ملیۆنه‌ها كه‌س بى شوونن و ماڵه‌یل ناوچه‌ى سه‌وز بویه‌سه‌ شوون سه‌گه‌یل!

شفق نيوز

مه‌ترسیه‌یل گه‌ورا ك عراقیه‌یل هس وه‌پى كردنه‌ له‌وه‌رده‌وامى بار سه‌خت ئیسه‌ ك هاته‌سه‌ تویش سیاسیه‌یل ك وه‌ دریژایى 9ساڵ گوزه‌یشت تواناى ئه‌وه‌ نه‌یاشتنه‌ كاریگ بكه‌ن ك هه‌وه‌جه‌ى مه‌ردم بارنه‌ دى.

 

له‌و ته‌سریحه‌یله‌ ك له‌هووكاره‌یل ره‌سانن ده‌ركه‌فت، وه‌زیر نه‌خشه‌كیشان باس له‌وه‌ كرد ك وه‌زیره‌یلیگ هه‌ن له‌ده‌یشت عراق ژیه‌ن و هه‌ر یه‌كیگ له‌لیان په‌نج ماڵ دیرێد ك له‌ساڵ 2003 تائیسه‌ بویه‌سه‌ شوون نیشته‌جى سه‌گه‌یل، له‌هه‌مان وه‌خت وت: بڕیگ وه‌رپرس هه‌ن له‌ده‌وڵه‌ت ك وه‌زیر نین و ماڵه‌یل فره‌یگ دیرن و ته‌نیا چه‌ن پاسه‌وانیگ له‌تیان دامه‌زراننه‌و هه‌ر كه‌سیگ له‌لیان نزیكه‌و بوود ڕوى چه‌ك له‌لى كه‌ن.

 

ئیمه‌ هه‌ر زوى وتیمنه‌ وجوود ناوچه‌ى سه‌وز ك پڕه‌ له‌خزمه‌تگوزارى و سه‌رپه‌رشیكردن خاس، ك جیا له‌ناوچه‌یل تر به‌غدا بوینه‌سه‌ شوون زبڵدان و پیسى، ك یه‌یش كار ناپه‌سه‌ن و ناڕه‌وایگه‌و ئى جووره‌ ره‌فتاریگ میرات رژیمه‌یل توتالیتاریه‌ ك ترس له‌ ملله‌تیان دیرن و هه‌ر له‌وه‌ر ئه‌وه‌یش ته‌لبه‌ن و دیوار چوارده‌ور ماڵه‌یلیان كه‌ن جوور ئه‌وه‌ك له‌ناوچه‌ى سه‌وز به‌غدا كه‌فێده‌ وه‌رچه‌و.

 

وه‌لى له‌شوون ئه‌وه‌ك بار ئاسایش كه‌میگ خاستره‌و بوى و هیزه‌یل ئه‌مریكى له‌ناوچه‌ى سه‌وز و شوونه‌یل تر عراق ده‌رچین، دى مه‌ندنه‌وه‌ى ناوچه‌ى سه‌وز جوور ئه‌وسا كاریگ نا مه‌نتقیه‌و بیبه‌شكردن هاووڵاتیه‌ له‌ئاساییترین هه‌قه‌یلى و له‌وانه‌یش هه‌ق نیشته‌جیبوین و زه‌مانه‌ت كوومه‌ڵایه‌تى، ك یه‌یش وڵات به‌ێد وه‌ره‌و گرفت فره‌یگ ، ئمجا هه‌ر له‌وه‌ر ئه‌وه‌یش له‌باوه‌تیگ تر وه‌رجه‌ ئیسه‌ داواى ئه‌وه‌ كردم ناوچه‌ى سه‌وز واز بكریه‌ێد ئه‌را مه‌ردم، چوینكه‌ شوونیگه‌ خوه‌ش ئه‌را وه‌خت وه‌سه‌ربردن و پڕه‌ له‌ یانه‌یل جوراوجوور و سینه‌ماو باخچه‌و چایخانه‌و هووكاره‌یل تر ئاسووده‌یى و ڕوى وه‌ر یا مه‌ساحه‌یشى نزیكه‌ى 10 كیلۆ مه‌تر دوجاسه‌و گه‌وراتره‌ له‌دویرگه‌ى ته‌نب گه‌ورا ك هه‌میشه‌ له‌هه‌واڵ باسى كریه‌ێد و كیشه‌ى ناونى ئیران و جه‌وڵه‌ت ئیماراته‌.

