بڕيارێگ خاس ئه‌را هه‌ڵه‌وگه‌ردانن ماف كورده‌يل فه‌يلی

شفق نيوز

وه‌ چه‌و خوه‌يان فره‌ له‌و بڕياره‌يل نادادپه‌روه‌رانه‌و زاڵمانه‌ ك‌ دژ وه‌ بڕێگ له‌ چينه‌يل عيراق وه‌ تايبه‌ت نه‌ته‌وه‌ی كورد، دين.

 

بڕێگ له‌ی بڕياره‌يله‌، وه‌ده‌س ليژنه‌ی كاروبار باكوور ده‌ركرياو جيوه‌جی بوی، يه‌يشه‌ وه‌ رووشنی سياسه‌ت گه‌ن و دژ وه‌به‌شه‌ر بوين به‌عس ئاشكرا ئه‌كا.

برياره‌يل لێژنه‌ی باكوور، زيان فره‌يگ ئه‌را نه‌ته‌وه‌ی كورد وه‌ تايبه‌ت كورده‌يل فه‌يلی له‌ وانه‌يش پاكه‌و كردن ناسنامه‌ی نه‌ته‌وه‌يی، زه‌فت و ده‌س گرتن وه‌سه‌ر ماڵ وداراييانا و ...تد. وه‌ليا بوی.

وه‌ی ئه‌ساسه‌، ئه‌نجوومه‌ن وه‌زيران ده‌وڵه‌ت ئيسه‌ی عيراق قه‌راردان ته‌مام ئه‌و بڕياره‌يله‌ ك لێژنه‌ی باكوور له‌ باوه‌ت مال وموڵك نه‌ته‌وه‌يل تره‌ك جيا له‌ عه‌ره‌و ده‌ريان كرديه‌، گشتيان لابه‌يدو هه‌ڵوه‌شنيد، ئمجا له‌ لێژنه‌ی جيوه‌جی بوين مادده‌ی ١٤٠ ده‌ستوور هه‌ميشه‌يی عيراق بخوازێد ئه‌ی هاوڵاتيه‌يله‌ قه‌ره‌بو بكا.

لاوردن و ئه‌وسڕين و هه‌وه‌شانن ئه‌ی بڕياره‌يل لێژنه‌ی باكوور ته‌مام زويه‌يل پارێزگای كه‌ركوك وه‌ خاوه‌نه‌يل خوه‌يان هه‌ڵه‌وگه‌ردنێد. يه‌يشه‌ له‌ جی خوه‌ی ئه‌ده‌ی مه‌مه‌ر يه‌گ چه‌رخ پێشه‌ و  گه‌شه‌كردن له‌ كه‌ركوك( ك وه‌ نه‌ته‌وه‌يل جياوه‌جياو كورد وعه‌ره‌و و تركمان و ...تد ناوداره‌) بكه‌فێد جويله‌.

له‌ لای تريشه‌و، لاوردن ئه‌ی بڕياره‌يله‌ گامێگ ئيجابی و ئازايانه‌و نه‌ترسانه‌س ك‌ له‌ ده‌وڵه‌ت عيراق وه‌ هساو ئه‌يادو يه‌ك پارچه‌بوين هاوڵاته‌يله‌ به‌رزه‌و ئه‌كا و  چاره‌سه‌رێگه‌ ئه‌را كێشه‌يل ناونی نه‌ته‌وه‌يل جياوه‌جيا له‌ عيراقه‌.

هه‌وه‌جه‌ وه‌ يه‌ ئه‌يرێد ك له‌يره‌ وه‌ يه‌ ئيشاره‌ بكريه‌يد ك ئه‌نجوومه‌ن وه‌زيره‌يل له‌ گرده‌وبوينێگ وه‌ ئه‌ی خاڵ ره‌سين تا ته‌مامی بڕياره‌يل گه‌ن و ناحه‌ق رژيم به‌عس له‌دژ كورده‌يل فه‌يلی له‌ ناو بوه‌ن و هه‌ڵوه‌شيه‌يد.

