له‌ كاملا بگه‌ردمه‌ شوون به‌خته‌وه‌رى خوه‌ما؟

شفق نيوز

به‌دبه‌خت و نه‌گبه‌تم. ئى قسه‌یله‌ فره‌جار ژنه‌فیمنه‌ى، به‌عزه‌جایگ  جیاوازى ناونى ئى دو هسه‌ شایه‌ت ته‌نیا چه‌ن سه‌عاتیگ بووگ. ئنجا ئاساییه‌ ك ئاست و جوور هسه‌یل جاریگ وه‌ره‌و ژویه‌ر و جاریگ وه‌ره‌و خوار بچوگ، وه‌لى وه‌ختى وه‌زع ئومید و ئامانجه‌یل گه‌ورامان وه‌و جووره‌ نه‌چووگ ك خوه‌مان ئاره‌زووى كه‌یم، دى نوڕید پرسیار له‌باوه‌ت به‌خت و چاره‌نویس ئاراسته‌ى خوه‌مان كه‌یم و ئویشیم: ئنجا له‌كاملاو چوین بگه‌ردمه‌ شوون به‌خته‌وه‌رى خوه‌ما؟ ئایا هووكار ئى به‌دبه‌ختیمه‌ بایه‌سه‌ چه‌ بووگ و كییه‌؟ یا شایه‌ت قسمه‌ت و نسیوم له‌یوا هاوردویگ ؟ ت بویشید ماڵه‌ تازه‌گه‌م ئى هه‌مگه‌ نه‌گبه‌تیه‌ وه‌ل خوه‌یا ئه‌ڕام هاوردویگ ؟
با ده‌س وه‌پى بكه‌یم وه‌و شیوازه‌یل نه‌ریته‌ ك له‌ناو كومه‌ڵگا هه‌ن وه‌ك قسمه‌ت و نسیو، ك فره‌جار ژنه‌فیمنه‌ى. تاریف ئى قسه‌ هه‌رچى بووگ، ئه‌وه‌ له‌و هیزه‌ یا له‌و ده‌سڵات نادیار نه‌ناسریاگه‌ ده‌رنیه‌چووگ ك بڕیار له‌بان ژیان مه‌ردم ده‌یگ : كوڕ و دویه‌تیگ ره‌سنیگه‌ یه‌ك یا وه‌چه‌واشه‌وه‌ جیایى خه‌یگه‌ ناونیان، یا كه‌سیگ تویش كاره‌ستیگ ئه‌كا، یا ریككه‌فت(سودفه‌)یگ تیه‌ریگ ....هتد، وه‌لى ئه‌گه‌ر بایگ و له‌ڕوى دینیه‌وه‌ ته‌ماشاى ئه‌و هیزه‌ بكه‌یم، دوینیم ك بیجگه‌ هیز خاس ك خواده‌وه‌نده‌و هیز خراویش شه‌یتانه‌ هیزیگ تریش خاوه‌ن بڕیار ژیان ئیمه‌س ك ئه‌ویش قسمه‌ت ونسیوه‌. ئى ده‌سڵاتیشه‌ ركابه‌رى هه‌ردوگ هیزه‌گه‌ى تر ئه‌كا.
