ده‌ور جایه‌ڵ له‌پیشكه‌فتن كومه‌ڵگا

شفق نيوز

له‌ڕى ئه‌و هیز و توانایه‌وه‌ خزمه‌ت وه‌ كومه‌ڵگا بكاو بووه‌یگه‌ى وه‌ره‌و ئاراسته‌ى خاسیگ ؟ ئایا جایه‌ڵ كورد نوڕیگه‌ ئاینده‌وه‌و چ به‌رنامه‌و پلانیگ دیریگ ئه‌را خزمه‌تكردن وه‌خوه‌ى و كومه‌ڵگا؟ حكوومه‌ت و لایه‌ن وه‌رپرس چ ده‌وریگ داشتنه‌ ئه‌را داین هه‌ل خاسیگ  وه‌ جایه‌ڵه‌یل؟

بیگومان تائیسه‌ جایه‌ڵه‌یل نه‌ڕه‌سینه‌سه‌ ئه‌و ئاسته‌ ك ئبداع خوه‌یان نیشان بیه‌ن و گام وه‌ره‌و تازه‌گه‌رى و پیشكه‌فتن بنه‌ن. چوینكه‌ جایه‌ڵ له‌وڵات خوه‌مان گرنگى یا ئه‌همیه‌ت خاسیگ  وه‌پى نیه‌دریه‌یگ و یه‌یش له‌یوا ئه‌كا جایه‌ڵه‌یل گووشه‌گیر بوون و هویر له‌ داهینان یا ئبداع و خزمه‌تكردن و دویاڕووژ خوه‌یان و وڵاته‌گه‌یان نه‌كه‌ن.

شماره‌ى فره‌یگ له‌ جایه‌ڵه‌یلمان هویچ به‌رنامه‌و پلانیگ نه‌یرن و خه‌ریك هویچ پیشه‌یگ نین، وه‌ل ئه‌وه‌یشا وه‌ختى باس خوه‌ندن و رووشنهویربوین ئه‌ڕایان كه‌ن گه‌مه‌یان تیه‌یگ وه‌ قسه‌گه‌و هه‌ر خه‌ریك خه‌و و پیاسه‌كردنن، یه‌یش له‌وه‌ختیگ جایه‌ڵه‌یل فره‌یگ رووشنهویر دیریم ك خاوه‌ن ئبداعن و هه‌وڵ فره‌یگ دانه‌.

له‌وڵاته‌یل تر جایه‌ڵ جوان كار ئه‌كاو خه‌ریك خزمه‌تكردن و داهینانه‌، یه‌یش له‌وه‌ر خاتر ژیانیگ خاستر و پیشكه‌فتن ئه‌را كومه‌ڵگاگه‌ى، وه‌لى نوڕید جایه‌ڵ جوانه‌یل ئیمه‌ خه‌مسه‌ردن و هویر له‌خزمه‌تكردن و ئاینده‌ى وڵاته‌گه‌یان ناكه‌ن، هه‌ڵبه‌ته‌ هووكاره‌یل فره‌یگ هه‌ن ك له‌یوا كردگه‌ جایه‌ڵه‌یل وڵات ئیمه‌ له‌یوا بیزار بوون و پیشكه‌فتن وه‌خوه‌یانه‌وه‌ نه‌وینن، له‌وانه‌یش: كه‌مى هوشیارى و رووشنهویرى له‌لاى جایه‌ڵ و نه‌وین په‌روه‌رده‌یگ خاس له‌ناو خیزان. له‌لایگ تریشه‌وه‌ ئه‌و كیشه‌و گرفته‌یله‌ ك روى وه‌ڕوى جایه‌ڵ بوونه‌وه‌ هووكارن ئه‌را ئه‌وه‌ك جایه‌ڵ هه‌وڵ نه‌یه‌یگ  وه‌ك: نه‌وین ده‌سمیه‌ت و پشتگیرى نه‌كردن له‌ جایه‌ڵ له‌لایه‌ن حكوومه‌ت و لایه‌ن وه‌رپرس، ك یه‌یش له‌یوا كردگه‌ جایه‌ڵ بى ئومید بووگ و هویر له‌خزمه‌تكردن نه‌كه‌ن، ك هه‌رچه‌نى جایه‌ڵه‌یلیش تاڕاده‌یگ كه‌مته‌رخه‌من له‌ئاست داواكاریه‌یل خوه‌یان تا حكوومه‌ت بتویه‌نیگ هه‌ق خوه‌یان وه‌پیان به‌یگ ئه‌را ئه‌وه‌ك جایه‌ڵ جوانه‌یل وڵات ئیمه‌یش به‌رهه‌مهاوه‌ر و خاوه‌ن ئبداع بوون.

هه‌ر له‌وه‌ر ئه‌وه‌یش بایه‌سه‌ له‌بان حكوومه‌ت و لایه‌ن وه‌رپرس وه‌ شیوه‌ى خاسیگ كار بكه‌ن له‌بان ئه‌وه‌ك گشت ئه‌و هه‌وه‌جه‌یله‌ دابین بكه‌ن ك جایه‌ڵ نیاز وه‌پى دیریگ  ئه‌را نیشانداین ده‌ور خوه‌یان. وه‌ل ئه‌وه‌یشا په‌یاكردن زه‌مینه‌ى گونجیاگیگ ئه‌را جایه‌ڵ جوانه‌یل له‌یوا ئه‌كا جایه‌ڵ هویر له‌ ئامانجه‌یلى بكاو گشت توانایه‌یل خوه‌ى بخه‌یگه‌ كار له‌وه‌ر خاتر وه‌ره‌ونوابردن خوه‌ى و كومه‌ڵگاگه‌ى. له‌وه‌ر ئه‌وه‌ دڵنیایم له‌وه‌ك ئه‌گه‌ر حكوومه‌ت پشتگیرى خاسیگ جایه‌ڵه‌یل بكا، ئه‌وه‌ بیگومان جایه‌ڵه‌یلمانیش كار كه‌ن و خزمه‌ت ره‌سننه‌ وڵاته‌گه‌یان، چوینكه‌ جایه‌ڵ كورد هیز وتواناى خاسیگ دیریگ ئه‌را پیشخستن كومه‌ڵگا ئه‌گه‌ر بایگ گرنگى یا ئه‌همیه‌ت خاسیگ وه‌پیان بدریه‌یگ و پشتگووش نه‌خریه‌ن.