رژيم به‌عس هه‌ وه‌ ئه‌ی بڕياره‌يل زاڵمانه‌ی لێژنه‌ی باكووره‌ له‌ شوون وه‌ بوی تا هاوژيانی مێژوويی و كۆمه‌لايه‌تی نه‌ته‌وه‌يل جياوه‌جيا له‌ پارێزگای كه‌ركوك له‌ ناو بوه‌يد.

بڕيار ئه‌نجوومه‌ن وه‌زيره‌يل عيراق له‌ باوه‌ت هه‌ڵوه‌شانن ئه‌و بڕياره‌يله‌ ك ئه‌نجوومه‌ن سه‌ركردايه‌تی رژيم به‌عس و لێژنه‌ی باكوور دايه‌، بڕيارێگ مێژويی و گامێگ ئيجابی ئه‌را هه‌ڵه‌وگه‌ردانن مافه‌يل هاوڵاته‌يله‌ له‌ عيراق وه‌ هساو ئه‌ياد.

سه‌رۆك هه‌رێم كوردستان(مه‌سعود بارزانی) ئه‌ی بڕيار ئه‌نجوومه‌ن وه‌زيره‌يل عيراقه‌ وه‌ گامێگ گرنگ زانێده‌ی و له‌ ئه‌نجوومه‌ن وه‌زيره‌يل ئه‌خوازێ تا بڕيار خوه‌يان له‌ باوه‌ت هه‌ڵه‌وگه‌ردانن مافه‌يل بنه‌ڕه‌تی هاوڵاته‌يل عيراق بيه‌ن.

خاستره‌كه‌ وه‌ ئه‌ی مه‌سه‌له‌يشه‌ ئشاره‌ بكريه‌يد ك ئه‌نجوومه‌ن وه‌زيره‌يل چه‌نێگ وه‌رجله‌ ئيسه‌ له‌ وه‌زاره‌ته‌يل و ته‌مام ده‌موده‌زگايل ده‌وڵه‌تی تواس تا وه‌ شێوه‌ێگ جددی وه‌ بڕياره‌يلێگ ده‌وڵه‌ت له‌ باوه‌ت مه‌سه‌له كورده‌يل فه‌يلی دايه‌، وه‌ليان مامله‌ بكه‌ن تا ته‌مام كێشه‌يل كورده‌يل فه‌يلی له‌ باوه‌ت هه‌ڵه‌وگه‌ردانن مافه‌يل بنه‌ڕه‌تی خويان چوی ناسنامه‌ی عيراقی و... ك له ده‌موده‌زگايل ده‌وڵه‌تی وه‌ليا رويوه‌روی دۆن، دويايی وه‌ پێ بارن.

ئه‌نجوومه‌ن وه‌زيره‌يل بڕێگ له‌ وه‌زاره‌ته‌يل ده‌وڵه‌ت وه‌ مه‌مه‌ر جيوه‌جی كردن بڕێگ له‌ ياسايل ك ده‌وڵه‌ت وانه‌ هه‌ڵوه‌شانيه‌، ره‌خنه‌ ئه‌كا و له‌وانه‌ ئه‌خوازێد تا وه‌ شيوه‌ێگ فره‌ جددی بڕياره‌يل ئه‌نجوومه‌ن وه‌زيره‌يل له‌ باوه‌ت كورده‌يل فه‌يلی جيوه‌جی بكه‌ن.

ئه‌ی چنه‌ چشتێگ له‌ لايه‌ن ده‌وڵه‌ت عيراقه‌و، جويله‌ێگ پۆزۆتيڤ ئه‌را له‌ ناوبردن شوونه‌واره‌يل به‌عس له‌ وڵات و هه‌ڵه‌وگه‌ردانن مافه‌يل بنه‌ڕه‌تی هاوڵاتيه‌يل له‌ وڵات وه‌ هساو ئه‌ياد.

محه‌مدعه‌لی سه‌ماوی