ماناى ئه‌وه‌سه‌ هیزیگ سێیم هه‌س، وه‌لى ئایا پیكهاته‌ى ئى هیز و ده‌سڵاته‌ بایه‌سه‌ چه‌ بووگ و سه‌رچه‌وه‌گه‌ى له‌كاملاوه‌ بووگ؟ ئایا په‌یوه‌ندى ئى هیزه‌ وه‌ ئه‌و هه‌ردوگ هیزه‌یل تره‌وه‌ چه‌سه‌و چوینه‌؟ جواو ئى پرسیاره‌یلیشه‌ هه‌ركه‌سیگ له‌ بنه‌ماى ئایدۆلۆژى و دینى خوه‌یه‌وه‌دیارى ئه‌كا، ئنجا هه‌رچه‌نى دینیش پیكهاته‌و ده‌سڵات و چشته‌یل تر فره‌یگ  له‌باوه‌ت قسمه‌ت و نسیو وه‌ ته‌واوى دیارى نه‌كردگه‌، وه‌لى ئایا وه‌ڕاسى قسمه‌ت و نسیو كاریگه‌ره‌ له‌ ژیانمان؟
له‌ى باوه‌ته‌وه‌ دوینید باس له‌وه‌ كه‌ن و ئویشن: ئایا شێخ یا فاڵگریگ  بووگ بتویه‌نیگ قاپى به‌ختم واز بكا؟ وه‌رجه‌ ئه‌وه‌ك جواو ئى پرسیاره‌ به‌یمنه‌وه‌، خاستر ئه‌وه‌سه‌ له‌خوه‌مان بپرسیم: ئایا خود ئه‌و كه‌سه‌ ك تویه‌نیگ قاپى به‌خت ئیمه‌ واز بكا، خوه‌ى چه‌نیگ به‌خته‌وه‌ره‌؟ له‌ چ وه‌زعیگ ده‌روینى و كومه‌ڵایه‌تى ژیه‌یگ ؟
كه‌سیگ ك بتویه‌نیگ به‌خته‌وه‌رى ئه‌راد بوینیگه‌وه‌، ئه‌وه‌ بایه‌سه‌ خود خوه‌ى فره‌ به‌خته‌وه‌ر و به‌ختدار بووگ، تا بتویه‌نیگ به‌شیگى به‌یگه‌ تنیش یا هه‌مان ڕى به‌خته‌وه‌رى نیشاند به‌یگ ، وه‌لى بیگومانیم له‌وه‌ك گشت ئه‌وانه‌ك ڕى شادى و به‌خته‌وه‌رى نیشان مه‌ردم ده‌ن، خاوه‌ن كیشه‌و گرفت و سه‌ركه‌فتن و شكه‌ست خوه‌یانن، بیگومان ئه‌وانیش سه‌عاتیگ خه‌نن و سه‌عاتیگیش گیرن، جاریگ شكایه‌ت كه‌ن و جاریگیش باوه‌ش كه‌نه‌ ژیانا. ماناى ئه‌وه‌سه‌ ئه‌گه‌ر ئه‌وانه‌ نه‌تویه‌نن ده‌سمیه‌تم بیه‌ن و هووكاریگ نه‌ون ئه‌را به‌خته‌وه‌رییم، ئه‌ى هووكار وچاره‌ چه‌س؟ شایه‌ت خوه‌م گوناهیگ یا غه‌ڵه‌تیگ له‌یوا كردویم، ك یه‌یش سزایگ خوادیى و ژیانى ڕه‌فتاره‌یل خوه‌م بووگ؟ شایه‌ت خوه‌م كه‌سیگ  خراو بووم و هه‌ر شایسته‌ى ئه‌وه‌ بووم.
له‌یرایش مه‌به‌سمان ئه‌و نیه‌ ك ته‌نیاو هه‌میشه‌ خود خوه‌مان وه‌رپرس و هووكاریم له‌وه‌ك ڕوى وه‌ڕویمان بووگه‌وه‌، به‌ڵكوو مه‌به‌س له‌وه‌سه‌ ك جواویگ له‌ خوه‌مان و هووكاره‌یل واقعى ده‌وروه‌رمان بیه‌یمنه‌وه‌، نه‌ك هه‌میشه‌ بگه‌ردیمنه‌ شوون هیزیگ یا ده‌سڵاتیگ ك هویچ كه‌س نیه‌تویه‌نیگ ئسپات وجوودى یا نه‌وینى بكا. وه‌ل ئه‌وه‌یشا ئویشیم ژیان هوچ وه‌ختیگ نیه‌تویه‌نیگ ده‌س ئه‌ڕاد دریژ بكا ئه‌گه‌ر تن ده‌س یارمه‌تى ئه‌را خوه‌د دریژ نه‌كه‌ید و ده‌سمیه‌ت خود خوه‌د نه‌یه‌یدو ئه‌گه‌ر نه‌زانید چه‌ تواید، ئامانجد چه‌س، گامه‌یلد چوین ئه‌ڵگرید. هه‌ر له‌وه‌ر ئه‌وه‌یش ئه‌را گوزه‌یشته‌ مه‌گیر، ته‌ماشاى سوو بكه‌.