گله‌وخواردن له‌ جیهاد

شفق نيوز

  ئیسه‌ كوردستان روى وه‌ڕوى دیارده‌یگ بووده‌و ك وڵاته‌یل عه‌ره‌بى له‌ سه‌ره‌تاى ساڵه‌یل نه‌وه‌د تویشى هاتن. عه‌ره‌ب ناو ئه‌وه‌ ناوینه‌" عه‌ره‌ب ئه‌فغان " ك پیكهاتوین له‌و ره‌وت و ریكخریاگه‌یله‌ ك به‌شدارى كردوین له‌ جیهاد ئه‌فغانى و دویاى نه‌مه‌ندن جیهاده‌گه‌و ساقه‌وبوین روخسار سیاسى ئه‌فغانى و دویاى خوه‌یكیشانه‌وه‌ى سۆڤێت گله‌وخواردوین ئه‌را وڵاته‌یل خوه‌یان.

ئه‌وانه‌ بڕیگ له‌لیان وه‌ مه‌شق و په‌ره‌داین سه‌رله‌نوو تیكه‌ڵ كوومه‌ڵگایى ئاسایى وڵاته‌یلیان بوین و بڕیگیانیش وه‌و ئه‌قڵیه‌ت ئه‌فغانستانه‌و بوینه‌ دروسكه‌ر ریكخریاگ ترۆریستى ناوخوه‌یى و بڕیگیش له‌لیان وه‌و ئه‌زموون تیه‌ڵه‌و په‌یڕه‌و ره‌وتیگ نه‌رمتر سیاسى كردن، ك شایه‌ت شاره‌زایه‌یل دیارده‌ى ئسلام سیاسى خاستر له‌لى بزانن.

ئنجا له‌یرا پرسیار ئه‌وه‌ كه‌یم ك ئایا ئه‌وانه‌گ له‌ سوریا گله‌وخوه‌ن وه‌ شماره‌ى فریه‌یگه‌و، بوونه‌ سه‌ره‌تاى دیارده‌ى" كورد داعش "، یا كورد ئه‌فغان و سه‌رژانیگ تازه‌ ئه‌را ئه‌و سیستم سیاسى و ئاسایشه‌ ك مقه‌یه‌تى له‌ ئه‌زموون دیموكراسى كوردستان كردگه‌؟

جوور ئه‌وه‌ك له‌ رویداگه‌یل ئى دویاخره‌ ده‌ركه‌فید، تووڕ گله‌وخوه‌ره‌یل به‌ره‌ى نوسره‌ ك 36 كه‌سیان ده‌سگیر كریانه‌، ده‌سكرده‌سه‌ ئیچنه‌ هه‌وڵیگ . هه‌ر له‌وه‌ر ئه‌وه‌یش بیجگه‌ له‌ چاره‌سه‌ر ئاسایشى شايه‌ت كوردستان ئه‌را نواگرتن له‌ى دیارده‌ى هه‌ڕه‌شه‌ ئاسا هه‌وه‌جه‌ بڕیگ چاره‌سه‌ر تر داشتوود.

بڕیگ له‌ وڵاته‌یل عه‌ره‌بى لیژنه‌ ئه‌را دوباره‌ گله‌وداین ئه‌و مه‌ردم خه‌ڵه‌تیاگه‌ مه‌ردم دامه‌زرانن تا گله‌و بخوه‌ن ئه‌را بان ڕى ئاسایى ژیان و بوونه‌ ئه‌ندام كه‌ڵكدار كوومه‌ڵگایان، وه‌ل ئه‌وه‌یشا ئه‌را بڕیگیانیش ك چاره‌یان ناكریه‌ید ڕى وشوون ئاسایشى و یاسایى له‌وه‌ر گرتن له‌وه‌ر خاتر مقه‌یه‌تیكردن له‌ كوومه‌ڵگا.

ئنجا گله‌ه‌وخوه‌ره‌یل داعش ته‌نیا هه‌ڕه‌شه‌یگ ئاسایشى نیین، به‌ڵكوو ئه‌یانه‌ هه‌ڕه‌شه‌ن له‌بان كورده‌وارى و كوردستان ئازادیش. هه‌ر له‌وه‌ر ئه‌وه‌یش بایه‌سه‌ ئه‌و كوناو كه‌لینه‌یله‌ سواق بیه‌یم ك بوونه‌ ئه‌سپ ته‌رواده‌ى دزه‌كردن ناو قه‌ڵاگه‌مان، ك جیگیركردن ئاشتى كوومه‌ڵایه‌تى و سیاسى و په‌ره‌داین وه‌ ئه‌زموون دیموكراسى و حوكمڕانى كوردستانیش مه‌رج گرینگن له‌ى مه‌سه‌له‌.

ستران عه‌بدوڵڵا

ج . أ