كورد وازیزانه‌ تازه‌گه‌ى خوه‌رهه‌ڵات ناوین

شفق نيوز

  مه‌سه‌له‌ى كوردستان و كیشه‌ى كورد چووده‌و ئه‌را چه‌نه‌ها سه‌ده‌، كورد وه‌ گووره‌ى رووژگار خاوه‌ن چه‌نه‌ها میرنشینى سه‌ر وه‌خوه‌ى بویه‌و تائیسه‌یش سێ حكوومه‌ت وه‌ ناو حكوومه‌ت كوردستان باشوور ساڵ 1922 وه‌ سه‌رۆكایه‌تى شێخ مه‌حموود و كومار كوردستان ساڵ 1946 وه‌ سه‌رۆكایه‌تى قازى محه‌مه‌د و حكوومه‌ت هه‌رێم كوردستان دویاى وه‌هار 1991 هاته‌سه‌ وجوودو ئیسه‌یش سه‌رۆك مه‌سعود بارزانى سه‌رۆكایه‌تى ئه‌كا.

یه‌كه‌م و سێیه‌م ئى حكوومه‌ته‌یله‌ كه‌فتنه‌‌ كوردستان باشوور و دویه‌میش له‌ كوردستان خوه‌رهه‌ڵات بوى. شووڕش و ئاگاداربوینه‌وه‌ى كورد له‌ باكوور و خوه‌رئاواى كوردستانیش هيمان تازه‌س.

بارزانیه‌یل له‌ بیسه‌یل سه‌ده‌ى وه‌رین له‌ گشت شووڕش و راپه‌ڕین و حكوومه‌ته‌یل كوردستان نه‌خش داشتنه‌، مسته‌فا بارزانى جوور سه‌ركرده‌و رابه‌ریگ هه‌ڵكه‌فتگ نه‌خش له‌ كومار مه‌هاباد داشت، ئى نه‌خشیشه‌ نه‌ك هه‌ر ته‌نیا جوور پاڵه‌وانیگ جه‌نگاوه‌ر و شووڕش، به‌ڵكوو ئه‌را یه‌كه‌مجار جوور رابه‌ریگ ستراتیجى نه‌ته‌وه‌یى و سیاسى و له‌وه‌ر یه‌كبوین كورد و یه‌ك مه‌سه‌له‌یى كوردستان به‌شدارى كرد.

بارزانی له‌شوون گله‌وخواردنى له‌ سۆڤێت وه‌رین، له‌ رابه‌رایه‌تى شووڕش ئه‌یلوول له‌ 11ى 1961 هه‌میشه‌ كار كردگه‌ تا كورد له‌گشت به‌شه‌یل كوردستان به‌شدارى له‌ شووڕش بكه‌ن و خوه‌یان وه‌ یه‌ك نه‌ته‌وه‌و یه‌ك مه‌سه‌له‌ بزانن، بارزانى نه‌مر جوور رابه‌ریگ كورد مامڵه‌ وه‌ل كورد گشت پارچه‌یل و پیكهاته‌یل تر ئایینى و نه‌ته‌وه‌یى كوردستان كردگه‌، هه‌ر له‌ سه‌رده‌م ئه‌ویش كریستانیه‌یل و ئێزیدیه‌یل و كاكه‌یى و شه‌به‌ك و توركمان و ته‌نانه‌ت عه‌ره‌بیش تویه‌نستن وه‌ شیوه‌یگ یه‌كسان و جوور برا به‌شدارى له‌ شووڕش بكه‌ن و نه‌خش وه‌رپرسیارێتى له‌تى نیشاندا.

ئى په‌یام ستراتیجیه‌ ئمڕوو وه‌شیوه‌یگ قویل و له‌ سه‌رده‌میگ تازه‌و جیا له‌ سه‌رده‌مه‌یل تر له‌لایه‌ن مه‌سعود بارزانى سه‌رۆك هه‌رێم كوردستانه‌و ئه‌را یه‌كه‌وخستن هه‌ڵویست سیاسى كورد و گامناین وه‌ره‌و چاره‌سه‌ر ئاشتیانه‌ى مه‌سه‌له‌ى كوردستان له‌ توركیاو شوونه‌یل تر ئه‌وه‌سه‌ كار ئه‌راى كریه‌ید.

سه‌ردانه‌گه‌ى مه‌سعود بارزانى ئه‌را ئامه‌دو دانیشتنى وه‌ل سه‌رۆك وه‌زیره‌یل توركیاو پیشكه‌شكردن وتار وه‌ زووان كوردى له‌ ڕى وڕه‌سمیگ ده‌وڵه‌تى وه‌ شیوه‌یگ فه‌رمى، نیشانه‌یگه‌ گه‌وراو تاریخى له‌ پیشكه‌فتن مه‌سه‌له‌ى كورد.

ماناى ئه‌وه‌سه‌ ئه‌وه‌ك سه‌رۆك بارزانى ئه‌نجامى ئه‌یاد، گامناینه‌ له‌وه‌ر خاتر هاوردنه‌وه‌ى كه‌رامه‌ت كه‌سایه‌تى تاك كورد و هه‌ڵسانه‌وه‌ى كورد وه‌ شیوه‌یگ تازه‌و سه‌رده‌میانه‌، دویر له‌ تون وتیژى و خوینڕشانن، دیاره‌ ئى كاره‌یلیشیه‌ جوور قه‌واره‌یگ ده‌ستوورى و یاسایى وه‌ناو" هه‌رێم كوردستان فیدراڵى له‌ عراق" ره‌سنیده‌ ئه‌نجام.

بیجگه‌ ئه‌وه‌یش ئه‌را یه‌كه‌مجاریشه‌ سه‌رۆك و رابه‌یگ كوردستان بتویه‌نید ئابوورى جوور چه‌كیگ بته‌و له‌وه‌ر خاتر مه‌سه‌له‌ى ره‌واى كورد باریده‌ كار وه‌ل ئه‌و وڵاته‌یله‌ ك خاك كوردستان له‌بانیان دابه‌ش كریا، هه‌ر له‌وه‌ر ئه‌وه‌یش تویه‌نیم بویشیم كورد وازیزانه‌ تازه‌گه‌ى خوه‌رهه‌ڵات ناوینه‌، ك ته‌نانه‌ت خود كورد یه‌كیگه‌ له‌ كویه‌نترین قوربانیه‌یل سیاسه‌ت له‌ناوبردن.

غازى حه‌سه‌ن

ج . أ