ئه‌را چه‌؟

شفق نيوز

ژيان وه‌سه‌ر ئه‌واد، رووژانه‌ تويش ره‌فتار و كرده‌ويلی ئه‌يه‌ێد ك بڕی ئه‌ليان وه‌ڕه‌د‌ دڵيه‌ و بڕی تره‌ك له‌ خوڵق و خوو و ئامانجی و بيروڕای دويره‌ ك هه‌ يه‌ خوه‌ی سه‌به‌ب شيويان هوير و خه‌مناكی دڵه، وه‌رده‌وام وه‌ل ئی پرسياره‌ ئه‌ژيه‌ێد ك ئه‌ڕای چه‌؟

تاويگ هويری پاكه‌و ناكاد و سه‌رئه‌نجامی، دڵنگه‌رانی و دڵڕه‌قی و بی متمانه‌يی وه‌ ده‌ورگرده‌ و چشتيگ بايه‌د بزانيمن ك بنه‌ڕه‌ت ئی پڕسياره‌ ئه‌رای چه‌ گله‌و ئه‌خواد؟ و ساڕيژ و علاجی هاله‌كوو‌؟ و بايه‌د له‌ خوه‌مان يا له‌ قه‌وم وخيش و يا بيگانه‌ منه‌ی بكه‌يمن؟

له‌ لايه‌ن كه‌سايه‌تی، ئنسانه‌يل  له‌ هوير و خوه‌شه‌ويسی و ده‌سه‌ڵات و دارايی و شوون كومه‌ڵايه‌تی و خێزانی، وه‌ل يه‌كه‌و جياوازن و ‌ئی جياوازيه‌ له‌ شيوه‌ی ره‌فتار و هويره‌وكردنی شوون ده‌سی دياريه‌.

ئيمنه‌‌ دو جووريمن، بڕیگ هه‌ر بايه‌د ژيانمان وه‌ وه‌خشين و خوڵكدريژی و قوربانیداين وه‌سه‌ربوه‌يمن و ئه‌و بڕی تر چنه‌ كاره‌يلی له‌ ئه‌رك وه‌راوه‌رگه‌ زاننه‌ێ‌ نه‌ هن خوه‌ی. هه‌ر ئه‌وجووره ‌ك له‌ ئه‌وسا و‌تنه‌: كاسه وه‌كووره‌و چيد؟ وه‌ره‌و كوچڵه‌، وه‌لی ئه‌وانه‌ ك خاسی نيه‌ وه‌رچاويان چوين بايه‌د وه‌ليان ره‌فتار بكريه‌ێد؟ يا جوور خوه‌يان بويمن؟ وه‌ يا گشت مه‌ردم وه‌ چاو ئه‌وان بوينيمن وه‌ دڵ ئه‌ڕای هيچكه‌س نه‌سووزنيمن و وژدان و دڵ ئاگا بكوژيمن.

له‌ چنه‌ وه‌ختيگ تام كاره‌يل خه‌يرخوازانه‌ له‌ ناونی تامه‌يل ژه‌هردار تێكه‌ڵاو ئه‌دێ‌ و له‌زه‌تيگ ئه‌رای نامينێ. وه‌لی له‌ لايه‌ن كومه‌ڵايه‌تیه‌و، هه‌ر هاوڵاتیگ حه‌ق دياری و تايبه‌ت وه‌خوه‌ی ديرێد وه‌‌ گوره‌ی ياسا و ده‌ستوور مه‌ده‌نی و كومه‌ڵايه‌تی و ناوده‌وڵه‌تی، تا بتويه‌‌نێ گشت حقووق ئنسانی و‌ فه‌ردی له‌ وڵاته‌گه‌ی زامن بكاد، و سوود و نه‌ف له‌ گشت لايه‌نه‌يل خزمه‌تگوزاری و‌ ئه‌من و ئاسايش بواد، وه‌لی  وه‌داخه‌و هاوڵاتی عراقی ك له‌ بان ده‌ريايگ له‌ سه‌روه‌ت و سامان و دارايی و پاشه‌كه‌فت نه‌فتی ژيه‌ێد، ئاست ژيانی وه‌ نسبه‌ت ‌ وڵاته‌يل هاولفی له‌ پله‌ی نزميگ وه‌سه‌ر ئه‌واد و‌ به‌رده‌وام وه‌ ئه‌زره‌ت و ئوميده‌و باس ژيان وڵاته‌يل هاوسا ئه‌كاد و له‌‌ ئاسانترين و ساده‌ترين خزمه‌تگوزاری جوور‌ ئاو و كا‌ره‌با و ريگه‌وبان و ئه‌من و سه‌قام بيبه‌ش كرياگه‌.

فره‌ جار وه‌ل خوه‌يه‌و ئه‌يژێد ئی هه‌مگه‌ سه‌روه‌ت و سامان وڵاته‌گه‌مه‌ ك شوون ده‌سی دياری نيه‌ ئه‌رای كووره‌ ئه‌چێد و‌ له‌ چ‌ بواریگ خه‌رج ئه‌كريه‌ێد و‌ ئه‌رای چه‌ نه‌بايه‌د جوور باقی وڵاته‌يل بژيه‌يمن، وه‌ داخ و حه‌سره‌ت باس جوانی عيشه‌تيان ئه‌كه‌يمن و‌ فريه‌ ئه‌رايه‌يل تر، ك هيچ كاميان جواو رازيكه‌ريگ ئه‌رای نه‌يرن و زووان له‌ جواوی كوڵه‌ و هيچ بيانگيگ قه‌بول ناكاد.‌ ته‌نيا ريگه‌چاره‌، ده‌سنيشان كردن ئنسانه‌يل خاو‌ن پيشه‌ و شاره‌زا و وه‌ توانا و ده‌سپاك و دڵسووز و فه‌داكاره‌ ئه‌را وه‌ڕێه‌وبردن كاروبار حكوومی و كومه‌ڵايه‌تی، وه‌ ئستفاده‌ی دروس و وه‌جی خه‌يرات و سامانه‌يل له‌ پروژه‌يل ئاوه‌دانی و جيوه‌جيكردنيان له‌ زويترين وه‌خت، تويه‌نی له‌ بار گرفته‌يل هاوڵاتيه‌يل كه‌مه‌و بكاد و وڵات وه‌ره‌و نوا بواد.

وه‌ مه‌رج  ڕێزگرتن له‌ ماف يه‌كتره‌كی و‌ هويره‌وكردن و‌ه‌ به‌رژه‌وه‌ندی گشتی له‌ نوای به‌رژه‌وه‌ندی فه‌ردی و دويره‌وكه‌فتن له‌ هوير زياده‌خواستن، و‌ لێره‌و زووان زه‌ڵه‌ی نيه‌ بويژێ ئه‌رای چه‌؟