به‌رهه‌م ناوخوه‌یى ره‌نج جفتیاره‌یل

شفق نيوز

نه‌خت و گه‌وراو فراوانیگ ئه‌ڕا زه‌ویكاڵى(كشتوكاڵ)ى دیریم له‌ناوچه‌یل جیاجیاى هه‌رێم، وه‌لى جى داخه‌ تائیسه‌ جویر هه‌وه‌جه‌یگ نه‌ف له‌لى وه‌رنه‌گیریاگه‌و ناوریاسه‌ كار ئه‌را كاڵین گشت جووره‌ به‌رهه‌میگ، هه‌ڵبه‌ته‌ یه‌یش چووگه‌وه‌ ئه‌را كه‌مته‌رخه‌مى و گرنگینه‌داین حكوومه‌ت وه‌ به‌رهه‌م ناوخوه‌یى له‌سه‌ره‌تاوه‌. ك ئیسه‌ خه‌ریكه‌ كه‌مه‌ كه‌مه‌ به‌رهه‌م ناوخوه‌یى له‌بازاڕه‌یل كوردستان كه‌فنه‌ وه‌رچه‌و، ك یه‌یش یه‌كه‌مجار مایه‌ى دڵخوه‌شیه‌و دویاى ئه‌وه‌یش له‌ڕوى ئابووریه‌وه‌ گرنگى یا ئه‌همیه‌ت تایبه‌ت خوه‌ى دیریگ و چینیگ له‌كومه‌ڵگا هه‌وڵ زنگه‌وكردنى ده‌ن و مه‌ردمانیگیش له‌بیكارى و ده‌سبه‌تاڵى قورتار بوون و بیجگه‌ ئه‌وه‌یش به‌رهه‌م جفتیاره‌یل له‌بازاڕه‌یل كوردستان ساقه‌و بوون و به‌رهه‌م كشتوكاڵى وڵاته‌یل تر ئه‌را وڵاته‌گه‌مان ڕوى له‌ نه‌مه‌ندن كه‌ن.

وه‌رجه‌ ماوه‌ى كه‌میگ ئه‌وه‌ بوى هاوردن 22 جووره‌ به‌رهه‌م كشتوكاڵى ئه‌را ناو هه‌رێم قه‌یه‌غه‌ كریا له‌بان ناڕه‌زایه‌تى جفتیاره‌یل، چوینكه‌ وه‌ هاوردن ئه‌و به‌رهه‌مه‌یله‌ زه‌ره‌د فره‌یگ ره‌سیاگه‌ خاوه‌ن زه‌وى(جفتیار)، هه‌ر له‌وه‌ر ئه‌وه‌یش وه‌گووره‌ى قانوون مقه‌یه‌تیكردن به‌رهه‌م جفتیاره‌یل و له‌وه‌ر خاتر گرنگى یا ئه‌همیه‌تداین وه‌به‌رهه‌م ناوخوه‌یى و زنگه‌وكردنى له‌بازاڕه‌یل كوردستان ڕى قه‌یه‌غه‌كردن بڕیگ له‌به‌رهه‌م وڵاته‌یل تر گیریاوه‌ر ك زویتر ڕى وه‌و كاره‌ دریا. ئه‌رانموونه‌: زویتر وه‌رجه‌ ئه‌وه‌ك مه‌سه‌له‌ى قه‌یه‌غه‌كردن ده‌س وه‌پى بكا، به‌رهه‌مه‌یل جوراوجوور هاتیاگه‌ هه‌رێم و جفتیار وه‌ ته‌واوى خوه‌ى ئه‌را زه‌ویكاڵى و به‌رهه‌مهاوردن ناوخوه‌یى ئاماده‌ نه‌كردیاگ، ك هه‌رچه‌نى كه‌متاكوت حكوومه‌ت له‌لى سه‌ندیاگ، وه‌لى وه‌ختى فرووشتیاگه‌ى پویل ره‌نج و شه‌كتیه‌گه‌ى ده‌رنه‌كردیاد و جار له‌یوایش بوى زه‌ره‌دیش له‌لى كردیادو ڕه‌نج و ته‌قه‌لاى وه‌تاڵان چیاد. وه‌ى جووریشه‌ پویل وڵات له‌خزمه‌ت به‌رهه‌م وڵاته‌یل تر بوى. بیگومان گرنگیداین حكوومه‌ت هه‌رێم وه‌كه‌رت كشتوكاڵى، ماناى به‌رزه‌وبوین گه‌شه‌ى ئابووریه‌. ئنجا مه‌به‌س باوه‌ته‌گه‌مان له‌یرا ئه‌وه‌سه‌ ك حكوومه‌ت هه‌رێم وه‌تایبه‌ت وزاره‌ت كشتوكاڵ و سه‌رچه‌وه‌یل ئاو هه‌رێم هه‌میشه‌ بایه‌سه‌ پشتگیر بوون له‌ پڕه‌وكردن هه‌وه‌جه‌ى جفتیاره‌یل  له‌وه‌ر خاتر وه‌ربه‌رهاوردن به‌رهه‌م ناوخوه‌یى ڕه‌نج جفتیاره‌یل، ك هه‌رچه‌نى حكوومه‌ت كاره‌یل خاسیگیش ئه‌نجام داگه‌ جویر زیایكردن و داناین بودجه‌ یا میزانیه‌ى تایبه‌ت ئه‌را مه‌سه‌له‌ى جیوازكردن به‌رهه‌م جفتیاره‌یل له‌ناوچه‌و شوونه‌یل خوه‌یانه‌وه‌ ئه‌را عه‌لوه‌یل و بیجگه‌ ئه‌وه‌یش دیارى نه‌كردن باج له‌بان به‌رهه‌م ناوخوه‌یى جفتیاره‌یل و كارئاسانیه‌یل تر.

جویر ئه‌وه‌ك خود وه‌رپرسه‌یل په‌یوه‌ندیدار له‌ وه‌ڕیه‌وبه‌رایه‌تى سایلۆیه‌یل هه‌رێم كوردستانه‌وه‌ ئشاره‌ت وه‌پى كه‌ن، به‌رهه‌میگ جویر گه‌نم ناوخوه‌یى خوه‌مان له‌هه‌رێم كوردستان خاسترین جووره‌ گه‌نمه‌ ك وه‌قسه‌ى ئه‌وان وه‌پله‌ یه‌ك دریه‌یگه‌ قه‌ڵه‌م و نرخ یه‌ك ته‌ن گه‌نم پله‌ یه‌ك وه‌(720)هه‌زار دینار له‌جفتیاره‌یل وه‌رگیریه‌یگ و نرخ یه‌ك ته‌ن (جویه‌)یش وه‌(520)هه‌زار دینار دانریاگه‌ له‌لایه‌ن حكوومه‌ته‌وه‌. له‌ى حاڵه‌ته‌ هه‌م جفتیار تویه‌نیگ زه‌ویه‌یل خوه‌ى بكاڵیگ و هه‌م حكوومه‌تیش قانجاز له‌ى ده‌رفه‌ته‌ بكاو هه‌میش هاووڵاتى به‌رهه‌میگ خاسترو نموونه‌یى باریگه‌ كار له‌ ژیان رووژانه‌ى و ئابوورى هه‌رێمیش وه‌ره‌و خاستر گه‌شه‌ بكا.

 

جه‌ماڵ ئه‌ركه‌وازى