 

ئه‌یه‌ په‌یوه‌س بوى وه‌سروشت ناوچه‌ى سه‌وز ك خواست ئه‌وه‌سه‌ بكریه‌ێده‌ شوون نیشته‌جیكردن مه‌ردم، له‌هه‌مان وه‌خت چشتیگ تر هه‌س ك ئه‌ویش ئه‌وه‌سه‌ فره‌یگ له‌ وه‌رپرسه‌یل ئستغلال ئه‌و سفه‌ته‌یله‌ كردنه‌ ك ئه‌و ناوچه‌ دیرێده‌ى وه‌ ئه‌وه‌ك ناوچه‌گه‌ كه‌فتیه‌سه‌ ناوڕاس به‌غداى پایته‌خت و بار ئاسایش ته‌واو نیه‌و له‌وه‌ر ئه‌وه‌یش دوینید كه‌سه‌یلیگ له‌تى نیشتنه‌ هویچ په‌یوه‌ندییگ وه‌ ده‌زگاى ده‌وڵه‌ت یا وزاره‌ته‌یلیش نه‌یرن و ماڵه‌یل خاسیگ ئه‌را خوه‌یان له‌ كومه‌ڵگه‌ى قادسیه‌ داگیر كردنه‌ وه‌ناو پیاو حكوومه‌ت!

 

دوینیم وه‌ل ئه‌و هه‌مگه‌ داگیركارى و ناهه‌قیه‌، میلۆنه‌ها كه‌سیش هه‌ن بى شوونن و له‌ كرایه‌ نیشتنه‌و خیزانه‌یل فره‌یگیش له‌شوونه‌یل نه‌گونجیاگ نیشتنه‌و حكوومه‌تیش چاره‌سه‌ریگ ئه‌را ئى حاڵه‌ته‌ نه‌كردگه‌.

 

وه‌گووه‌رى ئه‌و بار سه‌خت نیشته‌جیكردنیشه‌، فره‌جار ژنه‌فیم له‌وه‌رپرسه‌یل حكوومه‌ت ك قه‌وڵ پرووژه‌ى دروسكردن خانگ ده‌نه‌ هاووڵاتیه‌یل وه‌ك پرووژه‌ى 10×10له‌شار سه‌وره‌و پروژه‌یل تر، وه‌لى ئه‌ویش گه‌مه‌كردن بوى وه‌ ئه‌قڵ هاوڵاتیه‌یل جوور ئه‌وه‌ك واده‌ى خاسه‌وكردن كاره‌با دان ك تائیسه‌یش خاسسازى ئه‌ڕاى نه‌كریاگه‌.

 

پرووژه‌ى به‌سمایه‌یش ئه‌را نیشته‌جیكردن ك قه‌وڵ دریا جیوه‌جى بوود، ئه‌ویش ته‌نیا هه‌ر دعایه‌ بوى و تائیسه‌ جیوه‌جى نه‌ویه‌و كار له‌لى نه‌كریاگه‌، ئه‌یه‌ بیجگه‌ قسه‌كردن له‌بان زه‌ویه‌یل ئه‌وساى سه‌ربازگاى ره‌شیدو پرووژه‌یل تر گه‌ورا ك ته‌نیا هه‌ر باسكردنه‌و هویچ تر، ئمجا باوه‌ڕمان ئه‌وه‌سه‌ له‌سایه‌ى ئى حكوومه‌ته‌ مه‌حاڵه‌ ئه‌و كاره‌یله‌ جیوه‌جى بوودو له‌یوا دوینیم ك فره‌یگ له‌ وه‌رپرسه‌یل له‌ده‌سڵات و له‌ئه‌نجوومه‌ن نوێنه‌ره‌یل باوه‌ڕیان له‌یواسه‌ ك وجوودیان له‌عراق وه‌ختیه‌و زوورمیان خوه‌شیان له‌وه‌ تیه‌ێد بچنه‌ وڵاته‌یل تر بژیه‌ن، هه‌ر له‌وه‌ر ئه‌وه‌یش عراق له‌هویره‌و بردنه‌و خزمه‌تگوزارى له‌تى نیه‌.

 

ئمجا دیار و ئاشكراس ك وه‌رپرسه‌یل خوه‌یان و سه‌كه‌یلیان په‌یوه‌سه‌ بوینه‌سه‌ ناوچه‌ى سه‌وز و هاووڵاتیه‌یلیش له‌و خه‌یره‌ بیبه‌ش كردنه‌و له‌هه‌مان وه‌خت ملیۆنه‌ها كه‌سیش له‌دابینكردن شوون نیشته‌جى بیبه‌ش بوینه‌.

 

سادق ئه‌زره‌قى

 

ج