رووسه‌يل چه‌ ئه‌كه‌ن له‌ به‌غدا؟

شفق نيوز

ئى رووسه‌يله‌ ئه‌ركه‌يليان نه‌ك هه‌ر مه‌شقداين ئه‌فسه‌ر و ته‌ياره‌وانه‌يل عراقيه‌ له‌بان وه‌كارهاوردن چه‌ك رووسى وه‌تايبه‌ت ته‌ياره‌يل هێليكۆپته‌ر جه‌نگى له‌ شيواز"مى – 35" ك عراق وه‌ قه‌رد له‌ روسيا سه‌نده‌يان، به‌ڵكوو ده‌سكردنه‌ دامه‌زرانن باره‌گايگ هاوبه‌ش وه‌ هاوكارى وه‌ل شاره‌زايه‌يل ئيرانى وه‌خاتر ريككه‌فتن له‌ بوار ئاماده‌كردن چه‌ك و ته‌قه‌مه‌نى جه‌نگى رووسى ئه‌را عراق.

ئه‌ڵلاجه‌وى له‌ى كاره‌ ئه‌وه‌سه‌ ك قسه‌ى جه‌عفه‌رى له‌دوياى ئه‌و ئعلان دامه‌زرانن ناوه‌ند زانيارى چوارلايه‌نى هاوبه‌شه‌ هات له‌و به‌ياننامه‌ ك له‌لايه‌ن سه‌ركردايه‌تيه‌يل فه‌رمانده‌يى هاوه‌به‌ش عراقيه‌و ده‌ركريا ك مۆسكۆ و ته‌هران و ديمه‌ش گرته‌و وه‌ل به‌غدا.

وه‌زيريگ عراقى ك نه‌تواس ناوى ئاشكرا بكا له‌ لێدوانيگ ئه‌را رووژنامه‌يگ عه‌ره‌بى له‌نده‌نى ئه‌وه‌ ده‌رخست ك سێ ئه‌فسه‌ر رووس خاوه‌ن پله‌يل باڵا ره‌سينه‌سه‌ به‌غدا له‌ وه‌ختيگ ك گه‌ورا ئه‌فسه‌ره‌يل به‌سيج ئيرانى و كه‌سه‌يليگ له‌ هه‌واڵگرى ئيرانى له‌ عراق وجوود داشتنه‌و ده‌سكردنه‌سه‌ دامه‌زرانن غورفه‌يگ زانيارى هاوبه‌ش له‌ناو باره‌گاى هه‌واڵگرى وزاره‌ت وه‌رگرى عراقى له‌ ناو ته‌ياره‌خانه‌ى موسه‌نا له‌ وه‌رانوه‌ر پارك زه‌ورا.

ئه‌و وه‌زيره‌ باس له‌وه‌ كرد ك گوايا عبادى ئاگادار نه‌ويه‌ له‌و ئعلان له‌ناكاوا ك له‌لايه‌ن سه‌ركردايه‌تيه‌يل فه‌رمانده‌يى هاوبه‌ش عراقيه‌و ئاشكرا كرياگه‌و راى ئه‌ويش له‌ى باوه‌ته‌و وه‌رنه‌گيرياگه‌ وه‌هويچ شيوه‌يگ.

باس له‌وه‌يش ئه‌كريه‌ێد ك ئه‌رك سه‌ره‌كى ئه‌ى ئه‌نجومه‌ن يا ناوه‌ند زانياريه‌ فريه‌ مه‌ترسيدارتره‌ له‌وه‌گ له‌به‌ياننامه‌گه‌ى سه‌ركردايه‌تيه‌يل هاوبه‌ش ئعلان كرياگه‌و فراوانتره‌ له‌و لێدوانه‌يل وه‌رپرسه‌يل هاوپه‌يمانى چوارلايه‌نى تازه‌ ئه‌ركه‌يليان ئه‌وه‌سه‌ ك چه‌وديرى بار سه‌ربازى و سياسى له‌ ناوچه‌ى خوه‌رهه‌ڵات ناوين بكه‌ن وه‌ل چه‌وديرى ريڕه‌و ته‌ياره‌يل رووسى له‌ ئاسمانه‌يل عراقى و ئاڵشتوئوڵشت زانيارى هه‌واڵگرى و شيه‌وكردن بار سياسى له‌لاى هه‌ر يه‌ك له‌ روسيا و ئيران، ك يه‌يش ئه‌چێده‌ به‌رژه‌وه‌ندى خوه‌يان.

يه‌يش بيجگه‌ پلان ئه‌را وه‌كارهاوردن يه‌كه‌يل جه‌نگى ئه‌و چوار ده‌وڵه‌ته‌و ريكخستن كاره‌يليان، ك يه‌يش ئه‌رك سه‌ركى ئه‌و ناوه‌ند تازه‌سه‌ ك خوازياره‌ دابمه‌زريه‌ێد جوور ده‌سه‌يگ ئه‌ركان يا ئداره‌يگ فه‌رمانده‌يى هاوبه‌ش.

جه‌وده‌ت هوشيار