ده‌ستور داپوشریاگ

شفق نيوز


بێجگه‌ ئه‌وه‌یش دژایه‌تى پروسه‌ێ هه‌ڵوژاردن ڕاسه‌وخو(موباشر) كه‌ن وه‌بیانگ ئه‌وه‌گ په‌رله‌مان نوێنه‌ر ملله‌ته‌ و ئێ بیانگ نامه‌نتقیه‌ وه‌پێچه‌وانه‌ێ ئه‌و پره‌نسیپه‌سه‌ ك ئوێشێگ( ملله‌ت سه‌رچاوه‌ێ ده‌سه‌ڵات و شه‌رعیه‌تیه‌ ) .
ئیمه‌ زانیم ملله‌ت له‌سه‌رجه‌م هاوڵاتیه‌ێل پێك تێه‌ێگ ، نه‌گ ته‌نیا ئه‌وانه‌گ له‌ پروسه‌ێ هه‌ڵوژاردن به‌شداری كه‌ن ، یا ئه‌وانه‌گ له‌ ژێر قوبه‌ێ په‌رله‌مان نیشن ، من خوه‌م هامه‌ ئه‌و باوه‌ڕه‌ ك كه‌س رازى نییه‌ 111 ئه‌ندام په‌رله‌مانه‌گه‌ێ كوردستان ده‌سه‌ڵات ره‌ها داشتون و سه‌رجه‌م بڕیاره‌ چاره‌نویس سازه‌گان له‌ وڵات بێه‌ن ، وه‌تایبه‌ت له‌ پرس هه‌ڵوژاردن سه‌روك هه‌رێم ك یه‌كمین پوست هه‌ریم كوردستانه‌.
باوه‌ت سه‌نن ماف ده‌نگداین له‌ هاوڵاتى و داینێ وه‌ ئه‌ندامه‌یل په‌رله‌مان (وه‌گوره‌ى ده‌ستور) وه‌بیانگ ئازادى و دیموكراسی ، باوه‌تێگ مه‌ترسیداره‌ و نیاز وه‌ هه‌وڵ و كوشش نیشتمانی و دیدگاێ ڕاسه‌قینه‌ دێرێ ك وه‌شێوه‌ێ واقعبینانه‌ بنوڕێگه‌ بارودوخ كوردستان.
ئه‌وه‌گ قسه‌گان مه‌سعود بارزانی له‌ باوه‌ت ده‌ستور و سه‌روكاێه‌تى هه‌رێم بخوه‌نێگ ، ڕه‌سێگه‌ ئێ باوه‌ڕه‌ بارزانى ئه‌وقه‌ره‌ ك پابه‌نده‌ وه‌ ڕێزگردن له‌ ئراده‌ێ ملله‌ته‌گه‌ێ ، ئه‌وقه‌ره‌ پاپه‌ێ پوست و مه‌قام نییه‌ ، له‌وه‌ر ئه‌وه‌گ بارزانی ئاڵاێ براێه‌تى و لێكتێگه‌یشتن و پێشكه‌فتن و ئازادى بیروباوه‌ڕ ئه‌ڵگردێه‌ و له‌ ئه‌نجام دوێربینى و حكمه‌تێ ، كوردستان بوێه‌سه‌ په‌ناگاێگ ئه‌ڕا گشت بێ په‌ناێه‌یل و مه‌شخه‌ڵێگ ڕوشنا ئه‌ڕا ناوچه‌گه‌ و جه‌هان.
له‌ ساێه‌ى سیاسه‌ته‌یل میانه‌ڕه‌وانه‌ى و باوه‌ڕێ وه‌ ماف مروڤ ، هێزه‌یل پێشمه‌رگه‌ و ئاسایش وه‌شێوه‌ێ  وه‌رده‌وام جه‌نگ دژه‌ ترور كردنه‌ و كه‌ن و له‌ نواێ تروریسته‌یل و چه‌ته‌گان داعش ك له‌ سه‌راسه‌ر جه‌هان هاتنه‌ و له‌ ده‌ور یه‌ك گرده‌و بوێنه‌ ، جور قه‌ڵاێگ پوڵایین وسانه‌ و له‌ جه‌بهه‌یل جه‌نگ پیروز بوێنه‌ و ئاڵاى پیروز كوردستان له‌ زورم ناوچه‌یل ده‌یشت هه‌ریم كوردستان به‌رزه‌و كردنه‌ و شه‌ره‌ف وه‌رگری كردن له‌ ئاسایش جه‌هانى وه‌پێیان بڕیاس.
وه‌فه‌زل سیاسه‌ت حه‌كیمانه‌ێ بارزانى و فداكارى و قوربانیداین ملله‌ت كوردستان و هێز پێشمه‌رگه‌ ، كوردستان بوێه‌سه‌ (دوڕگه‌ێ ڕه‌وشت به‌رزی و ڕه‌فتار ئنسانی) و وه‌قسه‌ێ سه‌روك ئه‌مریكا باراك ئوباما (كوردستان بوێه‌سه‌ ئومید جه‌هان ئازاد له‌ وسیان له‌ وه‌راوه‌ر تروریزم) و جوزیف بایدن جێگر سه‌روك ئه‌مریكایش ئوێشێگ : جه‌هان ئازاد وه‌رده‌وام مینى له‌ پشتگیری كردن هه‌رێم كوردستان.
له‌ هوێرمانیش نه‌چوگ سه‌روك هه‌ریم كوردستان مه‌سعود بارزانی له‌ دیمانه‌ێگ وه‌ل كه‌ناڵ ئاسمانی(imctv) توركیه‌ وه‌ئاشكرا ووتیه‌ : (هوێچ وه‌خت ڕازى نییم وه‌ده‌ر له‌ چوارچێوه‌ێ یاسا و بڕیاره‌یل په‌رله‌مان كوردستان ، ولایه‌ته‌گه‌م دریژه‌و بكرێه‌ێ ، ئیمه‌ پابه‌ندیم وه‌یاسا و بڕیاره‌ێل په‌رله‌مان كوردستان و ڕێز له‌ هه‌ر بڕیارێگ گریم ك له‌و باره‌وه‌ بدریه‌ێ و هه‌رگز كار ناقانونى قه‌بول نیه‌كه‌م).  

ج ك