با بگه‌ردیمنه‌ شوون نه‌وه‌ى تازه‌یگ

شفق نيوز

گووشه‌ى زه‌ویه‌ ژیه‌ن، چشته‌یل هاوبه‌شیگ هه‌س، وه‌لى ئه‌وه‌ك هیلیگ جیاواز بوون له‌یه‌كترى چشته‌یل فره‌ى بى هساویگه‌.

وه‌نسبه‌ت عراق تازه‌و هه‌ر له‌وه‌خت دامه‌زراننى له‌سه‌ره‌تاى سه‌ده‌ى وه‌رین، ملله‌ته‌گه‌ى ئه‌و مه‌ردمان فره‌ نه‌یاشتگه‌ ك مایه‌ى شانازى بوون، چوینكه‌ هه‌میشه‌ خراویه‌یل قوناغ وه‌قوناغ وه‌ل رژیمه‌یل سته‌مكار سیاسیا هاتگه‌و هویچ ده‌رفه‌تیگ نه‌یاگه‌ ئه‌را وه‌دیهاوردن فه‌خر و شانازى، هه‌ر له‌وه‌ر ئه‌وه‌یش ئاشكراس ك گشت بوونه‌یگ نیشتمانى نه‌ته‌وه‌یى و ته‌نانه‌ت دینییش له‌ مه‌ینه‌تى مه‌ردم كه‌مه‌و نه‌كردگه‌ له‌گشت مه‌یدانیگه‌و گرفته‌یلمان گشت وه‌ختیگ هه‌ر دریژه‌و بویه‌و هویچ مووڵه‌تیگیش له‌تى نه‌یاشتیمنه‌.

كیشه‌ى فه‌یلى له‌بان دو ته‌وه‌ر یا محوه‌ر دابه‌ش بوود، یه‌كه‌میان ناوخوه‌یى له‌ناونى روڵه‌یل چینه‌گه‌و دویه‌میانیش ده‌ره‌كى له‌ناونى خوه‌یان و باقى ژینه‌یل تر ناوخود و ده‌یشت عراق، له‌گشت حاڵه‌تیگیش ئیمه‌ هووكار سه‌ره‌كى نیم له‌ دروسكردن ئى گرفته‌یله‌، به‌ڵكوو ژینگه‌ى وڵاته‌گه‌س ك له‌یوا كردگه‌ كیشمه‌كیش بكه‌فیگه‌و له‌گشت ئاستیگ . ئیمه‌ ئه‌نفال و شیوازه‌یل تر له‌ كاره‌سات دانه‌نایم جویر ئه‌وه‌ك به‌عزه‌ كه‌سه‌یلیگ  وه‌شیوه‌یگ ناوه‌رپرسیاریه‌تى باسى كه‌ن ك گوایا فه‌یلیه‌یل هووكار گشت ئه‌و كاره‌ساته‌یله‌نه‌ ك هاته‌ بانیان، به‌ڵكوو ئیمه‌ وه‌ شایه‌تى گشت لایگ قوربانى و قوربانیده‌ر بویمه‌نه‌.

له‌ساى ئى بار و ئاڵشتكارى و گرفته‌یل ناخوه‌شه‌، دیاره‌ ك گه‌شبینى یا ته‌فائول له‌وه‌ك گامیگ وه‌ره‌و لاى راسه‌وكردن وه‌زعه‌یلا بچیمنه‌ نواوه‌، بویه‌سه‌ وه‌ربه‌س و كیشه‌ى سه‌ختیگ  له‌وه‌رده‌ممان. ئنجا مه‌سه‌له‌ى خاڵه‌یل ته‌وافق ناونى كورد و عه‌ره‌ب ك له‌بان میز گفتوگوو باس كریه‌یگ  شایه‌ت له‌یوا هویر بكریه‌یگ ئه‌را كیشه‌گه‌مان خه‌یر بوود، وه‌لى وه‌چه‌واشه‌ ئه‌گه‌ر یا ئحتمال و پیشبینى كریه‌یگ ، وه‌ل ئه‌وه‌یشا ته‌وافق ناونى سونى و شیعه‌یش پیشبینى وه‌ بڕیگ  زه‌كات بكا له‌وژدان فه‌یلیه‌یل، ئنجا ئه‌و پرسیاره‌ ك مه‌ندگه‌ ئه‌وه‌سه‌ وه‌رپرسیاریه‌تى خاوه‌ن كیشه‌گه‌ چه‌یگه‌، وه‌تایبه‌ت چین روونشهویر له‌لیان ك چنه‌ ناو كیشه‌ى لایه‌نى و كیشه‌ جه‌وهه‌ریه‌گه‌ وڵكردنه‌.

بیگومان هه‌ر قه‌واره‌یگ سیاسى یا كومه‌ڵایه‌تى له‌لایگه‌و به‌شداره‌ له‌نیشانداین و ده‌رخستن كیشه‌گه‌، وه‌لى كیشه‌گه‌ یه‌كلاوه‌ ناكا جویر ئه‌وه‌ك گشتمان ئاره‌زووى كه‌یم.

له‌یره‌و ئویشم: ئیمه‌ هه‌وه‌جه‌ وه‌هویروڕاو دید تازه‌و روخسار و ڕوى وه‌ر یا مه‌ساحه‌ى تازه‌یگ دیریم ئه‌را ئه‌وه‌ك ده‌رفه‌ت به‌یمنه‌ نه‌وه‌ى تازه‌ دریژه‌ بیه‌نه‌ ئه‌وه‌ك مه‌ندگه‌ له‌و كاروان هاوردنه‌وه‌ى هه‌قه‌یله‌و گله‌وخواردن ئه‌را ده‌ورداشتن له‌گشت مه‌یدانه‌یل. ئنجا نه‌وه‌یل ئیسه‌ ئه‌وه‌ك تویه‌نست هاورده‌ كار، ئیسه‌یش بایه‌سه‌ له‌بان گشت كه‌سیگ دگان وه‌و راسیه‌ بنه‌ن، ك هه‌رچه‌نى له‌ڕوى ره‌فتار و په‌یڕه‌وه‌و جیاوازیش بویم.

 

عه‌لى حسێن فه‌یلى