سه‌ركه‌فتگ

شفق نيوز

  مه‌سه‌له‌ى دیموكراسى ته‌نیا سه‌ركه‌فتن نیه‌، به‌ڵكوو سه‌رنه‌كه‌فتنیشه‌ جوور هه‌ر گه‌مه‌یگ تر. هه‌ر له‌وه‌ر ئه‌وه‌یش نادێ ته‌نیا وه‌ مه‌رج سه‌ركه‌فتن بچیده‌ ناو پرووسه‌ى دیموكراسیه‌و.

بایه‌سه‌ له‌ هه‌مان وه‌خت باوه‌ڕ وه‌ سه‌رنه‌كه‌فتنیش داشتوید و ئه‌و ئاكامیشه‌ وه‌ ئاسانى قه‌بول بكه‌ید. ئنجا ئى پرووسه‌ چوینكه‌ له‌لاى ئیمه‌ تاڕاده‌یگ پرووسه‌ى تازه‌یگه‌، دوینید له‌لاى زوورممان وه‌ ئاسانى له‌لى نه‌ڕه‌سیمنه‌سه‌وه‌و هه‌وه‌جه‌ وه‌ وه‌خت دیرید تا گشت لایگ وه‌ ئاسانى له‌لى بڕه‌سنه‌و.

له‌ وڵاتیگ ك تاریخ پیاده‌كردن دیموكراسى له‌تى خاوه‌ن تاریخه‌، ئى مه‌سه‌له‌ فریه‌ وه‌ئاسایى گوزه‌ر ئه‌كاو له‌هه‌مان وه‌خت وه‌بى كیشه‌و گرفت چووده‌ رییه‌و، ئنجا لایه‌ن سه‌نه‌كه‌فتگ یه‌كه‌مین لایه‌نه‌ ك پیرووزبایى له‌ لایه‌ن سه‌ركه‌فتگ ئه‌كا.

دى دوینید هه‌ر له‌شوون ته‌واوبوین هه‌ڵوژاردن و ئاشكراكردن ئاكامه‌یلى، بار وڵات ئاساییه‌و ئه‌دێ و دى هاووڵاتیه‌یلیش خه‌ریك كاروبار رووژانه‌ى خوه‌یانن و چه‌وه‌ڕى خولیگ تر هه‌ڵوژاردن ئه‌كه‌ن.

وه‌ل ئه‌وه‌یشا لایه‌ن سه‌رنه‌كه‌فتگ رووژانه‌ وه‌ ناڕه‌وا تانه‌ له‌ ئاكامه‌یل هه‌ڵوژاردن نایه‌یدو هویر له‌وه‌ ئه‌كا ك بزانید هووكار و كه‌م و كوڕیه‌یل سه‌رنه‌كه‌فتنى له‌ كوورا دوینیده‌و دقه‌ت به‌رنامه‌یل هه‌ڵوژاردن خوه‌ى ئه‌یاد و ئه‌كه‌فیده‌ شیه‌وكردن كاره‌یلى و مینه‌ى غه‌ڵه‌ته‌یل خوه‌ى ئه‌كاو فریه‌یش وه‌ ئاسایى جام سه‌نه‌كه‌فتن خوه‌ى نووشید و یه‌قه‌ى مه‌ردم تر ناگرید.

ئنجا لایه‌ن سه‌ركه‌فتگیش دى بایه‌سه‌ جوور وڵاته‌یل دیموكراتى نه‌كاده‌ى به‌زم و شانازیكردن له‌بان لایه‌نه‌یل تر و له‌جیاى نوقڵ به‌خشین گڕ وه‌ربیه‌ید له‌ ئاسمان وڵات و وه‌فیشه‌ك و ئاڕبیجى گوزارش له‌ خوه‌شى خوه‌ى بكا ك فریه‌جار كاره‌سات خه‌مین له‌لى ئه‌كه‌فیده‌وه‌و چه‌نه‌ها كه‌س له‌تى بوونه‌ قوربانى و خوه‌شى له‌ مه‌ردم ئه‌كاده‌ شیوه‌ن و دویاخریش وڵات وه‌رگ خه‌م پووشید، بیگومان ئه‌یه‌ شیوازیگ ناپه‌سه‌نه‌ ئه‌را نیشانداین خوه‌شى ك ئومیده‌واریم ئه‌و دیارده‌یل ناشرینه‌ له‌ وڵات ئیمه‌ نه‌مینید.

له‌ جه‌هان گه‌مه‌، لایه‌ن سه‌ركه‌فتگ فریه‌ وه‌ گورجى بان مێز وازى هیلیده‌ جى و له‌وه‌رانوه‌ر لایه‌ن سه‌رنه‌كه‌فتگ دانانیشید و گه‌مه‌ وه‌پى ناكا، ئنجا بایه‌سه‌ ئى سفه‌ته‌ له‌ گه‌مه‌ى دیموكراسییش هه‌ر وه‌و جووره‌ پیاده‌ بكریه‌یدو لایه‌ن سه‌ركه‌فتگ فریه‌ له‌شوونى نه‌چوودو خه‌ریك پیاده‌كردن به‌رنامه‌ى هه‌ڵوژاردن و قه‌وڵه‌یلى بوود ئه‌را هاووڵاتى.

سه‌لام عه‌بدوڵڵا

ج . أ