ساڵ، ساڵ كورده‌

شفق نيوز

ك باوه‌ڕه‌م ئه‌وه‌سه‌ له‌ قوناغ ئیسه‌ ئه‌و به‌ش كوردستان گه‌ورا هه‌وه‌جه‌ى فره‌یه‌یگ دیرید وه‌ هاوكارى و پشتگیرى تا نه‌وده‌ پایه‌یگ ئه‌را یه‌كلاكردنه‌وه‌ى هساو وڵاته‌یل ناوچه‌گه‌و سه‌رله‌نوو كورد بلكیه‌یده‌ یه‌كه‌و.

ئه‌مڕوو كورد بویه‌سه‌ واقعیگ له‌وه‌رده‌م نه‌خشه‌ى خوه‌رهه‌ڵات ناوین، ك مه‌حاڵه‌ ئى قوناغیشه‌ وه‌ پیلان و ریككه‌فتننامه‌ى ژیر وه‌ ژیر هه‌رێمى گه‌زه‌ر بكریه‌ید.

وه‌ل ئه‌وه‌یشا كۆنگره‌ى نه‌ته‌وه‌ییش گامیگ تر بوى ك له‌ى قوناغ پڕ له‌ نازگیه‌ هه‌ڵویست یه‌كگرتگى نه‌ته‌وه‌ى كورد وه‌ دونیا نیشان دا، ك یه‌یش فریه‌ گرینگه‌و گشت پارچه‌یل كوردستان له‌بان یه‌ك مێز گرده‌و كردو پڕیش بوى له‌ پشتگیریكردن دووسه‌یل و ده‌نگ كورد له‌ ده‌یشت و گشت جه‌هان وه‌گشتى.

ئنجا ئه‌گه‌ر ده‌وڵه‌ت یه‌كگرتگ كوردییش دروس نه‌ود، ئه‌وه‌ نه‌ته‌وه‌ى كورد هه‌ر جوور نیشتمان عه‌ره‌بى له‌ ناوچه‌گه‌ سه‌ر هه‌ڵده‌ید وه‌ ره‌تگ و ئایدیاو ئاڵاى جیاواز، وه‌لى وه‌ل ئه‌وه‌یشا خواست و هه‌وه‌جه‌یشه‌ ك پشتگیرى و یه‌كگرتگى له‌ هه‌ڵویست وجوود داشتوور و له‌یه‌ودویا جه‌نگ ناوخوه‌یى بووده‌ چشت حه‌رام و عه‌یبیگ ، دى كورد بایه‌سه‌ بگه‌ردیده‌ شوون به‌خته‌وه‌رى و ژیان له‌گشت پارچه‌یل و دى بوو كوشتار و ئه‌نفال ناید.

له‌وساوه‌ دونیا دونیاس، ملله‌ت كورد له‌ناو بریاگه‌و هه‌میشه‌ خوینى رشیاگه‌و ماڵى ویران بویه‌، وه‌ل ئه‌وه‌یشا هه‌رچى شیواز جه‌نگ و له‌ناوبردن هه‌س گشتى له‌بانى جیوه‌جى كریاگه‌، وه‌لى ئیجاره‌ قه‌ده‌ر ها وه‌ل كورداو ساڵیش ساڵ كورده‌، وه‌ مه‌رجیگ له‌ناو خوه‌یان یه‌كگرتگ بوون.

كه‌نعان به‌هادین

ج . أ