جاڕنامه‌ى جه‌هانى و هه‌قه‌یل ئاده‌میزاد و كیشه‌ى ملله‌ته‌یل هه‌قخوریاگ

شفق نيوز

گشتى نه‌ته‌وه‌یل یه‌كگرتگه‌وه‌ ئاشكرا كریاگه‌. ئه‌و جاڕنامه‌ ئه‌را وه‌زع سه‌رده‌مه‌یل ئه‌وسا وه‌رچه‌رخان و ئاڵشتكارى گه‌ورایگ بوى له‌بان ئاست جه‌هان و ناوده‌وڵه‌تى. به‌نده‌یل ناو ئه‌و دیكۆمێنت ناوده‌وڵه‌تیه‌و په‌یماننامه‌و ریككه‌فتنه‌یلى ئیسه‌یش گشت ده‌وڵه‌ته‌یل دونیا په‌سه‌نى كردنه‌و هه‌ر وه‌ ڕه‌سمى ئمزاى ناوه‌ڕوكه‌یلى نه‌زریه‌گه‌ى كردنه‌، وه‌لى ئه‌نجامه‌ جى وه‌جیكردنه‌گه‌ى هیمان له‌ شوونه‌یل فره‌یگ له‌ى دونیا ها له‌قوناغ سه‌ره‌تایى و ژیرپاخستن ئه‌و جاڕنامه‌ وه‌ ئاشكرا كه‌فیگه‌ وه‌رچه‌و.

له‌ گوزه‌یشته‌ گشت ئه‌و ژیرپاخستنه‌یله‌ له‌لایه‌ن وڵاته‌یل دیموكراسى و خاوه‌ن ده‌ستوور و قانوونه‌یل مه‌ده‌نیه‌وه‌ ئه‌نجام دریان، ئى وڵاته‌یله‌ بیجگه‌ ئه‌وه‌ك له‌ناو خوه‌یان زوورم پرنسیپه‌یل هه‌ق ئاده‌میزاد و به‌نده‌یل ناو ئه‌و جاڕنامه‌ له‌وه‌رچه‌و گرتیان، وه‌لى له‌بان ئاست ده‌یشت وڵاته‌گه‌یان وه‌ شیوازیگ ناژیارى یا ناحزاریانه‌و نه‌گونجیاگ وه‌ل قانوون و په‌یماننامه‌یل ناوده‌وڵه‌تیا هه‌ق ملله‌ته‌یل تر ژیرپا خستیان و له‌وه‌ر خاتر به‌رژه‌وه‌ندیه‌یل سترایجى خوه‌یان گشت ئه‌و بنه‌مایه‌یل دروسكه‌ر ناو ئه‌و جاڕنامه‌ى جه‌هانى هه‌قه‌یل ئاده‌میزاد ژیرپا خستیان.

ئیسه‌یش ك زیاتر له‌ شه‌س ساڵ له‌بان ئاشكراكردن ئه‌و جاڕنامه‌ ڕه‌ى بویه‌و گشت وه‌زعه‌ جه‌هانیه‌گه‌یش وه‌لیا ئاڵشت بویه‌، وه‌لى هیمان په‌یڕه‌ونه‌كردن به‌نده‌یل ناو ئه‌و رییكه‌فتننامه‌ى جه‌هانیه‌ وه‌رده‌وامه‌و له‌ زوورم وڵاته‌یل دونیا ژیرپا خریه‌یگ ، ك بیگومان هووكار و سه‌رچه‌وه‌ى ئه‌و ژیرپاخستنه‌یله‌ وجوود ده‌سڵات دكتاتۆرانه‌و حوكم سته‌مكارانه‌س ك له‌شوون قوناغ كۆلۆنیالیست، كلتوور سیاسى ناوچه‌گه‌ بانى بنیات نریاگه‌. راسه‌ ئیسه‌ وڵاته‌یل پیشكه‌فتگ وخاوه‌ن ریڕه‌و دیموكراسى، چه‌ودیرى وه‌زع هه‌قه‌یل ئاده‌میزاد و په‌یڕه‌وكردن جاڕنامه‌ جه‌هانیه‌گه‌ كه‌ن له‌بان ئاست ده‌یشت خوه‌یان و فره‌جار له‌بان پاشیلكاریه‌یلیش تیه‌نه‌ بیده‌نگ نیه‌ون، وه‌لى نیه‌وگ حاشا له‌و راسیه‌ بكه‌یم ك وه‌زع ناله‌بار هه‌قه‌یل ئاده‌میزاد له‌شوونه‌یل فره‌یگ له‌ى دونیا وه‌تایبه‌ت له‌ناوچه‌ى ئیمه‌ ده‌رئه‌نجام سیاسه‌ته‌یل غه‌ڵه‌ت ئه‌وساى ئه‌وانه‌ ك له‌ قوناغه‌یل داگیركردن وڵاته‌یل ناوچه‌گه‌ مامڵه‌ وه‌ل ملله‌ت و نه‌ته‌وه‌یلا دادگه‌رانه‌ نه‌ویه‌و به‌رژه‌وه‌ندیه‌یل ئابوورى خوه‌یان په‌یمانه‌ یا مقیاس یه‌كلاكردنه‌وه‌ى كیشه‌و مه‌سه‌له‌ى چاره‌نویسساز وڵاته‌یل ژیرده‌سه‌ى ئه‌وان بویه‌و بڕیگ له‌لیان وه‌ ناڕه‌واو ناهه‌ق زاڵ كردنه‌ له‌بان ئه‌واكانتر.

