روی وه‌ر ناوچه‌يل كوردستانی پاريزگای كووت

شفق نيوز

 

روی وه‌ر(مساحه‌)ی قه‌زای به‌دره له‌ پاريزگای كووت‌ ٣٦٥٠كم٢. مانای ئه‌وه‌سه‌ ئه‌گه‌ر ئيمه‌ سه‌رجه‌م ئی روی وه‌ره‌يله‌ گرده‌و بكه‌يم ك له‌ هه‌رێم كوردستان داوڕيانه‌و ريژه‌ سه‌ديه‌گه‌ی وه‌ربگريم، ئه‌وه‌ ئه‌تويه‌نيم بويشيم ك ٤٣١٧٨كم٢و له‌ روی وه‌ر خاك هه‌رێم كوردستان داوڕيانه‌و لكاننه‌سه‌ی ده‌وڵه‌ت عراقه‌و جوور ئه‌وه‌ك ئاماژه‌ وه‌پی كرديم.

مانای ئه‌وه‌سه‌ ئه‌و هه‌رێمه‌ ك ئيمه‌ ديريمنه‌ی فيشتر له‌ نيمه‌ی خاكه‌گه‌ی له‌لی داوڕياگه‌، ك يه‌يش روی وه‌ر يه‌كجار فريه‌يگه‌ له‌ليامان داوڕينه‌سه‌ی، ئمجا له‌يرا پرسياريگ په‌يا بوود، ك ئه‌ويش ئه‌وه‌سه‌ وه‌ هاوردنه‌وه‌ی ئی روی وه‌ره‌ ئه‌را بان هه‌رێم كوردستان، هه‌رێم چه‌ وه‌ده‌س ئه‌يه‌ريد؟ يا وه‌ ناوردنه‌وه‌ی ئی روی وه‌ره‌ چه‌ وه‌ده‌س ئه‌يه‌ريد، يا چه‌ له‌ده‌سی چوود؟

ئه‌گه‌ر ئيمه‌ له‌ ديد زانستی سياسی و جيوپۆليتيكيه‌و ته‌ماشای ئی پرسياره‌ بكه‌يم، ئه‌وه‌ ئه‌رامان ده‌ركه‌فيد ك گشت يه‌كه‌يگ سياسی يا ده‌وڵه‌ت ئه‌را ئه‌وه‌ك هيز سياسی و ئابووری بته‌و بدێ، هه‌وه‌جه‌ی فريه‌يگ وه‌ روی وه‌ر گه‌ورايگ يا نيمچه‌ گه‌ورايگ ديريد، جوور ئه‌وه‌ك ئاشكراس وه‌ هاوردنه‌وه‌ی ئی روی وه‌ره‌ ئه‌را بان هه‌رێم كوردستان روی وه‌ر هه‌رێم فراوانتر ئه‌دێدو يه‌يش ئه‌دێده‌ به‌رهه‌مهاوه‌ر هيزيگ سياسی گه‌ورا ئه‌را هه‌رێم كوردستان.

روی وه‌ر ته‌نيا زه‌وييگ رويت نيه‌ ك به‌تاڵ بوود، به‌ڵكوو ئی زه‌وی فراوانه‌ چه‌نه‌ها چشت گرينگ ديريدو ئه‌دێده‌ هووكاريگ ئه‌را بته‌وبوين ده‌وڵه‌ت و بووده‌ هيز سياسی ئه‌را هه‌رێم كوردستان له‌بان ئاست ناوخوه‌يی و ده‌ره‌كی، ئه‌را نموونه‌ ئی زه‌وی فراوانه‌ گرينگی ديريد ئه‌را بوار سه‌ربازی و ئه‌دێده‌ ناوچه‌يگ بۆ جموجويل سه‌ربازی و سروشته‌گه‌يشی ده‌سميه‌تده‌ره‌ ئه‌را ئی مه‌سه‌له‌و هه‌ر وه‌و خاتريشه‌ وه‌ هاوردنه‌وه‌ی ئی روی وه‌ره‌ ئه‌را بان خاك هه‌رێم كوردستان، هيز سه‌ربازی بته‌و ئه‌دێدو ئه‌و توانا ئه‌رای دروس ئه‌دێ ك هيزيگ گه‌ورای سه‌ربازی دروس بكا، ئی ناوچه‌يليشه‌ له‌وه‌ر روی وه‌ره‌ فراوانه‌گه‌ی ك ديرنه‌ی بوونه‌ وه‌ربه‌سيگ له‌وه‌رده‌م دريژه‌وبوين مه‌رز وڵاته‌يل هاوسا له‌وه‌ختيگ ك مه‌يل ئيچنه‌ كاريگ داشتوون و بتوان په‌لامار هه‌رێم كوردستان بيه‌ن، ئمجا له‌ی حاڵه‌ته‌ ئی ناوچه‌يله‌ بوونه‌ ريگر له‌وه‌رده‌ميان و بوونه‌ مقه‌يه‌تيكه‌ر هه‌رێم ك روی وه‌ر ناوچه‌يل كوردستانی پاريزگای كووتيش يه‌كيگه‌ له‌و روی وه‌ره‌يل داوڕياگه‌و هاوردنه‌وه‌يشی گرينی خاسيگ ديريد ئه‌را هه‌رێم.

فه‌همی مهدی

ج . أ