ریككه‌فتنه‌یل نه‌فتى شووڕشیگ ئه‌را سه‌روه‌خوه‌یى

شفق نيوز

  داگیركردن كوردستان و به‌شبه‌شه‌وكردنى ئه‌را چوار پارچه‌و لكانن هه‌ر پارچه‌یگى وه‌ ده‌وڵه‌تیگ دوشمنه‌و ئابڵوقه‌یگ سیاسى و ئابوورى و دبلۆماسى له‌یوایگ خسته‌ بان كورد ك له‌ شووڕش و راپه‌ڕینه‌یل ده‌سى وه‌ هویچ شوونیگ نه‌ڕه‌سید، وه‌ شیوه‌یگ له‌ كومه‌ڵگاى ناوده‌وڵه‌تى داوڕیه‌ى ك تاوان دژ وه‌ ئنسانیه‌ت وه‌لیا ئه‌نجام دریا و هه‌میشه‌ وه‌ تاوانباریش ناسریاو زووانى قه‌یه‌غه‌ كریاو كلتوور و تاریخى شیوانن و تومه‌ت چه‌ته‌یى و ریگریش ئه‌ڕاى هه‌ڵوه‌سریاو خه‌بات رزگارى نیشتمانیه‌گه‌ى كوژریاو هه‌ر وه‌ بكوشیش ناوبریا.

دوشمنه‌یل ئه‌را له‌ناوبردن كورد و زه‌فتكردن سامانه‌گه‌ى گشت رییگ تاقیه‌و كردن، وه‌لى كورد جوور نه‌ته‌وه‌یگ ئازادیخواز وه‌ دریژایى ئه‌و تاریخ پڕ له‌ كاره‌ساته‌ وه‌ل رژیمه‌یل یه‌ك له‌شوون داگیركار كوردستان هویچ وه‌ختیگ ده‌سوه‌ردار ماف و مقه‌یتیكردن ناسنامه‌ى كوردبوین خوه‌ى نه‌ویه‌و ڕخى نه‌چیه‌ له‌ جه‌مكوشى و كاولكردن وڵاته‌گه‌ى.

رویداگ و ئاڵشتكاریه‌یل ناوده‌وڵه‌تى و دید دروس سه‌رۆك بارزانى و سه‌ركردایه‌تى سیاسى كورد ئه‌را ئه‌و رویداگ و ئاڵشتكاریه‌یله‌ گریه‌كووره‌ى مه‌سه‌له‌ى كورد واز كرد و كوومه‌ڵگاى ناوده‌وڵه‌تى وه‌ خه‌بات رزگارى ئاشنا كرد.

دوشمنه‌یل ك باوه‌ڕان ئه‌وه‌ بوى كورد بایه‌سه‌ هه‌ر چه‌وى وه‌ده‌س ئه‌وانه‌و بوود، له‌ سه‌ره‌تا ئه‌و بار سیاسى تازه‌ وه‌لایانه‌و سته‌م بوى، هه‌ر له‌وه‌ر ئه‌وه‌یش وه‌ل هه‌ر پیشكه‌فتنیگ هه‌وڵ ئه‌وه‌ دان نواى پیشكه‌فتنه‌یل بگرن، له‌وه‌رانوه‌ر ئه‌وه‌یش نه‌یچێروان بارزانى هاته‌ بان ئه‌و باوه‌ڕه‌ ك تا به‌رژه‌وه‌ندى ئابوورى خه‌ڵك كوردستان تیكه‌ڵ وه‌ به‌رژه‌وه‌ندى ئابوورى ناوده‌وڵه‌تى نه‌كریه‌ید، ترس پیلانه‌یل سیاسى داگیركاره‌یل له‌بان مه‌سه‌له‌ى كورد ته‌واو نیه‌ود، ئه‌را ئى مه‌رامیشه‌ ده‌وڵه‌مه‌نى كوردستان وه‌ نه‌فت و غاز وه‌ خاسترین هووكار زانست ئه‌را مه‌یلكیشكردن به‌رژه‌وه‌ندى وڵاته‌یل خاوه‌ن هیز، وه‌ ئه‌وه‌یش هه‌م پشتگیرى ناوده‌وڵه‌تى ئه‌را مه‌سه‌له‌ى كورد دابین كریه‌یدو هه‌میش كورد بووده‌ خاوه‌ن ئابوورییگ سه‌روه‌خوه‌ى.

یه‌یش دو هووكارن ك نه‌ك هه‌ر ده‌وڵه‌ت وه‌بى ئه‌یانه‌ دانامه‌زریه‌ید، به‌ڵكوو ده‌وڵه‌تیش بوید ئه‌گه‌ر ئه‌و دو هووكاره‌ نه‌یاشتوید، یا ئه‌وه‌سه‌ ده‌وڵه‌تبوین له‌ده‌س ئه‌یه‌ید یا ده‌وڵه‌تیگ كز له‌لى كه‌فیده‌و ك هه‌میشه‌ ها له‌كنار رمیان، هه‌ر له‌وه‌ر ئه‌وه‌یش داگیركاره‌یل كوردستان وه‌ ژنه‌فتن ریككه‌فتن نه‌فتى ناڕه‌حه‌ت بوون.

له‌ سه‌رده‌م خه‌بات رزگارى نیشتمانى، تاریخ جواو ئه‌و پرسیاره‌ وه‌ ئه‌وه‌ داسه‌و، ك دوشمنه‌یل له‌ روى وه‌ڕوى بوینه‌وه‌ى هه‌ڵویسته‌یل نه‌ته‌وه‌یى به‌شیگ له‌ به‌رژه‌وه‌ندیخوازه‌یل كورد خزاننه‌سه‌ ناو سه‌نگه‌ر خوه‌یانه‌و، ئه‌وانه‌ك ئیسه‌یش له‌ مه‌سه‌له‌ى ریككه‌فتنه‌یل نه‌فتى ده‌نگ خوه‌یان خه‌نه‌ پاڵ ده‌نگ نورى مالكى ئه‌وه‌ جه‌نگ فرووشتنه‌ وه‌ ئاینده‌ى نه‌ته‌وه‌یى و دامه‌زرانن ده‌وڵه‌ت كوردى، چوینكه‌ ئى ریككه‌فتنه‌یل نه‌فتیه‌ بیگومان له‌ به‌رژه‌وه‌ندى كورد و دویاڕووژ نه‌ته‌وه‌ییمانه‌.

سووره‌ مه‌رگه‌یى

ج . أ