاغه‌ ئه‌را وه‌رده‌وامى ژیان؟ كوڕ ماناى هه‌ڵگر ناو باوگ و باپیره‌یله‌؟ ماناى دویاڕووژیگ رووشن و گه‌شه‌ ئه‌را دایگ و باوگ؟ ئه‌و خیزانه‌ كوڕ نه‌یاشتوود وجاغى كووره‌؟ ئه‌ى ئه‌گه‌ر دویه‌ت داشتوود ماناى چه‌س؟ ئایا گشت وه‌ختیگ ژن ماناى وه‌رده‌وامبوین ژیان نیه‌؟ ئمایه‌تكردن كوڕ ها بان كى؟ مه‌گه‌ر هه‌ر ژن نیه‌ ك كوڕ ئه‌یه‌رید و هه‌ر ژنیش نیه‌ خوه‌یشگ و میمگ و داپیره‌س؟ ژنه‌یل ئویشن ئیمه‌ له‌یوا یاى گرتیمنه‌ ك نزا ئه‌را هاوڕه‌گه‌زه‌یلمان بكه‌یم له‌وه‌خت دوگیانى و ئویشیم و خودایا نه‌وبه‌رى كوڕ بوود.

بیگومان ژن و پیاو ته‌واوكه‌ر كوومه‌ڵگان ئه‌را وه‌رده‌وامى ژیان، كوڕ ماناى وجاغ نیه‌و وجاغ ئه‌وه‌سه‌ كى له‌ دویارووژ خزمه‌ت دایگ و باوگ ئه‌كا" كوڕ یا دویه‌ت"!؟

له‌ كوومه‌ڵگاى كورده‌وارى گه‌ورا دویه‌ته‌یل و مه‌ندنه‌وه‌یان ئه‌را خزمه‌تكردن دایگ و باوگه‌و شه‌كه‌تیه‌گه‌یشى دیارده‌یگه‌ شاریاگ ئه‌را خنكانن گوڵ ئاره‌زووه‌یل ژن، ك یه‌یش وه‌فایگ پڕ له‌ به‌زه‌ییه‌ له‌ سروشت ژن. بیجگه‌ ئه‌وه‌یش ئه‌گه‌ر دویه‌ته‌گه‌یان شوى بكا هه‌میشه‌ بووده‌ سایه‌كى ئه‌را ماڵ دایگ و باوگى و ئه‌گه‌ر كه‌مئاز بوون دویه‌ته‌ شویكردگه‌گه‌یان ئه‌یاد و ده‌سمیه‌تیان ئه‌یاد و چه‌ودیرى ته‌ندروسى و كوومه‌ڵایه‌تییان ئه‌كاو جوور ئه‌رك پیرووزیگیش زانیده‌ى.

فره‌جار دوینید كوڕ ئى ئه‌ركه‌یله‌ جیوه‌جى ناكاو ته‌نانه‌ت ژنه‌گه‌یشى بووده‌ وه‌ربه‌س ئه‌را خزمه‌تكردن دایگ و باوگ شویه‌گه‌ى، ك یه‌یش دیارده‌یگ ناشرین كوومه‌ڵایه‌تیه‌و بویه‌سه‌ كلتوور.

له‌یرا بایه‌سه‌ بپرسیم ك ئایا كامیان وه‌ وجاغ دانریه‌ید، كوڕ یا دویه‌ت؟ دى له‌یرا بایه‌سه‌ بزانیم ك كوڕ وجاغ نیه‌، چوینكه‌ نموونه‌ى ئه‌و دویه‌ته‌یله‌ فریه‌ن ك هه‌میشه‌ خزمه‌ت وه‌ دایگ وباوگ كه‌ن.

وه‌ل ئه‌وه‌یشا دوینیم نموونه‌یى ئازایه‌تى ژن ك شانیه‌ت ژن نیشان ده‌ن له‌ كوومه‌ڵگاى كورده‌وارى فره‌ن ئه‌و ژنه‌یله‌و فره‌گیش كوڕه‌یلیان وه‌ناو داڵگه‌یلیان چڕن، ك ئه‌ویش له‌ ئاكام شه‌كه‌تى و ئه‌ركه‌ قورسه‌گه‌ى ئه‌و ژنه‌ بویه‌ ك له‌یوا كردگه‌ ئه‌و نازناوه‌ وه‌پیه‌و بلكیه‌ید، هه‌ر له‌وه‌ر ئه‌وه‌یش بایه‌سه‌ بزانیم ك نه‌وین كوڕ ماناى وجاغ كوورى نیه‌.

په‌روین تاڵه‌بانى

ج . أ