خانه‌قین له‌ ته‌عریب و ته‌رحیل ئه‌را سزانن باخه‌یلى

شفق نيوز

ئه‌راچه‌ هه‌میشه‌ تیر كوشنده‌ له‌ جه‌سه‌د كار ئه‌كا؟ ئه‌را خه‌م گشت شاره‌یل تر كیشید و كه‌س خه‌مخوه‌رد نیه‌؟ ئه‌راچه‌ ناحه‌زه‌یل خوازیارن سروشته‌ جوان و دڵڕفنه‌گه‌د له‌ناو بووه‌ن؟ ئه‌ى مه‌گه‌ر تن داڵگ ئه‌و روڵه‌یل قارمانه‌ نه‌وید ك سینه‌ى خوه‌یان كردنه‌ سپه‌ڕ ئه‌را وه‌رگرى له‌ خاك كوردستان؟ مه‌گه‌ر تن ده‌روازه‌ى زاگرۆس نید ئه‌را نیشتمان كورده‌یل؟ مه‌گه‌ر  وه‌خاتر كیشه‌ى كورد و كوردایه‌تى نه‌وى مه‌ردمه‌ ره‌سه‌نه‌گه‌د جیواز كریا وه‌ره‌و ناوچه‌یل شووره‌كات باشوور عراق و ماڵ و موڵكه‌یلیان له‌لیان زه‌فت كریا؟ روڵه‌یل جایه‌ڵ جوان و خوین گه‌رمد له‌وه‌رچه‌ وه‌جه‌م زینگ وه‌چاڵ كریان؟ له‌وه‌رچه‌ ئاوایه‌یلید خاپوور كریان؟ شه‌رم نیه‌تواید ئه‌ى شاره‌ دڵسزیاگه‌گه‌م بانگ محه‌مه‌د ئاشكرا خوه‌شه‌، ده‌نگهه‌ڵوڕ  با گشت دونیا بزانید ك ئیسه‌یش غه‌در له‌لید كریه‌یدو ناوژدان و تێكده‌ره‌یل توان وه‌رده‌وام سیه‌پووش و ئازه‌یه‌تبارد بكه‌ن، په‌رده‌ى شه‌رم بدڕ و خوه‌د له‌ ته‌وق سته‌م و ناهه‌قى باره‌ ده‌ر، ناو ئه‌وانه‌ ئاشكرا كه‌ ك ژه‌هر كوشنده‌ ده‌نه‌ پید و پلان نا ئنسانى ئه‌راد دانه‌ن، با روڵه‌یلد یه‌كگرتگ بوون تا تنیش نه‌كه‌فیده‌ ناو ته‌نگ و چه‌ڵه‌مه‌ى بیكه‌سیه‌و، تا باخه‌یلد نه‌سزیه‌ن، شیرازه‌ى پیكهاته‌یلد نه‌شیویه‌ن، نه‌وه‌یلد نه‌ترسیه‌ن، ئاره‌زووه‌یلد نه‌خنكیه‌ن.

 

به‌ڵى وه‌گووره‌ى ئاماریگ له‌لایه‌ن رووژنامه‌نویسه‌یل شار خانه‌قینه‌و ئه‌و ده‌ركه‌فت ك شماره‌ى باخه‌یل سزیاگ ئه‌و شاره‌ ره‌سیه‌سه‌ 138 باخ و لیژنه‌ى وه‌رگریكردن له‌ به‌رژه‌وه‌ندیه‌یل گشتى شاره‌گه‌یش داواى ده‌س له‌كاركیشانه‌وه‌ى وه‌رپرسه‌یل شاره‌گه‌ كردنه‌.

 

 

بیجگه‌ ئه‌وه‌یش ئى كرده‌وه‌ى نا ئنسانیه‌ ئه‌را ماوه‌ى فیشتر له‌ شه‌ش ساڵه‌ هه‌ر وه‌رده‌وامى دیرید و هیمان هویچ تاوانباریگیش له‌ى باوه‌ته‌و ده‌سگیر نه‌كریاگه‌و له‌ ئاكام ئى ره‌فتار و هه‌ڵسووكه‌فتیشه‌ حكوومه‌ت ناوچه‌ى خانه‌قینیش نه‌توه‌یه‌نستگه‌ كۆنترۆڵ مه‌سه‌له‌گه‌ بكا، یا وه‌لاى كه‌مه‌و بتویه‌نید مه‌رزیگ ئه‌را ئى دیارده‌ى باخ سزاننه‌ دابنه‌ید.

 

هه‌ر له‌وه‌ر ئه‌وه‌یش ئه‌میده‌واریم ك وه‌رپرسه‌یل و لایه‌ن په‌یوه‌ندیدار ئه‌و شاره‌ چاره‌سه‌ریگ بویننه‌و ئه‌را كووتاییهاوردن وه‌ى دیارده‌و مقه‌یه‌تى له‌ سروشت جوانى شاره‌گه‌ بكه‌ن، چوینكه‌ ئه‌و شاره‌ له‌ڕوى ئابوورى و سه‌رچه‌وه‌ى پترۆڵیشه‌و گرینگى فره‌یگ دیرید ئه‌را كوردستان، ك خه‌ریكه‌ چاڵه‌ نه‌فتیه‌یل مه‌سفاو نه‌فتخانه‌ گه‌شه‌ ده‌یده‌ ئابوورى هه‌رێم و هه‌ر هویچ نه‌ود ئه‌و ته‌ڵاى سیه‌ له‌ناو خاك خانه‌قینیه‌یله‌و هه‌ڵقوڵیه‌ید و چووده‌ خه‌زینه‌ى حكوومه‌ته‌و، ئنجا هه‌ق ئه‌وه‌سه‌ وه‌رپرسه‌یل و لایه‌نه‌یل په‌یوه‌ندیدار شاره‌گه‌ حورمه‌ت مه‌ردمه‌گه‌ى بگرن و ریز له‌ خه‌بات بیوچان روڵه‌یلى بگرن و مقه‌یه‌تى له‌و باخه‌یله‌ بكه‌ن، چوینكه‌ ئه‌وان ئیسه‌ له‌و باخه‌یله‌ زیاتر چشتیگ تر نه‌یرن و قه‌ره‌بوو نه‌كریانه‌ له‌ئاكام ئه‌و ده‌روه‌ده‌رى و ماڵویرانیه‌ ك ساڵه‌یل فره‌یگ هاته‌ تویشیان و دویاخریش ئویشیم: هه‌ر داریگ له‌و باخه‌یله‌ زینه‌تیگه‌ ئه‌را شاره‌گه‌و مقه‌یه‌تى له‌ ژینگه‌یشى ئه‌كا.

 

جه‌ماڵ ئه‌ركه‌وازى