یه‌كیگ له‌و ملله‌ته‌یلیشه‌ ك تائیسه‌یش باج گه‌وراى ئه‌و سیاسه‌ته‌یل نائنسانى گه‌وراهیزه‌یل ده‌یگ ، ملله‌ت كورده‌ ك له‌ناو جه‌هان تازه‌و دیموكراسى ئى سه‌رده‌میشه‌ هه‌وڵیگ نیه‌كریه‌یگه‌ ئه‌و غه‌ڵه‌ته‌یله‌ ده‌رهه‌قى كریا راسه‌و بكریه‌یگ ، كورد له‌ هویچ قوناغیگ وه‌گووره‌ى قانوونه‌یل هه‌ق ئاده‌میزاد و په‌یماننامه‌یل ناوده‌وڵه‌تى مامڵه‌ وه‌لیا نه‌كریاگه‌و ساده‌ترین هه‌ق ئنسانى له‌لى زه‌فت كریاگه‌ ك پیكهاتگه‌ له‌ سه‌روه‌خوه‌یى و ژیان ئازاد له‌بان ئه‌و خاك جوگرافى و تاریخى خوه‌یه‌ ك كوردستانه‌.

شه‌رعیه‌ت ناوده‌وڵه‌تى ك له‌ریككه‌فتن دامه‌زرانن و كار نه‌ته‌وه‌یل یه‌كگرتگ و جاڕنامه‌ى جه‌هانى هه‌قه‌یل ئاده‌میزاد و گشت ریككه‌فتن و په‌یماننامه‌یل ئمزاكریاگتر ریكخریاگه‌ سه‌رچه‌وه‌ گرتگه‌ كه‌فیگه‌ ژیر پرسیاره‌وه‌ له‌وه‌رانوه‌ر تاریخیگ دویر و دریژ پڕ له‌چه‌وسیان و كوشتار نه‌ته‌وه‌ى كوردو چاره‌سه‌رنه‌كردن هه‌قه‌یل ئنسانى و سیاسیه‌یلى. راسه‌ بنه‌مایه‌یل ئه‌و ئاشكراكریاگ جه‌هانیه‌ وه‌مه‌به‌س مقه‌یه‌تیكردن هه‌قه‌یل ئاده‌میزاد جویر تاك ئمزا له‌بانى كریاگه‌، وه‌لى گشت ئه‌و تاكه‌یل ملله‌ت و كومه‌ڵگایه‌یل ئنسانیه‌ پیك تیه‌ریگ . ئنجا له‌وه‌ر خاتر چه‌سپانن هه‌قه‌یل ئاده‌میزاد له‌ڕوى جى وه‌جیكردن و نه‌هیشتن پاشیلكارى، بایه‌سه‌ نه‌ته‌وه‌یل یه‌كگرتگ كار جددى بكه‌ن ئه‌را چاره‌سه‌ر كیشه‌ى ملله‌ت و نه‌ته‌وه‌یل ژیرده‌س ك وه‌بى خواست و ئاره‌زوو خوه‌یان چاره‌نویسیان په‌یوه‌س كریاگه‌ وه‌ ملله‌ت و نه‌ته‌وه‌ى تره‌وه‌، هه‌ر له‌وه‌ر ئه‌وه‌یش هاوردنه‌وى هه‌ق چاره‌نویس ئه‌را ئه‌و ملله‌ته‌یله‌ مسداقیه‌ت جاڕنامه‌ جه‌هانیه‌گه‌ى هه‌قه‌یل ئاده‌میزادیش بته‌وتر ئه‌كا.